El Grupu Epona, dedicáu, sobre too, a los cuentacuentos y dibuxos ilustrativos pa los cuentos de los más mozos, pon a disposición trés llibros de llibre descarga pa pasar unes bones tardes arrodiaos de llectures perguapes tanto pa los y les más moces como p’adultos. Los trés llibros son:
–Mitoloxía pa la reciella, un volume de cuentos ilustráu que recueye doce personaxes mitolóxicos con cantares y refranes. Amás, nel cabu’l llibru atópense delles actividaes rellacionaes colos cuentos pa entretener a la reciella depués de terminar de lleer.
–Llara quier ser astrónoma, un rellatu xuvenil del 2011 nel que Llara nagua por estudiar los astros y l’universu, esi llugar tan desconocíu y tan misteriosu que nos fai imaxinar coses inimaxinables. Ensin dulda, una buena opción pa pasar un ratín agradable ente les páxines d’un pdf.
–Poética de muyeres, una antoloxía de 2014 que recueye poemes de muyeres que nun nos dexará indiferente. Dende autores noveles, hasta muyeres más reconocíes nel ámbitu poéticu asturianu. Dende l’occidente del país hasta l’oriente, pasando per toles llingües d’Asturies.
Amás d’estos trés llibrinos, podemos atopar na páxina web los enllaces a los cuentos colos que costumen a entrener a la reciella, recoyíos nun volume de 2003 tituláu Cuentos pa que suañes. Estos tarán disponibles ensin baldre, polo que, cuando termines de lleeles los cuentinos anteriores a los fiyos, podrás cuntar con estos otros pa entretenelos durante un tiempu y qu’escaezan les llimitaciones de movimientu na cai. ¿Qué meyor qu’imaxinar?
