La selmana pasada, nel marcu de la 41 Selmana de les Lletres Asturianes, la Dirección Xeneral de Planificación Llingüística y Normalización y l’Institutu Asturianu de la Mocedá entamaron la quita edición del «Entaína a escribir», concursu de microrrellatos improvisaos n’asturianu pa la xente mozo ente 14 y 35 años.
El concursu consistió na ellaboración d’un microrrellatu nun tiempu máximu de 20 minutos, a partir del tema que’l presentador del actu, l’escritor Dolfo Camilo Díaz propunxo, la fras de la película «El sestu sentíu»: «Dacuando veo muertos».
L’actu, que tuvo llugar na sala Borrón d’Uviéu, cuntó con ocho inscritos y tuvo como xuráu a Dolfo Camilo Díaz, Esther Prieto y Juncal García Velasco.
El primer premiu foi Gonzalo Llamedo por «Nes últimes». En segundu llugar quedó’l rellatu «El pasaxeru», d’Inaciu Galán, siendo’l tercer premiu pa Pelayo Martínez Olay por «Fueyes vives». Darréu ufrimos los testos ganadores:
Primer premiu: Nes últimes, de Gonzalo Llamedo
Dacuando veo muertos. De fame. En Mercadona. Apaecen a les nueve cuando me toca facer caxa y zarrar sola. Y muévense como la yedra, esguilando pelos estantes, garrando la fruta podre pa poder llevar a casa les migayes d’una vida que diba ser plena y qu’agora mesmo ta n’ufierta.
Segundu premiu: El pasaxeru, d’Inaciu Galán
Garró un taxi y dio les señes del destín con priesa. El taxista, sorprendíu pola situación, entainó peles cais vacies de la ciudá decatándose d ela presión qu’exercíen los xestos de nerviosismu del pasaxeru, que diben in crescendo según avanzaba’l viaxe.
A mediu camín el veceru paeció alloquecer y repetía una fras ensin sentíu con un tonu tenbrosu, solombriegu y xuxuriando: dacuando veo muertos, dacuando veo muertos, dacuando veo muertos…
El taxiasta nun sabía qué dicir y asustáu aceleró buscando rematar rápido’l serviciu. Al llegar a les señes indicaes el neñu baxó del taxi. El taxista nun quixo cobra-y por quitalu d’enriba, y el neñu empobinó hacia un lloca onde lletreru anunciaba: Casting pal musical de la pelíucla El sestu sentíu.
Tercer premiu: Fueyes vives, de Pelayo Martínez Olay
Un ruíu ruempe los mios suaños y faime fuxir d’una velea. Separto les pestañes, abro los güeyos. Espierto entós nel mio cuartu, cola primer lluz de la mañana entrando pela mio ventana. Véome solu anque sé bien que nun lo toi. Decenes, cientos, quiciás hasta más de mil tán ehí conmigo. Siéntome a reflexonar, pienso en toos ellos. Dalgunos aportaron tarde a la mio vida, pero los más d’ellos formaben parte d’esti mundu muncho enantes del día de la mio nacencia. Decátome que, por mor d’estos llibros, dacuando veo muertos, y apaez na mio mente’l rostru d’aquel xeneral cartaxinés que nun foi a salir d’Hispania. Por mor d’estos llibros, dacuando viaxo a esi mundu del que naide nun torna.
| Edición | 1er Premiu | 2u premiu | 3er premiu |
|---|---|---|---|
| 2016 | Inaciu Galán por «La fin de la pasión» | Raquel F. Menéndez por «You nun conozo…» | Solinca Turbón por «Yá lo dicía…» |
| 2017 | Raquel F. Menéndez por «Yá lo dicía…» | Inaciu Galán por «La nuesa conexón» | Solinca Turbón por «L’amor» |
| 2018 | Inaciu Galán por «Una vida de luxu» | Ánxela Gómez por «Camuda’l coral» | Claudia Gutiérrez Lueje por «Que bien…» |
| 2019 | Xurde Menéndez Caravia | Claudia Gutiérrez Lueje | Inaciu Galán |
| 2020 | Gonzalo Llamedo por «Nes últimes» | Inaciu Galán por «El pasaxeru» | Pelayo Martínez Olay por «Fueyes vives» |
