quiciás venga d’otru llugar;

quiciás, namás, cola mio mano puea (la) to cara tocar,

y sigue siendo dalgo probe pa poder esnalar.

Quiciás tenga de rimar n’asturianu;

Quiciás tenga de falar más;

Quiciás, igual, nun haiga tanto fatu falando en castellán,

por pensase aldeanu nuna gran ciudá.

Ayeri vite pela cai

acolumbráu poles estrelles,

que salen al to pasu encesu d’iluminidá;

rellumantes güeyos murnios de sinceridá,

porque t’avergoñaren una vuelta na Universidá.

Dixisti «ye» envede «es»,

mancóte nel coral…

Metralletes son pallabres na nuestra llucha ¿llocal?

Mira fía, too ta bien,

nun hai porqué tar asina,

fala cola «o» a la fin:

«Dixo NON con dinamita»

Nel trabayu, na oficina, hasta na comisaría:

La llingua pervivie, la llingua ta viva.

Fálenla los nenos, fálenla los grandes

y hasta los banqueros

güei escriben en «bable».

Fala’l guah.e na so escuela,

nel parque nel cañicón

y hasta Areces no ermuno

fala como Gausón.

La entrada «QUICIÁS… meyor n’asturianu», de Pablo M. Testa se publicó primero en Formientu.

La métrica y les sos llendes… son como los númberos y el contornu
d’un marcu inesistente.
Dexa llibre.
La poesía constrúise dende’l sentir y el suañar,
y eso nin tien métrica, nin tien llendes.

Nun afayaréis nesti poemariu una métrica o rima
que siga les normes de la poesía rítmica de siempres.

Fadrá esparros y blagos que mos gabitarán n’achisbar
la gueta d’un suañu estrañu.

¡Bisarma, esconsona! Espierta, esconsona. Llibera la
Fantasía
d’escribir
como te pete.

Retruca y siente. Entruga, ñega o asiente.

Pero dexa llibre.

Tanto falar de frayar cadenes… y estropiamos l’arte
poniendo-y marcos y rexes. Muries y verxes.

¡Bisarma, esconsona! Esconsona anguaño. Llibera la
Fantasía
d’escribir
como te pete.

Faigamos.

La entrada «Poesía llibre», de Pablo M. Testa se publicó primero en Formientu.

Xacíu, qué pallabra perguapa, xacíu. Y xeitu que vien a la fin a dicir lo mesmo; mesmamente eso: qué guapes son les pallabres. Una pallabra, esencia, si hai esencies, de la llingua. Y llingua, qué pallabra más ablucante cuando denoma un músculu que facilita la sonoridá la pallabra. La pallabra que se torna “visible”, móvil, pero tamién coles sos llendes… la pallabra. Como la pallabra qu’a vegaes, como too, imperfecha, nun aporta tresmitir lo que se talanta, lo que les semeyes del nuesu talantar arrepresenten.

La pallabra, intento de compartir lo más animal qu’esiste, lo más “enceso” qu’esiste, que ye eso, talantar.

Qué guapos son los sones qu’algamamos conxugando lletres; idegues d’un son sedríen, entós, les pallabres. La lletra, el son, la pallabra. La música que ye falar, como falar ye facer música. Llingües toes guapes, estrutures denomaes llóxiques, estrutures d’axeitar pallabres. Too ye andecha y sofitu nes pallabres, nes llingües… Pero qué mal les usamos.

Qué guapa ye la llingua, consensu de falar d’un pueblu. Murnia, sicasí, por ver cómo muerre la de nueso, viendo como muerre a la empar, el que la fala…

La entrada «A vegaes», de Pablo M. Testa se publicó primero en Formientu.

Xiblíos que xurden d’embaxo la tierra;
xiblíos amargoxos, buxos, con llerza;
xiblíos que cancien nos montes, na viesca;
xiblíos que remembren el son de la griesca.

Xiblíos empoxaos nel fondu la hestoria;
xiblíos asitiaos na murnia memoria;
xiblíos tapecíos pol escaezu l’angustia;
xiblíos que cancallen el xeitu la dubia.

Xiblantes xiblíos del vientu nordés;
ente peñes, cordales y orbayu cheiriento;
güel y esmolez la carne muerto;
de les mentes xiblantes que faen xorrecer.

La entrada «Xiblíos de los escaecíos», de Pablo M. Testa se publicó primero en Formientu.

Nun ye que tengas la meyor lluna, la meyor estrella, o’l meyor sol.
Que los tos montes y cordales seyan verdes.
Nun ye que seyas más guapa, más encesa, más gayaspera…
Simplemente yes tu.

Tu esbilles qué ponete, qué escuchar, qué facer, qué dicir,
qué glayar, en qué momentu;
tu espardes lo que nagües, lo que pruyes, polo que puxes.
Simplemente, cada tu yes tu.

Asina, si daquién te manda, t’unvia esllava, t’entafarra;
si daquién t’ordena, te diz y t’axeita,
ensin que tu, por ser tu, lo aceutes…
Entós, collacia, fuxi, cuerri, dixebra la caleya que te xunce.

Si españa… qu’españe.

La entrada «Sonadía Llibre», de Pablo M. Testa se publicó primero en Formientu.

Retáyente’l cuerpu:
Retáyente les oreyes, la llingua, les manes, los brazos, les piernes.
Faen posar los tos pulmones, tayen el pasu’l llíquidu pelos tos reñones.
Apaguen la to tiesta. Estrapayen el to cadarma, yá ermu.

Nun aliendes, magar que daquién lo fai.
Nun xintes, ca nun nagües por facelo.
Nun glayes… lo suficiente.
Nun talantes, yá nun sabes, nun sabemos qué ye talantar.

Retayen hasta les nales de los paxarinos que siempres canciaron sele;
nun tienen, nin enantes teníen, la posibilidá de facelo fuerte.
La brenga’l so són podría frayar la so xorra, y abrir la so mente.

Retayen el ruxir del mar escontra les muries del monte,
Retayen los praos y afuraquen la tierra como si fuere sable.
Nun dexen pasar la to vida peles tos manes.
Tas sola, nun hai xente asgaya que t’acompangue.

Ximelguen les agües polos barcos xigantes que suquen los tos mares,
esfocen, como gochos xabaces, les tos posibilidaes de xida,
siempres que nagües por avanzar, te frenen.

Necesites daquién que t’emburrie,
pero nun hai yá xente a embute… que t’acompangue.

La entrada «De tayos, retayos y muries», de Pablo M. Testa se publicó primero en Formientu.