Mirástite al espeyu
y sabes que yá
nun yes la mesma.
Nun yes la qu’hai años
lluchaba por un reinu
que nun esistía.
Yá nun yes aquella guah.a
que falaba con lleones y faunos,
que lluchaba escontra bruxes
nun iviernu eternu,
que glayaba llibertá
por un pueblu que tampoco esistía.
Yá nun yes tu,
como yeres enantes,
pero ”quiérote” igual.
Anque nun te conoza
y, gústesme más agora.

La entrada «Narniana», de Nacho Iglesias «Wings» se publicó primero en Formientu.

Creasti una ciudá
na que taba too por facer
y too por escribir.
Creasti cais
peles que perdenos,
creasti chigres
nos que pasar les hores
falando y bebiendo,
creasti llibreríes
pa lleer hasta que cansen los güeyos,
creasti tiendes de música
pa sentir decenes de vinilos al día.
Creasti cuasi tolo necesario pa nós,
pero escaecisti lo más importante:
qu’aquello yera un suañu,
non la realidá.

La entrada «Ciudá de suaños», de Nacho Iglesias «Wings» se publicó primero en Formientu.

A la fin del día
tres la lluna
escuéndense secretos
que naide sabe.
Misterios que naide cunta
nin naide quier saber.
Escuéndense suaños,
esperances, alcordances…
Y peles nueches
hai xente que prefier
pensar nesi llugar
que lluchar p’algamalu.

La entrada «Tres la lluna», de Nacho Iglesias «Wings» se publicó primero en Formientu.

Enxamás supe
cómo dicite tolo que pienso.
Enxamás supe
almitir cuánto me manquen
los tos silencios
les tos pallabres
y los mios versos
qu’en realidá son tuyos.
Si dalgún día
t’alcordabes de min
pela nueche escaecíes
suañando con otru.

Y mientres tu dormíes
yo imaxinábate espierta
al llau de la mio cama
y ensin poques ganes de dormir.
De xuru que dalguna vegada
tuvisti nos mios suaños
y esa mañana
espertasti con una canción
de Dylan na cabeza.
Nun me mires a min
fuisti tu quien quixo
sentir esi vinilu tola nueche.

La entrada «Enxamás», de Nacho Iglesias «Wings» se publicó primero en Formientu.