Sígote cola mirada,

namás que dan les once,

esperando que faigas

lo mesmo de siempre.

Lo mesmo qu’ayeri,

lo mesmo que la selmana pasada,

lo mesmo que’l mes pasáu…

Lo mesmo de siempre.

Véote sentada

nun taburete de la barra,

falando col camareru.

Escribo una raya horizontal

na paré y

zarro los güeyos.

Nun sé lo que tardo

en vete del

otru llau del cristal.

Otra mañana más,

y yá van

setecientes setenta y cinco,

pides el café pa llevar.

La entrada «Almuerzu», de Xurde Fernández se publicó primero en Formientu.

Na nueche,

entá se reflexen

nel espeyu

les mios goyeres hinchaes;

quiciabes, de tanto pensar.

Pálpoles cuasi eternamente;

hasta que la lluna entama a

desapaecer.

Vístome y salgo a la cai

esperando que’l día

me lleve lloñe

de mí.

La entrada «Goyeres», de Xurde Fernández se publicó primero en Formientu.