La revista de lliteratura Brixel llega al númberu 6 de la segunda época con una entrega que pon bien d’atención na lliteratura moza. La revista, qu’apaeció per primer vegada nel mes de xunu del 2010 col periódicu Les Noticies y concebida como un suplementu lliterariu “onde tuvieren sitiu tolos actores del mercáu del llibru n’Asturies y que valiera pa dinamizar el sector editorial del país y dar visibilidá a la lliteratura escrita n’asturianu y gallego-asturianu”.

Esti enfotu ye’l mesmu que llevó en 2013 a B. Alto a recuperar la cabecera, magar que convertida nuna espublización añal. Amás de los 5.000 exemplares en papel que reparten de baldre ente les llibreríes y usuarios de les biblioteques públiques d’Asturies, Brixel ta disponible pa la so consulta na web.

El númberu de Brixel del añu 2018 ábrese con una entrevista a Berta Piñán autora de ‘Como la muda al sol d’una llagartesa’, a la que sigue un artículu d’Henrique G. Facuriella sobre Alice Munro. Facuriella firma tamién la entrevista a Xuan Santori. Antón García traduz a la poeta italiana Antonia Pozzi y Raquel F. Menéndez, miembru del conseyu de redacción de Formientu, analiza l’últimu poemariu de Lourdes Álvarez.

Ente les firmes que se pueden atopar tán tamién les de Sibisse Rodríguez, Mario Baragaño, Damián Barreiro, Alberto Suárez o Marina Sanmartín. Nos conteníos apaecen delles crítiques lliteraries a los llibros últimos d’autores mozos como Xaime Martínez, Inaciu Galán o Pablo X. Suárez, asina como a la revista lliteraria Reciella Malory.