El xuráu fromáronlu los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia’l viernes 7 de ochobre de 2022. El gallardón consiste nuna ilustración d’Alfonso Zapico y una medaya conmemorativa.

El xuráu destacó, nel acta del fallu, cómo Viejo «amuesa una narrativa híbrida d’un altu valir lliterariu, qu’afita de forma perfecha’l camín de lo universal a lo llocal, siendo quien a empatar la historia familiar con un territoriu míticu y al empar real como ye Quirós, y que furrula como una métafora d’Asturies y del orixe mesmu de la cultura occidental»; el xuráu tamién quixo rescamplar la calidá tan grande de la producción lliteraria n’asturianu del año 2022, lo que fixo que la decisión de premiar la novela de Xulio Viejo se garrara por mayoría depués d’una votación encesa.

Esta ye la decimoprimer vez que’l grupu concede esti premiu, l’añu pasáu resultó ganador el poemariu de Xuan Bello Les isles inciertes y, n’ediciones anteriores, premiáronse les obres Memoria de Tuña, d’Antón García; Incorrectos de David Artime; El llibru póstumu de Sherezade, de Raquel F. Menéndez; Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodríguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, el grupu que lu entama quier prestixar les lletres asturianes, al empar que se da difusión a les obras que, al criteriu del xuráu, se tengan polos meyores llibros escritos cada añu n’asturianu.

Onde’l caos se texe y se destexe ye la cuarta novela de Xulio Viejo depués de Na llende del condicional perfeutu (1990), Les falcatrúes del demoniu (1992) y Los araxales de la vida (2001).

Onde’l caos se texe y se destexe constitúi una historia de histories rica, que se llevanta como una reflexón emocionante sobre la cultura, el poder, la resistencia y una busca del sentíu que se-y pue dar a la esistencia. La memoria escrita como homenaxe a un padre que baxa de los montes de Quirós a ganar la vida en Ventanielles y que va ser la cadena que nos caltién xunto a los nuestros y a lo nuestro, dientro d’una cosmovisión asturiana y universal que nos plasma y nos trescala emocionalmente.

Xulio Viejo Fernández (Uviéu, 1968) ye doctor en Filoloxía Románica, profesor de la Universidá d’Uviéu y estudiosu de la llingua y lliteratura asturianes. Ye responsable del volume Relatos asturianos medievales del sieglu XII (2003), qu’inclúi siete testos traduciíos del llatín. Como poeta foi ganador del Premiu «Xuan María Acebal» nel añu 1996 col poemariu Les etimoloxíes del silenciu.

La entrada La Tertulia Malory entrega’l premiu a meyor llibru n’asturianu a Xulio Viejo se publicó primero en Formientu.

El xuráu destacó, nel acta del fallu, «ye un poemariu atemporal, nel que l’autor fai un diálogu cola tradición poética universal, nun viaxe d’enorme valor artísticu onde resuenen los ecos de los grandes maestros»; el xuráu tamién punxo en vallir la gran calidá de la producción lliteraria n’asturianu del añu 2020, lo que fixo que la decisión de premiar el poemariu de Xuan Bello se garrara por mayoría.

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes.

Esta ye la décima vez que’l grupu concede esti premiu, l’añu pasáu resultó ganador Memoria de Tuña, novela de Antón García y n’ediciones anteriores, premiáronse les obres Incorrectos, de David Artime; El llibru póstumu de Sherezade, de Raquel F. Menéndez; Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu. 

Les isles inciertes ye l’octavu poemario de Xuan Bello depués de Nel cuartu mariellu (1982), Llibru de les cenices (1988), El llibru vieyu (1994), Los caminos secretos (1996), La vida perdida (1999), antología billingüe de su poesía. Ambos mundos. Poesía 1988-2009 (2010). Antología billingüe de su poesía y El llibru nuevu (2017). 

El poemariu yá foi premiu Teodoro Cuesta nel añu 2017. Les isles inciertes asítiase nun tonu grave y sentimental, nel que rescampla un poeta d’ aguda sensibilidá y fondu conocedor del ser humanu, cabalmente consciente del pasu del tiempu, de la muerte y del dolor qu’esta produz y que namás l’amor ye a dilir. 

Xuan Bello (Paniceiros, 1965) Escritor y periodista, ye ún de les principales figures de la lliterartura asturiana. Ente los sos numberosos gallardones y premios destaca’l Premiu Nacional de Lliteratura Asturiana en 2017, un premiu de calter trianal que se concede a autores con una destacada trayectoria lliteraria. Como periodista foi demientres ocho años director del selmanariu Les Noticies y collabora de forma regular colos diarios La Nueva España o El comercio, amás de ser presentador de los programes de la Televisión Pública Asturiana Clave de fondo o La cocina de les lletres. 

Tien algamaos los premios más importantes de la poesía asturiana, ente ellos el Xuan María Acebal y el Teodoro Cuesta.

Xuan Bello tien tamién una llarga trayectoria como traductor al asturianu, especialmente d’autores portugueses. Foi collaborador de revistes como Clarín, Adréi y Zimbru, siendo cofundador de les dos últimes con Berta Piñán y Esther Prieto respectivamente. La traducción al castellanu de la so Hestoria Universal de Paniceiros, recibió’l premiu Ramón Gómez de la Serna y se convirtióse nun de los llibros más destacados polos críticos españoles nel añu 2003. Otros libros de so, pente medies del ensayu y el rellatu, son Pantasmes, mundos, laberintos (1996), La memoria del mundu (1998), Meditaciones nel desiertu (2003), Los Cuarteles de la memoria (2003), La nieve y otros complementos circunstanciales (2007) y Al Dios del llugar (2007). Amás de La hestoria tapecida (2007), La confesión xeneral (2009), Unas poucas cousas guapas (2010). Traducido al castellano (2015) y la novela curtia, La cueva del olvidu (2006).

La entrada La Tertulia Malory escueye Les isles inciertes, de Xuan Bello, como meyor llibru n’asturianu del añu 2020 se publicó primero en Formientu.