La revista Formientu, dedicada a la lliteratura n’asturianu escrita por autores mozos y moces, apaeció n’ochobre de 2006, dirixida por Inaciu Galán y editada pola asociación Xareos! Xestión Cultural, col envís de «dar voz a los escritores más mozos y ser un escaparate y bancu de pruebes pa la so obra».
Nel primer númberu apaecieron 26 autores y dende entós vien dando espaciu a más d’un cientu d’ellos, amosando la bona salú de les Lletres Asturianes.
La revista ñació con dos númberos al añu de menor embergadura, pasando dempués a ser añal y aumentando les sos páxines, convirtiéndose dende la so nacencia na cantera y escaparate de la mocedá qu’escribe n’asturianu, pasando per ella más d’un cientu de nuevos y nueves escritores de menos de trenta años.
El segundu númberu, un especial tituláu ‘La narrativa más moza’, salió por mor de la XXVIII Selmana de les Lletres Asturianes y cuntó con 19 narradores mozos y moces. En setiembre de 2007 un númberu especial dedicóse a la lliteratura erótica.
En payares de 2008 apaez el númberu 4, nel que vuelven a dase a conocer nueves voces de la lliteratura asturiana y que pasa a espublizar pa Xareos!, la editorial «La Cruz de Grau».
La revista lleva asoleyaos más d’una quincena de númberos, incluyendo un especial editáu pa la VII Xunta d’Escritores Asturianos, celebrada en Villaviciosa en 2018. Foi nesi añu cuando la revista camudó de director, cediendo’l téstu Inaciu Galán a Diego Solís y Claudia Elena Menéndez, como codirectores.
A lo llargo d’estos años pasaron pel Conseyu de Redacción autores mozos como Benxa Pérez -confundador de la revista-, Laura Marcos, Raquel F. Menéndez, Francisco Priegue, Alba Llaneza, Nacho Wings o Andrés Astur Treceño, ente otros.
