El festival POEX vuelve un añu más a convertir Xixón nel centru del universu poéticu asturianu. Esta VII edición del POEX, el mayor alcuentru anual de poesía n’Asturies, que cunta col sofitu de la Fundación Municipal de Cultura de Xixón, va tener llugar del 12 al 21 de marzu en delles llocalizaciones de la ciudá cola traducción como tema central col sotítulu «Lost in translation». La referencia a la película de Sofía Coppola convida a superar la idea de la traducción como perda o cambéu, pa pensar l’actu mesmu de traducir como ponte y tránsitu ente dos llugares, dos idiomes, afondando nel espaciu poéticu que s’abre nel procesu. Pero la propuesta d’esta edición nun se llimita a la traducción y la programación inclúi actos d’homenaxe a dos autores imprescindibles pa la cultura asturiana que finaron el pasáu 2025: Javier García Rodríguez y Xuan Bello.
La organización plantega una propuesta qu’esparde la so rede per tola ciudá de Xixón, allugando’l so centru principal d’actividaes nel Centru de Cultura Antiguu Institutu (CCAI), ensin dexar de llevar dellos eventos a otros espacios tan estremaos como la Escuela de Comercio, el Teatru Xovellanos, l’IES Universidá Llaboral, les instalaciones de la Llaboral Centru d’Arte, la llibrería-café Toma 3 o varies sedes de la Rede Municipal de Biblioteques de Xixón.
Programación: ‘Lost in translation’ p’atopase na poesía
Esta VII edición del POEX presenta una programación variada qu’inclúi dellos actos dedicaos a la poesía n’asturianu, mesmo atendiendo a obres escrites nel nuesu idioma qu’a traducciones d’otres llingües. Nestos eventos inclúinse alcuentros con figures como Daniel García Granda, Jordi Doce, Martín López-Vega, Olvido García Valdés o Miguel Casado, que van falar de les sos esperiencies traduciendo obres estranxeres. Tamién va haber delles presentaciones de llibros y recitales espardíos mientres los nueve díes de festival, figurando ente ellos eventos al cargu de poetes como Sofía Castañón, Xaime Martínez, Patricia Suárez, Diego Solís, MAría F. Abril, Miriam Reyes, Elsa Moreno, Gonçalo M. Tavares, Nicole Brezin y Lauren Mendinueta, ente otres munches.
Homenaxes: Javier García Rodríguez y Xuan Bello
L’añu 2025 dexónos güérfanos de varios autores que finaron prematuramente. Nesta VII edición del POEX va haber espaciu pa dos d’ellos, dos autores d’espíritu poéticu y fuerte enclín culturalista, dos figures bien distintes y dambes imprescindibles dientro del ecosistema cultural asturianu.
Javier García Rodríguez, conocíu pol so amor incondicional pola lliteratura en toles sos formes, foi un home de cultura nel sentíu más ampliu. De verbu áxil, irónicu y cargáu d’humor, tuvo venceyáu, ente otres instituciones y proyectos, a UNIOVI (onde impartía clases de Teoría de la Lliteratura y Lliteratura Comparada, coordinaba’l minor en comunicación y dirixía’l grupu d’investigación “Técniques d’inscripción social de la ficción y la teoría (SATISFICTEO)” y al Centru Niemeyer (onde dirixía’l Ciclu Pallabra).
El sábadu 21 a les 12.00 h nel Patiu del CCAI van dase cita una selección d’amigos y amigues del autor nun recital poéticu qu’amestará la llectura de creaciones propies y pieces del homenaxáu.
Xuan Bello foi y sigue siendo ún de los autores más internacionales de la lliteratura n’asturianu, en gran midida pola mor de la so conexón cola lliteratura portuguesa, pero tamién pol so dinamismu y espíritu emprendedor, que lu llevaron a participar en dellos proyectos lliterarios dientro y fuera del territoriu. El reconocimientu fuera d’Asturies llegó-y cola traducción al castellán de la so Hestoria universal de Paniceiros, obra que punxo, a munchos efectos, la creación n’asturianu nel mapa lliterariu de miles de llectores castellanufalantes gracies a que recibió’l premiu Ramón Gómez de la Serna. Miembru correspondiente de l’Academia de Llingua Asturiana (ALLA), reconocióselu tamién col I Premiu Nacional de Lliteratura Asturiana en 2017 y foi partícipe de la vida lliteraria del país hasta’l so aliendu caberu.
El sábadu 14 a les 12.00 h va pagáse-y homenaxe nel Salón d’Actos del CCAI cola proyección d’una pieza audiovisual creada pol Atenéu Obreru de Xixón nun eventu que refier una de sos les pieces poétiques más conocíes, «A la solombra d’una zrezal».
Festexamos 20 años de Formientu
Amás de tolo mencionao anteriormente, nesta casa tamién vamos cuntar con un espaciu pa festexar la poesía. En Formientu, mesmo na versión dixital que na revista en papel, siempres dedicamos una parte importante de los nuestros esfuercios a sofitar la creación poética y el so espardimientu. Esta VII edición del POEX inclúi un actu conmemorativu pol 20 aniversariu de Formientu: revista de lliteratura mui moza, con una mesa reonda na que les persones que dirixeron la revista mientres estes dos décades van aldericar sobre la so trayectoria y el futuru d’esta publicación. Claudia Elena Menéndez, Inaciu Galán, Diego Solís y Raúl Alonso van xuntase pa falar de Formientu nun actu que va moderar Marta Mori el domingu 15 a les 12.00 h nel Patiu del CCAI.
Averáivos a esta VII edición del POEX. Averáivos a descubrir, de la mano d’autores y traductores, los espacios y puertes qu’abre la traducción lliteraria nel ámbitu de la poesía y que sirven pa tender pontes ente persones, obres y cultures; averáivos a descubrir la obra d’autores nuevos y remembrar la que dexaron n’heriedu otros que yá nun tán; averáivos a festexar l’aniversariu d’esti proyectu de lliteratura mui moza que ye Formientu (¡anque’l proyectu nun sía yá tan mozu!); averáivos a participar d’esti festival de la poesía en toles sos dimensiones, porqu’esi ye l’oxetivu central del POEX: festexar, esfrutar y vivir la poesía.
La ufierta d’actos, que puede vese nel programa de mano, complétase con llectures colectives, talleres, música, teatru y una amuesa de les obres seleccionaes nel V Concursu de Videopoemes POEX y la entrega del premiu a la propuesta ganadora.
