Tienis de ti tantas partis arrepartías

que ya no sabis ni quién eris.

D’otrus paísis te conocierun

quasi que al tiempu mesmu d’olvial-ti.

Nacemus pa los demás,

mojandu las secas yervas

de coraçonis ajenus.

Si el tiempu lo premiti,

espera i vé-las verdeal,

pero si ni essu conocieras

no piensis que hue baldíu:

En ellus eris tu, en ti ellus.

El bahíu que compartimus,

una idea sembrá,

chamá emprendía,

empapujan la vida en verdá

de quien creemus

que la tenemus arrepartía.

La entrada «Una idea sembrá», de Ismael Carmona García se publicó primero en Formientu.

Me reselvu el derechu
a no aprendel ingrés,
a no atrangullal los mis ojus
bala, puñu, insultu, fachenda
de pantalla nenguna.

Ahuyu delas propagandas,
dela retólica del dola,
del humu dela economía
i de goviernas malas
que se moflan de mí
mañana, tardi i nochi.

Ná m’importa delos millonis
de trampas que no hizi,
de pagus, primas, débitus,
ni empréstamis. Por mí,
ya puein hazel gaspachu
i añusgal-si con ellus.

Despreciu el valol dela corrución:
tolos días s’aboheta la carni
i llena de cocus se tira,
Pui, qué me quereis: ombri o mosca?

Me hiedi el levantiju
que derrota sin entangal
i que de continu grullean
los baraterus con venceju.

En emissoras de tolas nacionis
vazinan i monean
con el pran d’ellus i ellus
de çaleal tolo que los sustieni.

Envarbascan las huentis,
las senaras las envenenan,
hazin candelas conos librus,
no ai quien ponga bilmas al pechu.
—Tó es tan insanu que moril
da salú al cuerpu i florencia al’alma—
quierin que assín pensemus
pa repapuceal-si agustamenti.

No m’engardillan essus solitarius,
tovía quea lus en el candil
p’alumbral polas escuranas
sin perdel la verea.

La entrada «Oda al sistema», d’Ismael Carmona García se publicó primero en Formientu.