L’espaciu d’Iniciativa pol Asturianu na FIDMA de Xixón va acoyer güei una «Performance + Presentación + Firma llibros» de Fran Priegue (Avilés, 1991), basada nel poemariu «Chemtrails surden na mio boca», I Premiu de Poesía «Antón de Marirreguera», editáu por Saltadera Ediciones.
L’actu sedrá a les 18:00 hores nel pabellón 3, espaciu 24 de la Feria Internacional de Muestres d’Asturies.
EL LLIBRU
Llámense chemtrails les esteles que surden al lliberar nel aire determinaes sustancies químiques o biolóxiques. Según teoríes conspiratives, inflúin na creación de patrones climáticos anómalos pa controlar el mediu ambiente y la salú de la población mundial.
Treslladando esa imaxe a poesía, con un ciertu bagaxe surrealista, Francisco Priegue constrúi un llibru sobre l’alteración de la realidá, tanto la personal como la colectiva.
Son trenta poemes los que nos apurre nesti primer premiu «Antón de Marirreguera» de poesía, más otru que se forma al axuntar los primeros versos de cada poema, nel índiz del llibru.
