Trabe asoleya novedaes poétiques de Marta Mori y Armando Vega

Orfandá ye’l poemariu de la devastación: la que produz la muerte del padre, non por esperada menos doliosa; la devastación que produz la crueldá de l’ausencia; pero sobre manera ye la devastación de saber qu’esa conversación aplazada que delles veces ye la vida nunca nun va dase, nin tan siquier siendo posible que se diera. Orfandá son trenta y cuatro poemes densos, pétreos, milimétricos, conteníos, que son a llevanos del dolor a la redención, del tiempu de la infancia a la madurez y, delles veces, a la rebeldía y la vergoña de siguir andando como si nada, como si’l rayu del dolor y de la muerte nun nos tuviera firío.

Marta Mori (Xixón, 1965), llicenciada y doctora en Filoloxía Hispánica y profesora de Secundaria, foi la primer muyer en ganar el Premiu «Xuan María Acebal» de Poesía (2010). Tien publicaos cuatro poemarios: Pórticu (2003), El tiempu de la espera (2005), L’alcordanza (2010) y La mio voz(2011). Anque más conocida como poeta, en 2008 publicó un volume de rellatos, Histories familiares, y en 2017 participa na antoloxía de narradores editada por Paquita Suárez Coalla Hestories pa contales (Más nomes de muyer). Quiciabes sía Orfandá’l más personal y fondu de los poemarios de Marta Mori, una de les voces más interesantes de la poesía del Surdimientu.

Ritanes, ñerbates y otros cantos al pasáu aúne composiciones de distinta factura nes que predomina’l poema curtiu, pero también dangunu de más llargor, correlatu perfechu de la memoria. Porque de memoria falen estos versos, de la memoria caltenida de la infancia perdida, del tiempu pasáu nun mundu que yá nun esiste. El qu’agora escribe yá nun ye’l nenu que foi hai tanto nun mundu rural aseñoriáu de ritanes, ñerbates y otres güelgues que lleguen hasta nós al traviés de la señardá de lo perdío. Escritu nun asturianu apegáu a la oralidá, estráu de dialectalismos orientales bien guapos y naturales, esti nuevu poemariu d’Armando Vega (col que ganó’l Premiu de Poesía «Nené Losada Rico» que convoca l’ayuntamientu de Valdés nel 2017) vien a sumase a la poesía de la pérdida (de la inocencia, de la infancia, d’un mundu y una forma de vida) pero también (y por ello) a la de la so recuperación al traviés de la palabra escrita «a sílabes cuntaes».

Armando Vega Rodríguez (Les Cuerries, Espinaréu, Piloña, 1961) desenrolla’l so llabor d’artista multidisciplinar en Xixón, con xeres qu’abarquen dende la fotografía a la escultura, pasando –que ye lo que más nos interesa– pela poesía. Escritor billingüe asturianu-castellanu, tien dos poemarios publicaos, Pente’l borrín de la memoria (2005) y Les hores escrites/Las horas escritas (2011). Incluyíu en dos antoloxíes poétiques (Asturcones. 31 poetas asturianos, 2013 y Contra’l silenciu, 2014), colaboró en distintes revistes lliteraries como Literastur, Reciella Malory, Voces, Prímula…