Prestábame valtar toles muries
que puedan medrar ente tu y yo.
Prestábame contar tolos díes
qu’hai a la to piel.

Prestábame que nun hubiere palabres
en tolos llabios del mundu,
namás aliendu
de la to boca a les mios coraes.

Prestábame que nun hubiere distancia
que percorrer
ente tu y yo.

Pero haila.
Por eso prestábame percorrela.
Llegar.
Algamate.

La entrada «Prestábame», de Moisés Cima Fernández se publicó primero en Formientu.

«Pero no sabes nada,
a lo sumo piensas a veces
que es tan poco lo que conozco de ti.
Lo que conozco es la tristeza de tu casa
vista de afuera».

(Mario Benedetti, Es tan poco).

«Mi táctica es quedarme en tu recuerdo,
no sé cómo ni con qué pretexto,
pero quedarme en vos».

(Mario Benedetti, Táctica y estrategia).

¿Quién decidió que tienen que ser
d’igual mena los amores escaecíos
que les guerres de mal recuerdu?

¿Quién decidió que tien qu’haber
táctiques,
estratexes,
ataques furibundos
na metá de la nueche?

¿Quién dixo que tenía qu’entrar
a bayoneta calada,
a matar,
a morrer
d’amor
non correspondíu?

¿Quién decidió que la nueche
fora cómplice vil
de los sentimientos más nobles?

Y, en cambiu,
nun voi quedar
esfoyando margarites:
Que si me quier,
que si nun me quier,
que qué culpa tendrán
les flores de que tu nun me quieras.
Que qué culpa tendras tu
de que yo nun seya l’home
al que quies querer.

Y con too,
he asediate
en silenciu.
Namás col mio pensamientu,
nun quiero facete mal ningún,
atérrame incomodate.
Naguando porque abras les puertes
de to casa,
del to castiellu,
de los tos güeyos inmortales,
de los tos llabios
que me maten.

Déxame conocer
lo qu’hai nel dorsu de les tos manes cansaes,
garrales con calma,
y que’l mio llombu valga d’escalón
pa posar el to pie calláu
de la qu’afuxes
(guerra de guerrilles,
suerte de razzies)
col mio corazón robáu.

La entrada «Déxame conocer», de Moisés Cima Fernández se publicó primero en Formientu.

«Ni tu eres hijo de nadie,
ni legítimo Camborio.»

(Federico García Lorca, «Prendimiento de Antoñito el Camborio en el camino de Sevilla», Romancero Gitano).

Andar con pies estranxeros
na propia tierra
nun ye que seya cosa allegre;
tampoco cosa triste.
Ye,
ensin más.
Ye ser apátrida
nes mesmes caleyes
nes que medrabes
montáu nuna bici
d’aquelles que teníen una palanquina,
como los coches.
Trés piñones.

Ye mirar estrañu los praos,
los maizales,
les cases toes
nes que de guaḥe enredabes,
como un gochín de San Antón,
nos suétanos,
nos desvanes,
nos cabanones
(¡foi tan noble
la infancia nel mio llugar!).

Andar la propia tierra
con pies estranxeros
ye dicir y sintir
les palabres de siempre como cosa nueva,
cosa ayena.

Ye ver a los de siempre
como desconocíos.
Ye abrir los güeyos a otros mundos,
a ningún mundu.
Ye zarrar los güeyos al mundu,
al to mundu,
a tolos mundos.

Ye sabete ensin pasáu.
Ye sabete ensin futuru
(y matar el futuru
ye muncho más triste,
muncho más duro,
realmente desolador).

Andar con pies estranxeros
la propia tierra
ye volver a casa
sabiéndote
fíu de naide.

La entrada «Pasos extranxeros», de Moisés Cima Fernández se publicó primero en Formientu.

Una posibilidá ente diez mil

paez mui

mui improbable.

Una posibilidá ente diez mil

paez cosa de los suaños

colos que mantengo espiertu

el deseu de los tos güeyos;

colos que mantengo dormíos

los sospiros de desaliendu.

Una posibilidá,

una.

Una ente diez mil.

Una posibilidá ente diez mil

cabe na palma la mano.

Gárresla con dos deos.

¡Quién lo diría!

Una posibilidá

paez tan liviana…

¿Cuántes posibilidaes hai

d’atopar nel cielu de la nueche

dos Universos

ente tantes estrelles?

¿Cuántes posibilidaes hai

de beber un solu sospiru

ente tantos

tantísimos vientos?

Una.

Una ente cien mil,

cuarenta mil millones.

Una.

Pequeña como una formiga

frente un elefante.

Una.

Una pequeña posibilidá diminuta.

Una

que cabe na palma la mano.

Una posibilidá

La mía.

Leve

como una sorrisa.

Y el to Dios sabe

que guardo más sorrises

nos güeyos

(nos mios güeyos,

nos tos güeyos)

qu’estrelles hai na nueche.

La entrada «Una posibilidá», de Moisés Cima Fernández se publicó primero en Formientu.

A veces,
a veces demasiaes veces,
tengo señaldá infinito
de lo que tu
(tu
tolos tus
tu)
y yo pudimos facer.
De lo que pudi ser
xunta ti
(ti
tolos tis,
xunta ti).

A veces,
a veces demasiaes veces,
tengo señaldá de ti.
Otres veces,
son infinitamente más estes veces,
tengo señaldá de mi.

A veces búscome
y nun soi a atopame
sinón en ti

(en ti
en tolos tis,
en ti).

Mal coñazu cuando nun t’atopo.
Mal coñazu cuando m’atopo.

Pa tos pies

abonda la mio patria.

Que nun seyas estranxera

na tierra de los de mio.

Pal mio descansu

abonden los tos güeyos,

el silenciu de los tos llabios,

el to mirar posáu.

Nun hai más patria

que la que da descansu.

Nun hai más patria,

nun quiero más patria,

que’l to sospiru.

Que lu lleve l’aire,

que l’aire lu lleve,

que nun hai patria ensin ales,

que’l mundu ye grande

y el mio corazón pequeñu.

Pequeñu como una nuez.

Como una nuez na que caben,

¡ai si quixeres metelos!,

Los sospiros de la xente de to,

la to patria,

el mundu enteru.

Y los besos de la inmensidá,

los que pa ti guardes.

_________________

Si de toles perles
que’l mar escuende
pudiera garrar namás una,
garraría toles perles
qu’escuenden les vueses pequeñes
xigantes
sonrises.

Garraría toles perles
que brillen infinites
nos vuesos güeyos de sorpreses
d’entrugues.
Toles perles garraría
por facer con elles una corona
pa coronavos.

Una corona que fore yelmu
pa qu’ellos,
los de los brazos al aire,
los de les fames sangrantes,
los de les muertes galopantes
nun vos pudieren nin alcanzar
nin poner la mala corona
d’espines,
de sacrificios infames,
de sacrificios y fames,
de noxentos latrocinios
que roben el tocín de cielu
de les vueses barrigues d’ánxeles.

Si de tol oru de la tierra entierra
pudiera un granín guardar,
arrancaría-y a la tierra tol fierro
pa facer miles de millones d’espades
pa cortar los inmundos gargüelos
qu’engullen futuros
y inchen de fame los güeyos.

Los güeyos vuesos
de sorpreses
d’entrugues
de sorrises.

Los güeyos qu’alimenten el mio suañu.
Los güeyos qu’arropen el mio sueñu.
Los güeyos qu’aselen la conciencia del home
demasiao consciente pa ser vil,
demasiao cobarde pa ser home.

___________________________

Nun dexes,
polo que más quieras,
polo que más temas,
que posen les sos manes
estrañes,
usureres,
asesines,
les manes que roben,
nos suaños que guardamos
escondíos
nas almugaes.

Nun dexes,
polo que más odies,
polo que más nagües,
que posen les sos manes
nes proles imaxinaes nos xenitales.
Que nun sospechen los suaños
que guardamos nes almugaes,
nin les pasiones qu’escuenden
les sábanes.

Nun dexes,
polo que más quiero,
polo que más temo,
qu’arrampuñen la lluz de los tos güeyos,
los secretos de los tos llabios,
los tos llabios de los mios suaños,
nin esa Lluna negra
que guarda sonrises de estrelles.

Que nun roben les tos palabres.
Que nun roben los tos silencios.

Prométeme,
xúrame,
que vas apretar el gatillu
namás veas nel to cuartu
les trapaceres solombres.

Y si,
por casualidá
o por causalidá
confundieres la so solombra cola mía
y disparares sobre esti cuerpu,
aprieta,
aprieta fuerte compañera,
bien fuerte
el gatillu.

Prométeme,
xúrame,
qu’he ser yo’l primeru en cayer
si violento los suaños
los que guardes nel silenciu serenu
de la to almugada.

La entrada «Mal Coñazu», de Moisés Cima Fernández se publicó primero en Formientu.