{"id":3667,"date":"2020-05-05T12:27:53","date_gmt":"2020-05-05T11:27:53","guid":{"rendered":"http:\/\/www.formientu.com\/?p=3667"},"modified":"2020-05-05T12:27:53","modified_gmt":"2020-05-05T11:27:53","slug":"jose-manuel-menendez-prestariame-conocer-too-redes-como-un-pastor-dorlle-conoz-cada-cachin-de-tarren","status":"publish","type":"post","link":"https:\/\/www.formientu.com\/noticies\/jose-manuel-menendez-prestariame-conocer-too-redes-como-un-pastor-dorlle-conoz-cada-cachin-de-tarren\/","title":{"rendered":"Jose Manuel Men\u00e9ndez: \u00abPrestar\u00edame conocer too Redes como un pastor d’Orll\u00e9 conoz cada cach\u00edn de tarr\u00e9n\u00bb"},"content":{"rendered":"
Entrevista d’Eva Came\u00e1n. <\/strong><\/p>\n Bones llectores, g\u00fcei tr\u00e1igovos una entrevista rescamplu diferente a les dem\u00e1s, ya que normalmente est\u00e1n feches a escritores y persones rellacionaes col mundu lliterariu. Pero g\u00fcei, 22 d’abril ye’l d\u00eda internacional de la Tierra, y por eso quer\u00eda face-y una entrevista a dalguien rellacionao cola protecci\u00f3n del medioambiente y la cultura. Voi present\u00e1voslo:<\/p>\n Jose Manuel Men\u00e9ndez<\/strong> (1975, Los Barreros – Llaviana ) ye un activista , gu\u00eda de naturaleza y monta\u00f1a asturianu, afinc\u00e1u en Galiza dende ne\u00f1u.<\/p>\n Ye’l presidente y unu de los fundadores de l’Asociaci\u00f3n Ambiental Senda Nova, constituyida formalmente como asociaci\u00f3n dende’l a\u00f1u 2008, una entid\u00e1 qu’entama actividaes y iniciatives rellacionaes col ecoloxismu y el patrimoniu cultural y social, fomentando actividaes como les rutes interpretatives, talleres ambientales, encuentros culturales, charras etc.<\/p>\n Jose tuvo, y tov\u00eda angua\u00f1o ta, vincul\u00e1u a munchos movimientos y entidades culturales, sociales y ecoloxistes, y a diferentes lluches sociales y ambientales tanto en Galiza como n’asturies. (movimientos rellacionaos cola oposci\u00f3n a la miner\u00eda contaminante, alta tensi\u00f3n, e\u00f3licos etc).<\/p>\n Tolos mi\u00e9rcoles podemos sent\u00edlu nel programa \u00abDa Lareira a Lameira\u00bb en Radio Cerceda, un espaciu radiof\u00f3nicu de la Asociaci\u00f3n Senda Nova dedic\u00e1u al patrimoniu cultural y ambiental nel que cada selmana intervi\u00e9n de 12:30 a 13:00h.<\/p>\n Tami\u00e9n entam\u00f3 iniciatives mui prestoses como la Revista Abrindo Cami\u00f1o, una publicaci\u00f3n de c\u00e1lter cultural y ambiental, tami\u00e9n de Senda Nova na qu’\u00e9l ye’l director, y na que collaboren delles persones rellacionaes con entidaes, actividaes, asociaciones, movimientos ecoloxistas, culturales, sociales etc<\/p>\n Am\u00e1s ye un amante de’l monte y la monta\u00f1a nel sent\u00edu m\u00e1s rom\u00e1nticu de la pallabra. Pr\u00e9sta-y pola vida afayar nueves rutes, y sobremanera disfrutar del monte y de la llibert\u00e1 na monta\u00f1a dende un aspeutu respetuosu col mediu natural y de conocimientu y interpretaci\u00f3n del territoriu.<\/p>\n Ye un amante de los mapes, y la cartograf\u00eda en xeneral, y pr\u00e9sta-y parase nuna campera a interpretar con mapa y br\u00faxula en manu que ye lo que tien delantre.<\/p>\n G\u00fcei vamos conocelo un poquit\u00edn m\u00e1s, cola nuesa entrevista rescamplu \u26a1 :<\/p>\n -Bones Jose, que tal lleves la cuarentena? Ta siendo dif\u00edcil nun poder salir al monte y disfrutar de la naturaleza?<\/strong><\/p>\n Hai muncho que facer. Son tiempos de trabayu que tien que servir pa organizase.<\/p>\n -Que llugar te prestar\u00eda visitar nam\u00e1s rematar la cuarentena?<\/strong><\/p>\n L’Azorea Cima. Un puebl\u00edn perrguapu del conceyu de Llaviana<\/p>\n -Que podemos facer dende casa pa conocer m\u00e1s la nuesa naturaleza, el nuesu entornu, y disfrutar d’ello dende casa? Que nos propones?<\/strong><\/p>\n Depende, hai muncha xente que vive nel mediu natural y que ya tien la oportunid\u00e1 de caltener el contactu col mesmu. Muncha d’esta ded\u00edcase a la agricultura, el pastor\u00e9u\u2026 Una bona propuesta pa los dem\u00e1s ye la reflex\u00f3n precisamente sobro esos medios de vida y la posible necesid\u00e1 d’un c\u00e1mbiu al rural. Pero pa goler cuchu.<\/p>\n -Una entid\u00e1\/movimientu ecoloxista de referencia pa ti:<\/strong><\/p>\n Munchos, cada unu coles sos caracter\u00edstiques. La mayor parte del trabayu de les asociaciones ecoloxistes ta tapec\u00edu polos medios, o lo que ye peor, asoleyando demagoxes de lo que llamen un \u201cecoloxismu de sal\u00f3n\u201d que pa nada ye real.<\/p>\n Prestar\u00edame nomar cualquier entid\u00e1 bien peque\u00f1a que lluche pola ecolox\u00eda del so territoriu. La Coordinadora Ecolox\u00edsta ye una d’eses que desendolquen un trabayu enorme y poco vistosu.<\/p>\n -Una acci\u00f3n\/activid\u00e1 que te marcara:<\/strong><\/p>\n Como toos, les de bien ne\u00f1u. Aquelles escursiones por Pe\u00f1amayor.<\/p>\n -Una peque\u00f1a acci\u00f3n que podr\u00edamos facer cualquiera de n\u00f3s:<\/strong><\/p>\n Sofitar una entid\u00e1 del nuesu rural. Los grupos ecolox\u00edstes y les entidaes del rural tamos nel mesmu barcu por muncho qu\u00b4interese separtar.<\/p>\n -Una persona rellacionada col medioambiente o la cultura que te marcara y dexara posu:<\/strong><\/p>\n Teniendo la suerte de compartir en Senda Nova tantos momentos con tantes persones y tan compromet\u00edes cola cultura y\u00b4l mediu natural, dir\u00edate que ye un aprendizaxe continuu de xente que me marc\u00f3. Am\u00e1s del trabayu constante, l’amor y compromisu de tantes persones coles que coincido y que tanto aprecio, Xan Fern\u00e1ndez Carrera integra una cualid\u00e1 dinamizadora espectacular demostrada dende va muncho. Pr\u00e9stame nomalu porque desendolca un trabayu cada vez m\u00e1s escasu ya imprescindible.<\/p>\n -Una an\u00e9cdota que te preste recordar:<\/strong><\/p>\n Caliau, Corcoesto, Penedos de Traba e Pasarela, F\u00e9rveda de Entrecruces… tantos llugares que caltienen ent\u00e1’l so patrimoniu gracies a l’activismu. Cont\u00e1bennos que los proyectos yeren imposibles de parar. Yera mentira.<\/p>\n -Dalg\u00fan momentu que recuerdes rellacionau col activismu que nun seya prestosu?<\/strong><\/p>\n L’activid\u00e1 constante nuna entid\u00e1 lleva con ello una exposici\u00f3n a enguedellos ente persones de la organizaci\u00f3n, collaboradores, participantes, qu’acaben en dolores de cabeza.<\/p>\n Que les alministraciones, sobre too conceyos, s’aprovechen del llabor de les entidaes tambi\u00e9n da llugar a malos momentos. Pero nada peor que cuando toca ver como nun somos quien d’armar un movimientu organizau pa parar un proyectu antiecol\u00f3xicu.<\/p>\n -Sabemos que te presta facer monte, cuala ye la ruta que m\u00e1s te prest\u00f3 facer en toos estos a\u00f1os?<\/strong><\/p>\n Munches. Ensin dulda, una delles foi la que me llev\u00f3 dende Caliao a descubrir el Llagu Ubales.<\/p>\n -Una ruta que nun podemos morrer ensin facer:<\/strong><\/p>\n Ca\u00fan la suya. Esa que tien de llau de casa y que-y sirve pa aprender m\u00e1s del so territoriu m\u00e1s aver\u00e1u. Hai muncho por descubrir ensin viaxar llo\u00f1e.<\/p>\n -Salir al monte solu o acompa\u00f1\u00e1u?<\/strong><\/p>\n Acompa\u00f1\u00e1u.<\/p>\n -Prestar\u00edate tener m\u00e1s conocimientos\/formate en:<\/strong><\/p>\n Prestar\u00edame conocer bien Asturies. Pero creo que me voi conformar con conocer bien l’Altu Nal\u00f3n. Prestar\u00edame conocer too Redes como un pastor d’Orll\u00e9 conoz cada cach\u00edn de tarr\u00e9n que llega a Melorda\u00f1a. Una utop\u00eda, claro.<\/p>\n -El to picu prefer\u00edu:<\/strong><\/p>\n Pe\u00f1amayor.<\/p>\n -Una viesca que destacar\u00edes:<\/strong><\/p>\n Munchos fayeos del altu Nal\u00f3n. Por desconoc\u00edos voi dicite la Mata Covedr\u00e1, en Llaviana. Y despu\u00e9s la mata’l Tex\u00edu, una viesca de texos y carrascos espectacular, na cara naveta de Pe\u00f1amayor<\/p>\n -Un animal que pondr\u00edes en valor y dar\u00edes a conocer m\u00e1s:<\/strong><\/p>\n Anf\u00edbios, reptiles\u2026 los que quieras. Toos tienen un sambenito enriba. El llobu, otru que tal.<\/p>\n -Un r\u00edu que te preste:<\/strong><\/p>\n Dende ne\u00f1u siempre me sosprendi\u00f3’l Nal\u00f3n: d\u00edbemos pa Tarna descursi\u00f3n familiar y dic\u00edenme que nac\u00eda na fonte la Nalona; crieme al par del en Los Barreros, ten\u00eda la escuela de ll\u00e1u; y despu\u00e9s d’andar daquella varies hores de coche, cruz\u00e1bemoslu cerca de San Esteban de Pravia, cam\u00edn de Galicia.<\/p>\n Que grande yera. Y yo que peque\u00f1u.<\/p>\n -Un requexu col que quedasti abluc\u00e1u:<\/strong><\/p>\n Habr\u00e1lu m\u00e1s afayadizu nun d\u00eda de monte emborrinau, qu’una caba\u00f1a guapa onde metese a comer un chorizu y beber agua con bien sede?<\/p>\n -Un pa\u00eds por visitar:<\/strong><\/p>\n Tengo que parame a pensar porque nun pienso nello davezu. Tengo ganes de visitar la parte francesa de los Alpes.<\/p>\n -La pr\u00f3xima cume que te prestar\u00eda xubir:<\/strong><\/p>\n Vienme a la cabeza Pena Ubina, por esto de que qued\u00e9 la \u00faltima vegada a cuarta y cote del cumal comiendo’l bocadillu tortiella. Ya veis ent\u00f3s que m’importen poco los cumales, la verd\u00e1. Delles veces digo que debo ser campe\u00f3n de quedame poco antes de llegar.<\/p>\n -Un llibru que toos tendr\u00edamos que tener na nuesa llibrer\u00eda:<\/strong><\/p>\n Falando de monte, ta prest\u00e1ndome muncho l’ensayu de Pablo Batalla: \u201c La virtud en la monta\u00f1a. Vindicaci\u00f3n de un alpinismo lento, ilustrado y anticapitalista\u201d.<\/p>\n -Un llugar nel que perdete y desconectar:<\/strong><\/p>\n Faime falta poco. Pero polo menos pa perdeme tienen que me dexar salir de casa.<\/p>\n -Un sua\u00f1u:<\/strong><\/p>\n Ser capaz de vivir nel rural asturianu con los recursos que me puede dar el territoriu.<\/p>\n -Un llugar pa vivir:<\/strong><\/p>\n L’Azorea Cima.<\/p>\n -Un prop\u00f3situ personal:<\/strong><\/p>\n Tengo qu’enfotame nello tov\u00eda. Ye de suponer que na llinia del sua\u00f1u.<\/p>\n Cuanto me prest\u00f3 la entrevista! Am\u00e1s sirvi\u00f3me a min mesmu pa la reflex\u00f3n. Munches gracies<\/p>\n Munches gracies a ti por participar, all\u00e9grome que te prestara. Y graci\u00e9s tami\u00e9n por tol trabayu y la llabor que lleves desendolcando toos estos a\u00f1os, pola nuesa cultura, llingua, y Tierra. Gracies por cellebrar con Clari\u00f3n el D\u00eda de la Tierra<\/p>\n","protected":false},"excerpt":{"rendered":" Entrevista d’Eva Came\u00e1n. Bones llectores, g\u00fcei tr\u00e1igovos una entrevista rescamplu diferente a les dem\u00e1s, ya que normalmente est\u00e1n feches a escritores y persones rellacionaes col mundu lliterariu. Pero g\u00fcei, 22 d’abril ye’l d\u00eda internacional de la Tierra, y por eso quer\u00eda face-y una entrevista a dalguien rellacionao cola protecci\u00f3n del medioambiente y la cultura. Voi […]<\/p>\n","protected":false},"author":1,"featured_media":3668,"comment_status":"closed","ping_status":"closed","sticky":false,"template":"","format":"standard","meta":{"footnotes":""},"categories":[80,59],"tags":[],"yoast_head":"\n