A esta convocatoria pue presentase cualquier persona mayor de 16 años residente nel estáu español y que pueda asistir a la entrega de premios en casu de ser nomada vencedora, que se va celebrar previsiblemente’l 1 d’abril, dientro de la XXVI Selmana Cultural de Sariegu qu’organiza’l conceyu. Amás, cada participante pue presentar un máximu de dos obres, les cuales nun han pasar de les 200 pallabres y han ser orixinales ya inédites. La temática de los microrrellatos ye llibre.

La entrega de los trabayos ha realizase al traviés del corréu lletrónicu a la dirección oijnava@comarcadelasidra.com indicando nel asuntu «Microrrellatu La Sariega» onde han tar axuntos dos documentos. En primer llugar, el rellatu ensin nome d’autor y col so títulu en formatu pdf. En segundu llugar, otru documentu en formatu PDF colos datos d’autoría de la obra. Nel casu de presentar dos obres, va haber que facelo en dos mensaxes diferentes col envís d’evitar confusiones.

Puedes consultar les bases completes del concursu equí.

La entrada Sariegu convoca’l IV Concursu de Microrrellatos La Sariega se publicó primero en Formientu.

Van poder presentase obres n’asturianu que nun superen los dos minutos de duración y que cumplan les bases, como’l respetu de derechos d’autor o la temática, que nesti casu ye llibre.

La entrada POEX convoca’l II Concursu de Vídeopoemes se publicó primero en Formientu.

El concursu institúise con un total de 3 premios (primeru, segundu y terceru) dotaos con un llote de llibros n’asturianu. El testu tien que tar venceyáu a la muyer y tar en rellación cola so importancia pal caltenimiento de la llingua asturiana, dende cualesquier perspectiva, seya reivindicativa o d’apegu.

Los trabayos han ser inéditos y orixinales, escritos en llingua asturiana o en gallego-asturianu, en prosa o versu y tienen que tener como máximu 280 caracteres y han d’enviase a info@iniciativapolasturianu.org en formatu PDF. La participación del concursu entama’l 8 de marzu a les 00:00 hores y fina’l 21 de marzu a les 12:00 hores. Les obres premiaies van dase a conocer el día 31 de marzu a les 12 hores, al traviés de la páxina web d’Iniciativa pol Asturianu (www.iniciativapolasturianu.org). El xuráu tará compuestu por diferentes personalidaes, asina como por dellos miembros d’Iniciativa pol Asturianu. La entrega de premios va facese’l nun día por determina nos espacios del Conseyu de la Mocedá de Xixón (Avenida de Manuel Llaneza, 68, baxo, Xixón 33208)

Iniciativa pol Asturianu anima a la sociedá asturiana a participar nesti concursu como homenaxe a toles muyeres que nos arrodien y a les que gracies a elles deprendimos asturianu.

La entrada Iniciativa pol Asturianu convoca’l concursu «Ensin muyeres nun hai idioma» pol 8M se publicó primero en Formientu.

El concursu celebróse’l martes 8 de mayu a les siete la tarde na Sala Borrón d’Uviéu y premió al meyor rellatu creáu en venti minutos y tres d’una inspiración que l’escritor, miembru del xuráu y presentador del actu, Dolfo Camilo Díaz, sacó d’ente delles d’una bolsa. La fras d’inspiración d’esti añu foi de Groucho Marx y dicía «Hai tantes coses na vida más importantes que les perres, pero cuesten tanto». Nel xuráu tuvieron tamién miembros de les instituciones convocantes, asina como la escritora y editora Esther Prieto.

Tres venti minutos pa la escritura, lleéronse los testos de los diez participantes y el xuráu aconceyó pa tomar una decisión. El ganador resultó Inaciu Galán, pol testu «Una vida de luxu». En segundu llugar tuvo Ánxela Gómez y en tercer puestu Claudia Gutiérrez Lueje. Darréu entregáronse los premios, consistentes en dellos llotes de llibros. Amás, el primer premiáu va formar parte del xuráu del concursu lliterariu Asturies Xoven na edición d’esti añu.

1er Premiu
Una vida de luxu
Vivimos na cai más esclusiva de la ciudá, arrodiaos de perres, rellacionándomos cola xente más elegante y con tol tiempu llibre pa les nueses aficiones: la música clásica, la lliteratura, la contemplación, les llargues conversaciones….
Tu y yo, Lluna, equí somos felices. Yo sorriendo, tu moviendo’l rau tol día y llambiendo tantu zapatu bonu. ¿Qué más podemos pidi-y a la vida, Llunina?
Quiciabes, ye verdá, nun tener de madrugar tanto cuando abren la sucursal y tenemos d’apartar el xergón, los cartones y el nuesu carrín del super llenu tratos, pa que pase’l director del bancu.

Inaciu Galán (Xixón, 1986) ye periodista, profesor, xestor cultural y activista en defensa de los drechos llingüísticos, al frente d’Iniciativa pol Asturianu. La so obra ta espardida per revistes como Lliteratura o Formientu, que fundó y dirixó hasta 2017, asina como en volúmenes colectivos. Fíxose con más d’una trentena de premios y ye autor d’obres como’l Diccionariu asturianu-inglés/inglés-asturianu, el llibru infantil Nel, el coríu que nun sabía nalar y los poemarios Tierra podre, Patria en pallabres menores y Nes ruines de la nueche y les hores.

2u premiu
Camuda’l coral
-¿Hai tantes coses na vida más importantes que les perres?- Entrugó’l pá mientres facía’l recuentu cola lluz tenue pa nun ver les poques monedes que-y quedaben.
El tiempu, enemigu fiel, camudó les verdaes incómodes en silencios ficticios; como camudó la fina piel de la so fía en tímides apaiciones de barba cada vegada más visibles.
-Vencer la llercia- respondió-y ella-, eso ye más importante.
Nun momentu, el mio amor por ella convirtióse pa siempre nel mio amor por él. Paez que dalgunes verdaes hai que formalizales.

Ánxela Gómez d’Ávila (Avilés, 1991) tien Máster en Desarrollu y Cooperación Internacional pola Universidá del País Vascu, Llicenciada en Pedagoxía y Diplomada en Maxisteriu pola Universidá d’Uvieu. Segundu premiu de poesía nel XX Concursu de poemas en llingua asturiana Antonio Machado a los nueve años y segundu premiu nel concursu de Microrrelatos improvisaos n’asturianu «Entaína a escribir». Compositora y miembru nel grupu musical asturianu Filanda.

3er premiu
Qué bien me vendría un móvil nuevu curiosín. Con esta llaceria nun pueo guiame bien pel monte, el GPS nun val un res…
Taba ellí, en mediu’l Sueve, perdida, coles coraes saliéndome pela boca del estrés de nun saber pa ónde dir. Y too por culpa d’un teléfonu.
Entós, sentí un marmuriu melgueru d’agua; los paxarinos cantando músiques que nunca nun taríen en Spotify. Abrí los güeyos: vi la viesca, llena de verde, tan verde que daba vida. Y corrí. Corrí sintiendo la vida de los texos y los carbayos peles piernes, cola llibertá españando ente los deos. Y ye que, ¿sedrá verdá eso que dicen de qu’hai tantes coses na vida más importantes que les perres pero cuesta tanto alcontrales?

Claudia Gutiérrez Lueje (Cangues d’Onís, 1996) Ta graduada en Filoloxía Hispánica con minor d’asturianu na Universidá d’Uviéu y dedica’l tiempu llibre a la competición n’esquí y carreres de monte. El so día a día básase na alternanza de dos pasiones: les artes y la naturaleza, que son los dos llugares onde atopa la belleza y traten de ser una mesma cosa na so vida. La so obra lliteraria apaeció na revista Formientu.

La entrada Inaciu Galán, Ánxela Gómez y Claudia Lueje, ganadores del «Entáina a escribir» 2018 se publicó primero en Formientu.