Depués de cincuenta años

taré quexándome

el llumbagu llamaráme

la rodiella doleráme.

Depués de cincuenta años

la mio fía n’Alemaña trabayará

la mio hermana morrerá

y l’alcordanza de ma toles nueches apaecerá.

Depués de cincuenta años

daráme too igual

si tu tas equí.

La entrada «Depués», d’Olaya Mallada Fernández se publicó primero en Formientu.

Próxima parada: Tribunal.

Nun pertenezo a equí,

nun pertenezo a nengún llau.

Próxima parada: Gran Vía.

Nun voi firmar

un próximu añu

Nesti sitiu.

Próxima parada: Sol.

El viaxe en metro

ye llargu

a un llugar

tan lloñe

tan escuru

qu’aborrona la to mirada.

Próxima parada: Callao.

Pue ser güei,

güei de mañana,

güei d’ayeri.

El tiempu nun importa

Si me garres siempres.

Atención. Metro de Madrid informa

Que cada pisu,

ye un mundu,

cada cuartu,

un universu,

y cada cama,

una vida diferente,

que vien y va

cada añu,

cada firma,

y yo,

ensin ti,

nun me muevo

d’equí.

La entrada «Contratu d’alquiler», d’Olaya Mallada Fernández se publicó primero en Formientu.

Nun yeres

naide

y crees qu’en Madrid

daquién

como un dios, anque

más bien como Ícaro,

va afayar la to enerxía,

el to poder, la to estrella.

Nun yeres naide,

nun vas selo nunca.

Lo único que lleves baxo’l

brazu

ye un cacharru

llenu cachopu de puxarra.

Lo único

que ye lo que te fai diferente,

ye’l to nome

na tarxeta sanitaria.

La entrada «Tuluergo», d’Olaya Mallada Fernández se publicó primero en Formientu.

Lo único polo que naguo ye

mirate peles mañanes nel

almuerzu

desnudate pelos mios güeyos

descubrir

que los de to

tornen a min.

Pensar

que me desees

na to cama.

Y que me sorrías.

El mundu que conozo yá nun esiste.

Creeré que suañes col mio cuartu,

la mio cama,

la mio mano.

Y suaños espiertos xunto a min.

Sábeslo tan bien como yo.

La curva qu’arrodia los tos güeyos

que cuerre escontra la to sorrisa

y apuerta nos tos dientes,

blancos,

puros,

como la to alma,

blanca,

pura,

enllena de fueu,

ardiente,

intensu,

como la mar que ruempe

na tempestá

furia ensin control

pero llibre y sensual

que m’atrapa

y me fai viaxar

a un mundu

paralelu a esti

nel que tu me quieras

tal como te quiero yo.

Inocente de min

voi siguir revolviendo‘l café.

La entrada «L’almuerzu», d’Olaya Mallada Fernández se publicó primero en Formientu.