Salaberría va presentar la so novela “Los días se hacen solos” aprovechando la estancia
Sigue l’actividá na Residencia Lliteraria Xixón con una segunda residente en 2025, la escritora vasca Garbiñe Salaberría, que va facer una estancia na mesma pa trabayar nos sos proyectos lliterarios. La so presencia va sirvir tamién pa presentar y promocionar la so última novela “Los díes se hacen solos”, editada por Íbera.
Dientro de la so estancia va celebrase un actu de presentación de la obra. L’actu celebraráse’l xueves 30 de xineru a les 20 hores na Llibrería de bolsillo de Xixón y va consistir nuna conversación ente l’autora ya Inaciu Galán, director de la Residencia Lliteraria Xixón.
L’autora
Garbiñe Salaberría nació en Bizkaia. Ye escritora, doctora en Socioloxía pola Universidá del País Vascu y titulada en Xestión d’Empreses y Organizaciones Culturales pol Institutu Complutense de Ciencies Musicales. Especializada na investigación de la ética na lliteratura, n’identificar los indicadores y les formes qu’adopta, los valores predominantes, los criterios d’escoyeta, les motivaciones, los percorríos morales, les imáxenes del mundu, les aspiraciones étiques, les problemátiques morales y los contestos sociales nos que s’enmarquen. Creó una empresa de servicios culturales dedicada al diseñu y xestión de diversos proyectos y programes rellacionaos col llibru, la llectura, la escritura y la dinamización de recursos. En 2014 recibió’l Premiu NACIONAL FUNDACIÓN GSD D’INNOVACIÓN EDUCATIVA y el premiu CERTAME BONES PRÁCTIQUES convocáu por UNICEF. Como ensayista publicó “La construcción narrativa de la ética” (Sieglu XXI) y “El diálogo de las creencias” (LaOficina) Coautora.
Como narradora publicó cinco obres de lliteratura infantil y xuvenil: “Sietelenguas el dragón y la pequeña Eider” (Mensajero), “Zazpimintzo herensugea eta Eider ederra” (Gero), “Mugaz haraindiko itxasoak” (Gero), “Holaxe gauzak dira!” (Desclée de Brouwer) y “Mario eta txori zuriak” (Gero). La so novela pa adultos “Los días se hacen solos” foi espublizada pola Editorial Íbera (2024).
Llogró residencia d’escritura n’Almería (Fundación Valparaíso). Trabayó al empar la escritura, la docencia, la investigación y la xestión cultural. Anguaño dedícase n’esclusiva a la escritura y trabaya nuna novela nueva.
Residencia Lliteraria Xixón
L’escritor y xestor cultural Inaciu Galán vivió nesti espaciu a lo llargo de cuasi una década y en 2023 punxo a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a dellos escritores y traductores con proyectos de creación.