Nesta tarde que mata,

ya cuasi tapecía pola nueche,

avérome al cristal que separta’l mundu

d’esta vida enforma inerte.

Yá cuasique desapaez el calicor

abellugáu nestes cuatro muries,

yá nesti cuartu nun ta la to lluz.

L’arume a besos encirraos llégame de sópitu

como un españíu d’aire,

como dalgo que quema.

Y ye cuando esti cuartu solitariu y murniu

tórnase en privilexu d’esti mundu,

que ye’l míu.

La entrada «Refuxu», de Cristina Menéndez Martín se publicó primero en Formientu.

Yeres de zucre, delles veces de sal,

caminabes sele ente les rexes

que cercaben el to xardín.

Xuntabes les manes

y tapabes los güeyos

camentando qu’asina la tristura

nun t’alcanzaba.

Yeres de papel,

yeres de fierru encesu.

Sin llendes nel alma

coles pallabres surdiendo

ente los tos llabios mancaos pol tiempu,

enllenos d’un tonu colloráu

que fraya y tapez el día.

Yeres azul cielu enllenu verde patria,

color d’un pueblu que nun muerre

nel mio corazón, nes mis vidayes.

Enxamás tuvisti lloñe,

poro, llevéte na riestra d’alcordances

siempres.

Yeres voz, yeres silenciu

nel más calorosu desiertu.

Yeres, yes y serás

la muria alzada nes vides

de los mios cimientos.

La entrada «Resquiciu de to», de Cristina Menéndez Martín se publicó primero en Formientu.

A fuera la lluz deshabitada
y el mar faciendo llastre col sable,
los güeyos enmudecíos,
la lluna ensuchando trasiegu con llercia
y coches traxinando.
Ella facía lluces de farola ensin bombiella,
y él riscar d’espertador
reclamando muries pal manancial,
ufiertando oración y mugor,
y pisaron los dioses el cielu…
picando a la puerte ufiertando esconsolancia
y xarres de tintu ensin xelu,
lluvia de cimientos,
amor escosíu de güeyos de cielu
escolingando hacia’l pechu,
sol d’esi pelo azabache
y les sos manes d’herba d’alborada
pa fumar esti amanecer
(que mos españa).

La entrada «Riscar», de Frantxu Melero se publicó primero en Formientu.

Chíscame
d’esa amnesia que precisé p’abrazar,
pa volver a querer.
Pártime
como si esti sentimientu
fuera un troquel,
ensin maña,
ensin memoria,
ensin xuxurrios…
Abrázame
a plenu pulmón,
vuélvite lloca,
(el mio mundu nunca foi cuerdu)
avanza por impulsos
suena como una orquesta
con razones ensin destreza.
Pápame
anque,
dacuando,
el mio mieu,
piense que namás sías orbayu…
pero enlléname d’esti sol
que yo nun pienso si tu sorríes.
Entrín y non
sigamos inventando daqué que surdió,
piensa
que dalgunos fabriquen equilibriu,
otros
retozamos ente reblincaes.

La entrada «Chíscame», de Frantxu Melero se publicó primero en Formientu.

Vilos mecese:

asina deprendí

qué yera l’amor.

Cuando menos movese,

nun llegar tarde

a los centímetros.

Nun necesitar a naide.

Sobramos.

Otros que merquen llámpares

y llavadores

y hasta poseyen el dineru

p’adquirir pintures

– marines o muyeres enigmátiques

y fragmentaes ensin obligaciones-

anden abandonaos.

Meches y pieles

caoba, una mínima abondancia,

chistes y vinu, nosotros.

Nosotres, turbón na mexella.

Camisetes de calores pálidos.

Arena pente los dientes.

Torpes automóviles.

El sol incinera el velu de moza

de la ñebla na playa.

Depués de quince años,

densos perfumes

nel ecuador del nuesu tiempu.

Equí podría

plantar la vida.

Sobre l’arena gris.

Llástima que la lluna

bautizare con xelu.

Comí setes celestes, mentiroses.

Lluna.

Güeyos: almendres de gasolina.

Arena nos dientes.

Casaos.

Decapitaos.

Coxicando.

Tables.

Borrachera.

Enfornase na verdá…

La entrada «Inhale, You’re the victim», d’Alejandra Sirvent se publicó primero en Formientu.

Pensábades que disparando a las suas voces

íbades a consiguí’l silenciu de las suas lletras

y pensestes mal,

porque las vuesas balas

nu pueden detené l’aire.

Creíades qu’encerrando las suas ideyas

conseguiríades borrar de la historia

tolas miles de manos

que soñaban esos versos,

y una vé más, pensestes mal,

porque los sentimientos nu entienden de tixeiras,

ni la palabra verdá yía sinónimu

d’uniforme, sotana, cacique ni odiu.

Estábades seguros de que fora de las vuesas fronteiras

las paredes nu serían la voz de los esiliaos

y  que s’inoraría que “vencé nu yía convencé”.

De ñuevu equivoquéstesvos,

conseguiendo que vasoutros y los vuesos cómplices

foses portadores de l’antorcha del fracasu,

ya que los sous versus están

en tolos sueños que ñacen al atardecerín,

ñu reflexu de la lluna en tolos ríos,

ñu amanecerín de cada ñueite,

en cada susurru,

en cada caricia,

en cada mirada reflexada n’outra mirada,

en tolas manos que se dan la manu,

en tolos llabios que beisan outros llabios,

en cada denuncia,

en cada canción,

y en tolas veces

que se pronuncia la palabra xusticia.

Vasoutros, solo aparecistes ñas bibliotecas

onde s’estudia a los falsos dueños de la tierra,

a los que s’apoderan de bandeiras,

“a los que nu salen a buscá más que la sua verdá”

y a los que despuéis de los años

tienen que vé cumo tolo que quixienon burrá

yía dibuxáu de ñuevu cuña tinta de las lletras

qu’arramanon las suas balas.

La entrada «Nu burrestes ñada», d’Abel Aparicio González se publicó primero en Formientu.