Pelayo Olái (Llangréu, 1997), ta en plena promoción del que ye’l so primer llibru: Fuxir. Trátase d’una obra formada por rellatos, escritos mientres l’andanciu del COVID-19. La pallabra que sirve como filu pa caminar d’ún a otru. Fuxir. ¿De qué? La razón qu’esplica estes fueyes, estes narraciones curties, ye tan personal como’l tiempu, l’esfuerciu y el ciñu que dediqué a caúna de les cincuenta y dos hestories que completen esta obra. El Proyectu 52 rellatos —títulu secu (ya) inicial— llegó al cume con ésitu. Y, dos años depués, escribir forma parte otra vuelta de l’allegría cotidiana. El problema sigue presente, anque nun-y quede malapenes fuercia. Nun se pue baxar la guardia, el xiblíu arbitral tovía nun sonó, pero yá se nota l’aliendu de la victoria.
Como escritor qu’entamó’l so camín d’espublización na revista lliteraria Formientu, falamos posao con él.
¿Consideres que perder el vezu d’escribir complicó la redacción d’estos relatos?
Paezme que sí. Cuando entamo con esti retu de crear un rellatu cada selmana, llevaba dellos meses ensin escribir malapenes nada. Tantu tiempu ensin sentar delantre’l papel o l’ordenador nótase. Nos primeros rellatos, alcuérdome que me costaba abondo filar una fras con otra, atopar una pallabra que me prestara, saber de qué manera escomenzar… Escribir nun dexa de ser como cualesquier otra actividá: si tas un añu ensin salir en bicicleta, les pates van protestar a esgaya a poco que montes la siguiente vegada. Pues cola escritura asocede dalgo asemeyao.
¿Sientes que’l llibru sirvió como terapia, amás de como realcuentru cola lliteratura?
Sí que tengo esa sensación. Véolo mui nidio nos rellatos más duros, nos que resulten más murnios. Esos testos escríbolos en momentos más complicaos, nesos díes en que paez que toles puertes tán trancaes y nun esiste una salida dable. Plasmar eses hestories nel papel ayudóme a espulsar sentimientos negativos, a llevar d’otra manera eses xornaes abegoses. Amás, abúltame que’l propiu actu d’escribir pue sirvir -y a mi sirvióme- como terapia: ayuda a poner la tiesta n’orde, a dar forma a les idees, a nun pensar tanto na realidá que nos arrodia. Escribir ye, como se diz na sinopsis del llibru, una manera de fuxir.
¿Qué reflexón o sentimientu esperes tresmitir col llibru?
El mensaxe fonderu del llibru creo que ye la rellación de necesidá que les persones tenemos pa cola cultura en xeneral y pa cola lliteratura en particular. Lleer -y tamién escribir- danos la oportunidá de vivir otres realidaes, d’andar per caminos que nun son los nuestros. La lliteratura ye, amás d’un arte, un conxuntu d’universos infinitos que s’abren énte nós.
Amás de la lliteratura, ¿hai dalguna otra pasión que pudiera influyir nel procesu d’escritura de Fuxir?
Eses otres pasiones que tengo y que probablemente influyan nel procesu de creación de Fuxir puen atopase en dellos de los rellatos. Temes como’l deporte, la crítica política y social, la hestoria y tamién la fantasía tán presentes en munchos testos de los que formen el llibru: son temes que m’interesen, que me presten y que m’emburrien a escribir. El mesmu procesu d’escritura, protagonista en dalgún de los rellatos, pue citase tamién nesa retafila.
¿Inspirástite en más persones pa los relatos o ye dafechu personal?
Nun me paez incompatible: el llibru ye personal dafechu, l’autor de los testos soi yo y dalgunos d’ellos puen basase n’esperiencies propies o na visión particular que tengo sobre esperiencies ayenes. Sicasí, dalgunos de los rellatos surden gracies a hestories o anécdotes que me lleguen d’otres persones; sobre manera de mio güela, que lleva bien d’años regalándome -ensin decatase- milenta idees pa escribir.
¿Qué diríes a posibles llectores p’animalos a lleer la to obra?
Siempre digo lo mesmo cuando dalguna persona m’entruga si-y va prestar el llibru. Fuxir ye un conxuntu de 52 rellatos: ye imposible que nun te preste dalgún.
Un poco más en serio, paezme que la persona que llea esti llibru va atopar rellatos de tou tipu, con temes y estilos diferentes, con daqué d’humor y tamién con un tonu más murniu. Fuxir defínese pola so variedá y paezme qu’esti ye ún de los puntos fuertes del llibru.
¿Cómo afronta un autor mozu publicar per primer vez na literatura asturiana?
Siendo sinceru, véolo cuasi como un premiu. Cuando entamé a escribir esi primer rellatu nun imaxinaba que, tres años depués, diba tener ente les manes un llibru completu. Un desafíu personal acabó tresformándose nuna obra lliteraria. Poro, pa mi Fuxir aseméyase a un regalu. Tamién hai dalgo de presión, sí; pero gana la ilusión.
Les tos primeres publicaciones fueron en Formientu. ¿Cómo ayuda a la xente mozo esta plataforma?
Formientu nun ye namás un puntu d’alcuentru ente escritores mozos d’edaes y llugares estremaos, ye tamién una oportunidá. Anque entiendo que la mayor parte de les persones qu’escribimos nun lo facemos por agradar a naide, sinón porque esfrutamos al facelo, espublizar nuna plataforma como Formientu permite dar esi primer pasu – dacuando tan difícil- nel mundu editorial. Iniciatives como Formientu ayuden a xenerar autoestima y enfotase nún mesmu o nuna mesma, a ganar seguranza a la hora de presentar un testu a un concursu o d’unviar un proyectu a una editorial.
