¿Quién somos?

¿QUÉ YE FORMIENTU?

Formientu ye una revista lliteraria moza fundada en Xixón nel añu 2006 por Inaciu Galán y Bexa Pérez. El primeru foi director de la revista dende’l primer númberu hasta l’añu 2017, cuando na VII Xunta d’Escritores Asturianos presentó’l númberu especial editáu a costafecha pal eventu.

Dende entós son codirectores Diego Solís y Claudia Elena Menéndez, formando parte del  Conseyu de Redacción. Esti anóvase cada añu y d’él formaron parte a lo llargo d’estos años escritores como Laura Marcos, Andrés Astur Treceño, Nacho Iglesias «Wings», Alba Carballo, Raquel F. Menéndez o Francisco Priegue, ente otros.

AGORA… PLATAFORMA LLITERARIA ASTURIANA

Cola esperiencia y el nome de Formientu en 2018 púnxose en marcha esta plataforma na rede dedicada a la promoción y difusión de la lliteratura asturiana, con especial atención, como’l so proyectu madre, pa la mocedá qu’escribe y crea n’asturianu, pero atendiendo tamién a la información xeneral alredor de la lliteratura asturiana.

En Formientu.com ufiertamos una información atractiva y dinámica, col oxetivu de fomentar l’espardimientu y promoción de les Lletres Asturianes ente la mocedá y col envís d’afalar la creatividá lliteraria dende la rede.