Hai que-y dar importancia a lo que la tien y esti trabayu de Marta Mori tienla: Notes de lliteratura asturiana recopila artículos, nos más de los casos de calter académicu, qu’ameriten tar xuntos y que l’autora quier ufiertar al públicu asturianu pa facilita-y la comprensión del so mundu y de la lliteratura que lu retrata.

Marta Mori (Xixón, 1965) ye llicenciada y doctora en Filoloxía Hispánica pola Universidá d’Uviéu y miembru de númberu de l’Academia de la Llingua, de la que ye anguaño vicepresidenta. Como poeta diose a conocer nel 2002 con Pórticu, poemariu al que siguieron El tiempu de la espera (2005), L’alcordanza (2010), La mio voz (2011), Orfandá (2019) y la traducción del francés d’El cementeriu marín de Paul Valéry (2018). N’Histories familiares (2008) reunió dellos rellatos y collaboró tamién n’Hestories pa contales. Más nomes de muyer (2017), antoloxía coordinada por Paquita Suárez Coalla que recueye obra narrativa de delles escritores d’anguaño. Nel 2022 foi a ganar el Premiu «Xuan María Acebal» de Poesía con Los carreros del tiempu. Estudiosa de la llingua y la lliteratura asturianes tien publicaos dellos artículos y llibros rellacionaos con estes temátiques como Interculturalidad y diversidad lingüistica (2003), Xeres y xuegos de llingua oral (2007), Fala que fala. Llingua asturiana y lliteratura 2.u de Bachilleratu (2007) o’l capítulu correspondiente al sieglu XVIII de la Historia de la lliteratura asturiana coordinada por Miguel Ramos Corrada y editada pola Academia de la Llingua. D’hai un tiempu vien faciendo de reseñista de llibros na sección de «Cultura» del diariu La Nueva España y na revista Lliteratura, de la que ye directora.

La entrada Yá ta a la venta Notes de lliteratura asturiana, el llibru nuevu de Marta Mori se publicó primero en Formientu.

La obra ye, en palabres del propiu autor, «una reivindicación de la llingüística científica y del so papel na cultura de la sociedá»; ye, al dicir del xuráu que-y concedió’l premiu, «un manual básicu p’abrir los güeyos de cualquiera, filólogu o non, sobre la ciencia y la non-ciencia que consumimos, asimilamos y creyemos al falar de llingües nel día a día». Partiendo del fechu de que tovía güei, en plenu sieglu xxi, hai que parase a esplicar que nun hai llingües meyores qu’otres, que toes elles valen pa comunicar cualesquier conteníu o que nun existen llingües imperfectes, l’autor desenrolla toa una argumentación sobre lo qu’él llama «la deserción social» de la llingüística, que la fai ser una ciencia sin enfotu: los llingüistes nun fueron a poner enfotu bastante nin nos propios descubrimientos y conclusiones nin n’esparder y dar a conocer a la sociedá los conocimientos y descubrimientos de la so ciencia. Esa falta d’enfotu (en sen internu y esternu), esa deserción social de los llingüistes, ye lo que fai posible qu’alredor del llinguaxe humanu y de les llingües sigan creyéndose coses qu’habríen tar superaes depués d’un sieglu de llingüística científica.

Ramón d’Andrés (Madrid, 1959) ye filólogu espe­cializáu n’asturianu y profesor titular de Filoloxía Española y Asturiana na Universidá d’Uviéu. Miembru de númberu de l’Academia de la Llingua Asturiana, foi corredactor de les Normes ortográfiques y del Diccionariu de la llingua asturiana, obres d’esta institución. Miembru del RIDEA, ye tamién traductor del catalán y d’otres llingües, amás de collaborar en dellos periódicos y de desenrollar artículos divulgativos tocante al asturianu y los prexuicios que contra esta llingua perviven na sociedá asturiana.

La so obra ye estensa y diversa, venceyada sobre manera a aspectos gramaticales y sociollingüísticos del asturianu. Delles de les más importantes son: Diccionariu temáticu de la llingua asturiana (1991), Encuesta sociollingüística nuna parroquia asturiana (Deva-Xixón) (1993), Gramática práctica del asturiano (1997), Llingua y xuiciu (cola que ganó la primer vez el premiu «Máximo Fuertes Acevedo» d’Ensayu nel 1997), Cuestiones d’asturianu normativu (2001-2003), Juicios sobre la lengua asturiana. Algunas cuestiones básicas acerca del debate lingüístico en Asturias (2002), Gramática comparada de las lenguas ibéricas (2013), Estudiu de la transición llingüística na zona Eo-Navia – Atles ETLEN (2017), Averamientu a la llingua asturiana (2019) y la más nueva: Diccionariu de consultes llingüístiques del asturianu (2021).

La entrada Yá puede mercarse Una ciencia sin enfotu, de Ramón d’Andrés se publicó primero en Formientu.

Tantos años depués, De la Calle sigue los resclavos d’ónde puede tar o qué asocedió con Juan Ángel. Esto va llevalu a percorrer les ciudaes y l’acordanza, la propia y la de los que lu acompañaron naquellos años trescendentales de la historia d’España de recién, tentando d’alcontrar a un home, un artista poeta, desapaecíu. De la Calle va atopase colo que vieno llueu y, como aquello, les hestories non resueltes inflúin y condicionen el presente. Ye una narración que fala de la «xeneración bífida», una hestoria de desamparu, adicción y muerte. Un relatu de cómo les xeneraciones se pierden y los suaños, tantes vegaes, se convierten en velees. Y de cómo los verdaderos artistes y poetes finen siempre y namás queden los demás, nós.

Ángel de la Calle. Nació en 1958 en Molinillo de la Sierra (Salamanca). Vive en Xixón dende 1961. En 1977 creó’l fanzine Entamu Galacticu. Dende 1979 publicó nes revistes Star, Bésame Mucho, Rambla, Zona 84, Comix Internacional, El Víbora, Dos veces breve, Heavy Metal (USA) Tung Metal (Suecia) Fantastik (Francia). Participó nos llibros colectivos No a la guerra, Nuestra guerra civil, Nueve preguntas, O todos o ninguno. Cola so novela gráfica Modotti: una mujer del siglo XX, publicada nel 2003, foi finalista de los Premios a Meyor Guión y Meyor Obra nel Salón del Cómic de Barcelona y Premiu de la Crítica nel 2004. En Brasil recibió’l Premiu a la Sorpresa editorial de 2007, y ta traducida al griegu, alemán, francés, italianu y portugués. Nel 2017 publicó Pinturas de guerra, Premiu a Meyor Obra Española nel Salón del Cómic de Barcelona nel 2018 y Premiu de la Crítica a Meyor Obra Española. Esta obra formó parte de la selección oficial nel Salón d’Angouleme nel 2019 y foi escoyida Meyor Obra Estranxera en Brasil nel 2021. Ta traducida al italianu, griegu, portugués, francés y gallegu, y publicóse en Cuba, México y Arxentina.

La entrada Paez que nun foi ayeri, d’Ángel de la Calle, a la venta nes llibreríes se publicó primero en Formientu.

«El corazón d’una xana / ye como un ramu d’espín / cúrialu bien, chalaneru, / que nun funda pel camín». Estos versos de la canción popular Chalaneru que falen de la xana que llora na fonte La Nalona son el ñuedu d’esta novela de fantasía, tradicional, clásica y moderna al tiempu: la mitoloxía asturiana y les lleendes que la sustenten y la tresmiten de xeneración en xeneración viven y s’espeyen na vida d’Antón, d’Eli, d’Ánxel, d’Ale y de so ma; son la manda familiar a la que nun pueden renunciar. No que cinca los seres de lleenda da una visión distinta de la lliteratura y la música popular y con ella Blanca Fernández Quintana derruempe un camín nuevu pa la narrativa asturiana d’anguaño.

Blanca Fernández Quintana (Bimenes, 1994) ye graduada n’Estudios Clásicos y Románicos con Minor d’asturianu. Anguaño ye profesora nel IES Conceyu de Tinéu. Amás de diversos relatos publicaos na revista Formientu, nel 2021 publica la novela L’home les caparines (2020), y llogra’l I Premiu de Novela de fantasía, ciencia ficción y terror de la Editorial Radagast cola novela Trovadoresca (2022). Vien de ganar el XV Premiu «María Josefa Canellada» de Lliteratura Infantil y Xuvenil cola novela El cartafueyu d’Alquimia.

La entrada Yá puedes mercar No que cinca los seres de lleenda, de Blanca Fernández se publicó primero en Formientu.

Por esta razón tamos delantre d’un llibru clave na lliteratura en llingua asturiana, que recupera l’alegría popular y abre una puerta a la superación de la nostalxa estática y la señaldá de la que ficimos identidá lliteraria y cuasi antropolóxica. Col rigor llingüísticu y l’atrevimientu formal al que nos tien avezaos, Texón xuega coles sos referencies culturales y el simbolismu d’una realidá concreta pa llanzar al llector a una especiencia na que sentir, reconocese, conmovese y gozar». Alejandro Fernández-Osorio.

Pablo Texón Castañón (Felechosa, Ayer, 1977) ye poeta, narrador, traductor y articulista, amás de lletrista pa dellos grupos musicales asturianos (Dixebra, Verdasca, Toli Morilla, Alfredo González, Nacho Vegas…). Académicu correspondiente de l’Academia de la Llingua Asturiana, tien publicaos los poemarios Toles siendes (Premiu «Nené Losada Rico» 2003), La culpa y la lluz (Premiu «Teodoro Cuesta» 2006) y Allumamientu (Premiu «Xuan María Acebal» 2018). Nel 2017 publicó Media vida. Poemes y cantares, recopilación de tola so poesía hasta entós.

La entrada Cantar de ti mesma, de Pablo Texón, yá ta a la venta se publicó primero en Formientu.

La nueche na que’l violonchelista Nicolai Bostov morrió nun hotel de poca monta, la vida d’Eufrasio, Frasi pa los amigos, programador cultural d’un llugar onde manda la corrupción, va cambiar yá pa siempre. Porque como bien diz la cita de Lucio Anneo Seneca qu’abre la novela «Na adversidá convién munches vegaes tomar un camín atrevíu». Y eso ye lo que fai Frasi ente l’esbarrumbu xeneral de la so vida y de la vida de la población onde se dexa vivir y onde suaña a lo xole con marchar porque nun ye a ello.
Un muertu, una vida económica, social y de pareya en peligru; una sociedá qu’apodrez a cada minutu, onde nada ye lo que paez, nun siendo lo gris del paisaxe y del paisanaxe. Y en medio de too, aquel malditu violonchelista que discurrió en morrer cuando y onde nun había facelo. Y agora, ¿qué, Frasi?

José Ángel Gayol (Mieres del Camín, 1977) ye escritor y críticu lliterariu. Llicenciáu en Derechu y n’Antropoloxía Social y Cultural, y máster n’Historia y Análisis Sociocultural, ye autor d’otres dos noveles (Argonautes, 2007; La xeometría secreta del azar, 2020), un volume de cuentos (Los cuerpos celestes, 2021), cuatro poemarios (Los poemes del oriental, 2013; El llibru de les coses misterioses, 2013; Los suaños y los díes, 2014; Una selmana y otros díes, 2015), tres ensayos (Vértigu, 2016; El silenciu invisible, 2020; y Exercicios d’asturianu, 2016) y dos volúmenes de diarios (En primera persona, 2019, Premiu de la Crítica d’Asturies de narrativa n’asturianu; y Les mudances del tiempu, 2022). Con El llibru de les coses misterioses (2013) foi ganador del Premiu «Xuan María Acebal» de Poesía, y los sos ensayos Vértigu y El silenciu invisible foron gallardonaos col Premiu «Máximo Fuertes Acevedo» d’Ensayu nos años 2015 y 2019. Con La cafiante muerte de Nicolai Bostov ganó’l Premiu «Xosefa Xovellanos» de Novela 2021.

La entrada La cafiante muerte de Nicolai Bostov, de José Ángel Gayol, yá ta disponible nes llibreríes se publicó primero en Formientu.