La ventésima sesta edición del Premiu Xuan María Acebal de poesía n’asturianu recayó nel escritor l.lenizu Alejandro Fernández-Osorio pola obra Tayu.
Nel acta del fallu, el xuráu resume la temática central del poemariu y destaca “cómo la voz del nietu revisita les vivencies de la mina con una visión social y política, pero al empar íntima y novedosa, de quien se siente heriede d’una tradición que pesa nel entornu familiar, pero qu’en realidá yá nun existe pa quien escribe dende otra esperiencia, la de la emigración”.
El xuráu d’esta edición tuvo presidíu pol director xeneral de Política Llingüística, Antón García, y integráu poles poetes Raquel F. Menéndez, Esther Prieto y Alba González Sanz, l’especialista en Llingua Asturiana Adrián Martínez Expósito, y el tamién poeta y ganador del Xuan María Acebal del añu pasáu, Gonzalo González Barreñada. Actuó como secretariu Xosé Miguel Suárez, filólogu de la Dirección Xeneral de Política Llingüística.
Alejandro Fernández-Osorio (Vil.layana, L.lena, 1984) ye psicólogu y escritor. Tien publicaos los llibros de poemes Frontería(2011) y Magaya (2015), amás de la novela JC (2016), obres poles que-y concedieron los premios Asturies Xoven de poesía y narrativa, y el premiu de la Crítica d’Asturies de poesía n’asturianu. Fernández-Osorio collaboró en publicaciones culturales como Clarín, Cuaderno de lluvia, Koult, El cuaderno y Oculta lit.
El premiu Xuan María Acebal, convocáu pola Conseyería de Cultura, Política Llingüística y Turismo, ta dotáu con 5.000 euros.
