Nesta tarde que mata,

ya cuasi tapecía pola nueche,

avérome al cristal que separta’l mundu

d’esta vida enforma inerte.

Yá cuasique desapaez el calicor

abellugáu nestes cuatro muries,

yá nesti cuartu nun ta la to lluz.

L’arume a besos encirraos llégame de sópitu

como un españíu d’aire,

como dalgo que quema.

Y ye cuando esti cuartu solitariu y murniu

tórnase en privilexu d’esti mundu,

que ye’l míu.

La entrada «Refuxu», de Cristina Menéndez Martín se publicó primero en Formientu.

Yeres de zucre, delles veces de sal,

caminabes sele ente les rexes

que cercaben el to xardín.

Xuntabes les manes

y tapabes los güeyos

camentando qu’asina la tristura

nun t’alcanzaba.

Yeres de papel,

yeres de fierru encesu.

Sin llendes nel alma

coles pallabres surdiendo

ente los tos llabios mancaos pol tiempu,

enllenos d’un tonu colloráu

que fraya y tapez el día.

Yeres azul cielu enllenu verde patria,

color d’un pueblu que nun muerre

nel mio corazón, nes mis vidayes.

Enxamás tuvisti lloñe,

poro, llevéte na riestra d’alcordances

siempres.

Yeres voz, yeres silenciu

nel más calorosu desiertu.

Yeres, yes y serás

la muria alzada nes vides

de los mios cimientos.

La entrada «Resquiciu de to», de Cristina Menéndez Martín se publicó primero en Formientu.

Salióse’l filu de los cuatro oxales,

y los botones abrocháben-y les duldes.

Les espigues cubríen les verdaes qu’entá nun dixera

y  les mentires diches

alcontraron un requexu pa esconder la so pena .

Marcáronse-y  les rayes la ropa,

grabáronse-y los pliegos na piel

ya les arrugues del tiempu

fueron camudando una por otra.

El tactu d’aquelles manes  (les suyes),

dibuxó nel so cuerpu, con tientu,

les curves, eses que yeren d’ella,

aquelles que yá nun reconociera.

¿Quién tuviera nesi cuerpu?

¿Quién sintiera la so belleza?

Yera un día tres otru…

poro, fízose llarga la espera.

La entrada «Nel mesmu sitiu», de Cristina Menéndez Martín se publicó primero en Formientu.

Agora que les voces nun glayen,

nesti delitu d’alcordances

separto les manes del coral

pa dexar salir la pantasma de l’ausencia.

Agora que tastio’l dulce sabor

de la batalla ganada

ye cuando esbillo les migayes

d’esta victoria algamada.

Yá dexo ralures en blanco

nesti que ye’l llibru la mio vida,

yá nun fai falta guardar

tolo que nun tenía salida.

Agora que les voces nun glayen

doime cuenta que siento otres

-amoriaes, gayasperes, sollertes…-

que nun puedo, que nun quiero

dexar que callen.

La entrada «Esti nun lleva títulu», de Cristina Menéndez Martín se publicó primero en Formientu.

Va cuántos años nun te siento
nin al otru llau del teléfonu.
Va cuantayá que me pruyen les ganes
de nun tener qu’escaecete
pa volver a imaxinate.
Pasen los años y ñúblase’l to recuerdu
efímeru…
d’aquellos díes soleyeros
d’aquellos fríos iviernos.
Munches veces véote nos suaños
y sin querelo piérdote de nuevo.
Llámote, siéntote…
recuérdote como enantes.
La to risa,
los tos llabios
la guapura del to cuerpu.
Y dóime cuenta de que yá nun queda más
que’l to recuerdu.
¿Qué foi d’aquellos inxenuos?
¿Qué foi d’esi tiempu de besos?
…
Dame pena nun saber
qué foi de too aquello.

La entrada «La to risa», de Cristina Menéndez Martín se publicó primero en Formientu.

L’orbayu pintaba’l rocíu nel mio pelo
y el soníu del silenciu glayaba naquel llugar.
Rises infinites blincando al rodiu
del inmensu mundu
que dexamos apartáu per un momentu.
Quixi convertime en gavilueta
y esnalar sele,
coles ales frayaes,
sin descansu,
col xiblíu del aire
qu’enguedeyaba l’arume la mar.
Lloñe, la sablera
acueye miraes perdíes
de pensamientos ensin vida
de fales solitaries.
Lloñe,
un horizonte perdíu
ya infinitu,
avérame a esos requexos
que naguo algamar algún día.

La entrada «Llendes», de Cristina Menéndez Martín se publicó primero en Formientu.