Los faros lloren mirando la mar
mientres foles ruempen ente roques,
les llágrimes piérdense pela arena
cuando soles escapen les hores.
Eternamente, príncipe d’espluma.

La entrada «Príncipe d’espluma», de Berto Cla se publicó primero en Formientu.

De les infinites pallabres que tallen sobre la nuesa lleenda,
apenes el mio nome ye verídicu;
pos tola decoración estética que visti la nuesa biografía,
ye solu eso: mera decoración.
Lo ciertu ye que, en malapenes cuatro llinies,
la nuesa vida podría ser resumida…
Y, asocediendo la hestoria nel Edén,
yo, la hipócrita d’Eva, reconozo que calezo
y duermo sobre Adán, pola prohibición
de la duce, viva y colorada fruta que desamarra
los mios más fondos mambises.

-Nun ye nada-
-Nenguna muyer tien dueñu-

Apaga la tele,
enciende’l to clítoris,
sal a la cai
a quemar contenedores;

llei un llibru,
constrúi alcordances,
pinta’l mundiu con formosos colores.

Sienti la música,
ruempi les colleres,
afalaga’l tiempu
saltando nos montes;

bailla un pogo
esnuda na cama
y conoz
lo que desconoces.

La entrada «Xénesis», de Berto Cla se publicó primero en Formientu.

La paré, aindá recuerdo la so paré…
aquel aquelarre na tabierna
cola Muerte murnia y sobria
revolviendo’l so cacharru,
los Dioses presos en marcos negros
y la meyor banda sonora.

Gobernada pol home del sombreru,
foi estrella fugaz nel tiempu;
llugar de chulos, llugar de borrachos,
llugar de droga, llugar ñuestru.
Cuántu atapecer veríemos xuntos…

daqué pintor allegrando escaleres,
daqué poeta escribiendo cantares
y daqué picoleos h.aciendo redaes
h.odiéndonos la fiesta.

Pernomada anarquía canguesa,
capital y heroína del pueblu,
zona de cóctel un vienres nueche

y al otru sitiu pa conciertos.
Aquel llamáu llar del colocáu
foi la mio casa munchos momentos;
momentos vivíos colos mios collacios
y col Espumino quemando per dientru.

La entrada «El Tambor Rotu», de Berto Cla se publicó primero en Formientu.

Voi entrar pela to puerta al gritu d’espartana,
col corazòn nuna mano y la llanza na otra…

(Aùh! Aùh! Aùh!)

va sonar Sultans of Swing en llugar “La cabalgata”.
Muñequina Tim Burton, princesa texedora;
mira’l to costáu qu’equí toi yo besando porcelana,
enredáu n’edra negra que provien d’una dama
espartana, qu’

(Aùh! Aùh! Aùh!)

alloria amodo col so moñu la mio almohada.
Qué quies h.acer Harley Quinn d’Esparta?
Escribir suaños, dibuxar mundios…
H.agámoslo

(Aùh! Aùh! Aùh!)

aullando a la lluna dende la cama.
I estic Boig per tu princesa d’Esparta…
fas que parli català en poemes asturians,
i sé que ho saps, Però m’agrada que on
poses els ulls

(Aùh! Aùh! Aùh)

Poses la bala (de labios).

La entrada «Princesa d’Esparta», de Berto Cla se publicó primero en Formientu.

Que guapura tien la mar d’Urriellu,
un bañu en Torimbia, l’alborecer nel Seya…
que guapura tien afondar pela Olla,
llorar en Tazones, l’atapecer de la Griega.

Que guapura tien el mantu del cielu,
les vistes de Pierzu, l’orbayu na tierra…
que guapura tien esti país silente
cola fuerza del vientu glayando na piedra.

La entrada «La guapura d’un país», de Berto Cla se publicó primero en Formientu.

Espeyismu n’África,
alfergues nes manes,
buelgues na sablera…
el corazón con mieu,
puntos suspensivos,
eso é lo que-y queda.

El tic-tac del cocodrilu
faise eternu;
el riu yá nun cuerre,
el vientu yá nun xuega…
dicíime por qué nun escapar
otra nueche a vela.

Güei la lluna ta enriba
y la estrella más brillosa
alluma’l mio camín…
de xuru, Nunca Xamás
nun va ser lo mesmo
pero quiero tar nel so xardín.

Dacuando él nun s’entera
(anque otres dase cuenta)
pero nun importa que tea ellí…
porque voi volver pel alborecer
pa cóseme, y pa que les faes
creyan en min.

La entrada «La Solombra de Peter», de Berto Cla se publicó primero en Formientu.