Naguar por sentir
les manes enllenes de feríes,
los pies con cristales n’ellos.
Quedar ensin aliendu.

Naguar por cayer valtáu
depués de correr descalzu
ente les ortigues,
ente les piedres.

Naguar por llorar
bañame en llárimes,
glayar hasta quedar afogáu.

Naguar por lluchar,
da-y un golpe,
face-y sangrar.

Naguar por espurrime,
por tar de pies
col airón besándome na piel.

Naguar por ganar
depués de sentir,
depués de cayer,
depués de llorar,
depués de lluchar.

La entrada «La sienda», d’Alba Llaneza Pulido se publicó primero en Formientu.

Que’l mármol gris, nun seya mio casa
nun caltenga mios suaños, presos
baxo la solombra encesa
qu’aviva l’odiu escondíu en cada llárima.

¡Dexen una margarita por cada deu
qu’escribió esti poema!
¡Dexen que la lluvia esnidie la culpa
d’esti cuerpu!
Y el sol evapore’l mieu.

Que la tierra me meza
Al ritmu d’una añada
Pa que brote d’otra miente
La mio versión más pura.

¡Déxenme ser tierra!

El mio corazón escapará llibre
como una abeya
qu’esnala de flor en flor.

Y n’alcordanza d’esta vida
tendré’l velenu siempre dientro.
Mancando, marcando la sienda
en silenciu.

La entrada «Salvia» d’Alba Llaneza Pulido se publicó primero en Formientu.

Inercia ye la fuercia

que mos xunta.

Emburriaos pol pasar de los díes

como fueya seco baillando col airón.

Davezu

            pol vezu

                       doite un besu.

La entrada «Inercia», d’Alba Llaneza Pulido se publicó primero en Formientu.

Sé que conocíes l’atmósfera con golor a llerza
que dexabes en min
como un paisaxe d’añaes amargues
qu’inda creo españen nes mios oreyes.

Sé que conocíes -con ferruñosu instintu-
les lleis que mos rexíen,

trataben de caltener
la nuesa cafiante y callada
convexa conexón.

Sé que conocíes cual dañible sabichega
atraída pol silenciu de los mios güeyos
a la neña que fui
y guah.a
y rapaza
y muyer.

Muyer qu’abandonasti
na seguranza de ser:
nosotres y nengunes,
nengunes y nosotres.
Acordies siempre.
Eternes siempre.

La entrada «1920 – 2015» d’Alba Llaneza Pulido se publicó primero en Formientu.

Davezu camiento qué sedría de ti con otru amu.

Ún que ficiere que les tos piernes fueran fuertes pa caleyar per milenta siendes.
Ún que ficiere que los tos llabios fueren la puerta p’algamar el cielu.
Ún que ficiere que nel to vientre xorreciera maxa ya saliera vida.
Ún que ficiere que los tos brazos nun escaezan dar nengún abrazu.
Ún que ficere que de la to boca namás escapen afalagos.
Ún que ficiere que de los tos güeyos nun salgan mas llárimes.
Ún que ficiere que na to tiesta nun hubiere estos camientos prietos.

Davezu camiento que sedría de ti ensin min.
De min ensin min.

La entrada «Bufíu», d’Alba Llaneza Pulido se publicó primero en Formientu.

Una idega que cuerre.
Un suañu que ñaz.

Tráime vientos d’aventura
d’otres xentes
d’otres tierres.
Promeses de nueches surrealistes
asemeyaes a aquelles que colaren.

Tráime l’arume
d’una tormenta de branu,
de la yerba recien cortao,
de la fueya quemao.
De la mar.

Tráime les ganes de rir,
de sentir, de prebar,
d’esnalar, de vivir.

Y entós…
en silenciu,
no más escuro del salón
y ensin mover un músculu.

Mato les ganes.
Mato la idega.
Mato’l suañu.

La entrada «Galbana», d’Alba Llaneza Pulido se publicó primero en Formientu.