La plataforma lliteraria Formientu.com y Cuatro Gotes Producciones, entregaron los premios del I Concursu de curtiumetraxe n’asturianu y gallego-asturianu Formientu, la selmana pasada en Xixón. El xuráu tuvo formáu por Pablo A. Quiroga, d’Algamar Producciones, los codirectores de Formientu, Claudia Elena Menéndez y Diego Solís, y el director de Cuatro Gotes Producciones, Inaciu Galán.

Puedes sentir la entrevista nel dial de la RPA o en https://www.rtpa.es/rpa-radio.

La entrada Los ganadores del I Concursu Formientu de guiones de curtiumetraxe na RPA se publicó primero en Formientu.

La plataforma lliteraria Formientu.com y Cuatro Gotes Producciones, entregaron los premios del I Concursu de curtiumetraxe n’asturianu y gallego-asturianu Formientu, convocáu como parte de les actividaes entamaes nel #FormientuEnCasaFest. Nel actu, que tuvo una dimensiones reducíes pola mor de la situación sanitaria, cuntó cola presencia del xuráu del premiu, formáu por Pablo A. Quiroga, d’Algamar Producciones, los codirectores de Formientu, Claudia Elena Menéndez y Diego Solís, y el director de Cuatro Gotes Producciones, Inaciu Galán.

Diego Solís abrió l’actu felicitando a los ganadores y celebrando la bona participacion. Pablo A. Quiroga ya Inaciu Galán participaron dempués felicitando tamién a los ganadores y esplicando la so intención de buscar fórmules pa poder llevar a la pantalla los guiones de curtiumetraxe ganadores.

El xuráu entregó los diplomes y los premios a Fernando de Luxán pol testu “De cuando l’agua”, primer premiu, y a Lluis Rodrigo Menéndez por “Guetando a María García”, como segundu premiu. Dambos dos agradecieron el premiu y la iniciativa a los organizadores.

L’actu d’entrega tuvo llugar el sábadu 25 de xunetu nes instalaciones de Cuatro Gotes Producciones, nel barriu L’Arena de Xixón.

Fernando de Luxán (Madrid, 1985)

Nietu y bisnietu de cineastes, criáu na aldea de Porrúa. Vive a caballu ente Asturies y Madrid. Ye actor y guionista, llicenciáu n’Arte Dramáticu pola ESAD de Xixón. Actuó en llargumetraxes como “Gente en sitios”, “Biografía de un bebé”, series como “Capítulo 0”, y montaxes como “Iphigenia” de Producciones Nun Tris, compaxinando esti llabor cola escritura.

Como dramaturgu, destaca’l so trabayu en “Dark Smile” (2018-2019), un montaxe de teatru inmersivu, producíu por Madrid Destino embaxo la dirección de Rubén Cano. Dientro del circuitu alternativu estrenó obres como “Carnaval Barroco” (Festival de Santanyi,2.014) o “Desintoxicación healthy” (Microteatro por Dineru, 2.018). Escribió curtiumetraxes como “Otra partida” (Finalista nel I Festival de Almendralejo, 2.009) y “Nictofobia”(Estrenáu en Macabre Filme Festival y Zinema Zombie Fest, 2.015).

Apocayá coescribió un llargumetraxe de ciencia ficción en llingua inglesa, que ta en fase de financiamientu. “De cuando l’agua” ye’l so primer guión n’asturianu.

Lluis Rodrigo Menéndez (Méxicu, 1984) Llicenciáu en Drechu y Máster n’Alministración d’Empreses. Anguaño trabaya nuna empresa de Prevención de Riesgos Llaborales en Xixón y fai voluntariáu na Cruz Roxa d’Avilés. Ta trabayando nun guion de llargumetraxe n’asturianu.

Semeyes: Jennifer Berrocal.

La entrada Formientu entregó los premios del I Concursu de guión curtiumetraxe en Xixón se publicó primero en Formientu.

La plataforma lliteraria Formientu.com y Cuatro Gotes Producciones, van entregar los premios del I Concursu de curtiumetraxe n’asturianu y gallego-asturianu Formientu. Esti concursu convocóse como parte de les actividaes entamaes nel #FormientuEnCasaFest y cuntó con una abondante participación.

El xuráu, tres poner en valir la calidá de los trabayos recibíos, decidió conceder el 1er premiu del I Concursu de Guión de curtiumetraxe Formientu al testu tituláu “De cuando l’agua” que resultó ser obra de Fernando de Luxán. El segundu premiu foi pal testu “Guetando a María García” que ye obra de Lluis Rodrigo Menéndez Menéndez.

L’actu d’entrega va tener llugar el sábadu 25 de xunetu a les 19:30 nes instalaciones de Cuatro Gotes Producciones, nel baxu númberu 51 de la cai Emilio Tuya de Xixón. L’actu va tar llindáu a los ganadores del concursu y el xuráu, cumpliendo toles midíes de seguranza establecíes.

Acta del Xuráu del I Concursu de guión de curtiumetraxe Formientu

La entrada Formientu entrega esti sábadu los premios del I Concursu de curtiumetraxe se publicó primero en Formientu.

El domingu pasáu Inaciu Galán y Diego Solís, coordinadores del #FormientuEnCasaFest, pesllaron esti ciclu cultural qu’entamaba la plataforma lliteraria Formientu.com el 18 de marzu y que cuntó con cuatro foles d’actividaes de forma ininterrumpida.

Los coordinadores del festival quixeron aprovechar la última actividá pa pesllar estos dos meses d’actividaes dende casa faciendo balance de les actividaes y de los oxetivos cumplíos y pendientes pa la cultura asturiana.

Pa Inaciu Galán esti festival “permitió demostrar la Bayura d’actividaes creatives qu’ufre l’ámbitu de la cultura asturiana que s’espresa n’asturianu”. Pa Diego Solís esta inciativa “ha sirvinos pa reflexonar sobre les oportunidaes qué mos dan les tecnoloxíes y que quiciabes nun tuviéremos aprovechando abondo enantes d’esta situación”.

Nel actu virtual diéronse tamién les cifre d’audencia del #FormientuEnCasaFest, que sumó más de 100.000 visualizaciones y alredor de 1.500 siguidores nuevos nes redes de @Formientu. En total el ciclu organizó 62 actos nos que participaron 26 muyeres y 34 homes de toles xeneraciones, anque con mayor presencia de la mocedá. Ente les actividaes, pensaes dende una visión amplia de la cultura y tocando otros ámbitos de forma tresversal, tuvieron 13 conciertos, 30 charres, 11 recitales lliterarios y presentaciones de llibros, 4 cuentacuentos pa la reciella y 3 talleres lliterarios.

Los actos tuvieron tamién la intención de representar a tolos territorios onde se fala asturianu o asturllionés. Asina, participaron persones del mundu la cultura, non solo d’Asturies, tamién de Llión, Cantabria y Miranda del Douru, el territoriu portugués col que compartimos llingua.

“Estos eventos fueron posibles gracies a l’arragoncia de les más de 60 persones del mundu de la cultura d’Asturies que participaron de forma altruista col envís de da-y difuisión a la cultura y a la llingua asturiana”, esplicó Inaciu Galán, que remató l’actividá lleendo los nomes de toles persones participantes como reconocimientu y agradecimientu.     

Amás, dientro del contestu del #FormientuEnCasaFest organizóse un concursu de guión cinematográficu n’asturianu y gallego-asturianu, tres la charra-taller de Pablo A. Quiroga sobre esta cuestión. Tien abiertu’l plazu hasta’l 15 de xunu. Les bases completes tán na páxina de Formientu.

Ufrímoste’l videu completu del balance final del #FormientuEnCasaFest con Diego Solís Lletres & Inaciu Galán, coordinadores d’esti ciclu de más de 60 díes en cuarentena.

La entrada El #FormientuEnCasaFest remató con 100.000 espectadores y más de 60 actos dende casa se publicó primero en Formientu.

La entrada Videu: Balance final del #FormientuEnCasaFest con Diego Solís Lletres & Inaciu Galán se publicó primero en Formientu.

La entrada Videu: Pablo A. Quiroga falando de cómo facer un guión de curtiumetraxe nel #FormientuEnCasaFest se publicó primero en Formientu.