{"id":5018,"date":"2023-01-09T12:45:51","date_gmt":"2023-01-09T11:45:51","guid":{"rendered":"https:\/\/www.formientu.com\/?p=5018"},"modified":"2023-01-09T12:45:51","modified_gmt":"2023-01-09T11:45:51","slug":"nicolas-bardio-en-radagast-apostamos-por-facer-llibros-que-llea-la-xente","status":"publish","type":"post","link":"https:\/\/www.formientu.com\/entrevistes\/nicolas-bardio-en-radagast-apostamos-por-facer-llibros-que-llea-la-xente\/","title":{"rendered":"Nicol\u00e1s Bardio: \u00abEn Radagast apostamos por facer llibros que llea la xente\u00bb"},"content":{"rendered":"
Nicol\u00e1s Bardio (Uvi\u00e9u, 1987) ye escritor y narrador asturianu. Autor de les noveles Sol Rel\u00f3\u00a0<\/em>(Trabe, 2008),\u00a0Onde ensamen les abeyes<\/em>\u00a0(Suburbia, 2011),\u00a0La Colomina 36<\/em>\u00a0(Trabe, 2020) cola que gan\u00f3\u2019l Premiu Asturias Joven de Narrativa, y\u00a0Del llau del nigromante<\/em>\u00a0(Radagast, 2021).<\/p>\n Ye tami\u00e9n el promotor\u00a0Depu\u00e9s d\u2019Ochobre,<\/em>\u00a0el xuegu de rol n\u2019asturianu, ucron\u00eda ambientada na Rep\u00fablica Obrera y Campesina d\u2019Asturies llueu de que triunfare la Revoluci\u00f3n d\u2019Ochobre de 1934 y Asturies pasare a formar parte de la Uni\u00f3n Sovi\u00e9tica.<\/p>\n Dende l’a\u00f1u 2018 dirixe Ediciones Radagast, onde edita obres lliteraries de fantas\u00eda y ciencia ficci\u00f3n. Con \u00e9l falamos de la trayectoria d’esta editorial que va garrando puxu nel panorama lliterariu asturianu.<\/p>\n \u00bfEn qu\u00e9 momentu surde la idea de fundar una editorial especializada en fantas\u00eda y ciencia ficci\u00f3n n\u2019Asturies y principalmente n\u2019asturianu?<\/strong><\/p>\n Pos la verd\u00e1 ye que dalgo que surde a \u00faltimos de 2019 col \u00e9xitu que tuvimos con Depu\u00e9s d\u2019Ochobre. Eso fixo posible disponer de perres coles que poder montar la editorial, apostar polos primeros llibros que sacamos y facer frente a tolos tr\u00e1mites necesarios, que nun son pocos.<\/p>\n Detr\u00e1s d\u2019esta editorial hai un mesmu sentir y un mesmu diagn\u00f3sticu: Orfand\u00e1. Somos asturfalantes, escribimos n\u2019asturianu, somos militantes del movimientu de recuperaci\u00f3n lling\u00fc\u00edstica\u2026 pero hasta ehi les similit\u00faes colo que yera\u2019l panorama lliterariu hasta\u2019l momentu. Nos ochenta hebo coses mui guapes n\u2019asturianu, les m\u00e1s d\u2019elles de dif\u00edcil accesu y hebo escritores que siguieron aportando muncho y que nos presten como puen ser Dolfo Camilo, Vicente Garc\u00eda Oliva, Xulio Arbes\u00fa o Nel Riesgo ente otros; que faen noveles qu\u2019a nosotros mos paecen guapes de lleer, \u00e1xiles, y, sobre too prestoses. Pero esto, por desgracia, nun foi la norma na lliteratura asturiana. Preocupaben otros par\u00e1metros que\u2019l llegar al p\u00fablicu, que\u2019l disfrutar cola novela, que\u2019l que te diere ganes de lleer m\u00e1s y m\u00e1s.<\/p>\n Y Radagast surdi\u00f3 asina, con un grupu d\u2019autores mozos, vieyos y de mediana ed\u00e1 (de 19 a 72 a\u00f1os) que nun ta zarr\u00e1u y que nun dexa de medrar, que consideramos que la lliteratura nun se construi dende l\u2019escritor al p\u00fablicu, sin\u00f3n dende\u2019l p\u00fablicu al escritor; intentando entender qu\u00e9 quier el p\u00fablicu y procurando, na midida de los nuesos intereses y gustos, d\u00e1-ylo. Nam\u00e1s d\u2019esa manera vamos consiguir aportar el nuesu esfuerzu al procesu d\u2019alfabetizaci\u00f3n tan grande que tenemos per delantre como socied\u00e1.<\/p>\n Siendo la cultura asturiana una cultura con una bayura grande en mitolox\u00eda, \u00bfpor qu\u00e9 apost\u00e1steis pol nome del quintu magu de los istari de J. R. R. Tolkien?<\/strong><\/p>\n Tolkien ye \u00fan de los nuesos referentes. De fechu, la mayor\u00eda de los nuesos referentes, los y les escritores que m\u00e1s mos presten, escrib\u00eden n\u2019otres lling\u00fces y, hasta ciertu puntu, yera inimaxinable velos traduc\u00edos a la nuestra. Afortunadamente agora y\u00e1 podemos lleer a J.R.R. Tolkien, a Robert E. Howard, a Jonathan Swift, a Michael Ende y bien ceo esti mesmu a\u00f1u a H.P. Lovecraft y Orson Scott Card n\u2019asturianu. Pero en 2019 yera tov\u00eda impensable atopar un llibru n\u2019asturianu d\u2019ellos nuna llibrer\u00eda. Am\u00e1s, pr\u00e9stanos tami\u00e9n de Radagast el so venceyu cola natura y la tierra y colos \u201cbichos\u201d. Identific\u00e1monos con eso porque queremos facer fantas\u00eda asturiana y tami\u00e9n trabayar \u201clos nuesos bichos\u201d. Nel enfoque que tenemos de la fantas\u00eda creo qu\u2019hai una esmolici\u00f3n importante por recuperar les creatures de la nuesa mitolox\u00eda y da-yos entid\u00e1 y voz n\u2019obres adultes y non nam\u00e1s d\u2019infantil y xuvenil como foi\u2019l casu hasta\u2019l momentu. Nesa llinia sacamos Del Llau del Nigromante<\/em> en 2020 protagonizada por un magu nuberu y vamos sacar esti a\u00f1u dos noveles m\u00e1s nes que la fantas\u00eda asturiana tien voz adulta: El Cantar de Suaro Ca\u00ednez, d\u2019Andr\u00e9s Fern\u00e1ndez onde vamos poder ver cu\u00e9lebres, mouros y xanes; y otra novela de Xon de la Campa de la que nun voi dar tov\u00eda\u2019l t\u00edtulu porque va ser un bombazu editorial y vamos midir con cuentagotes lo que vamos dicir d\u2019ella hasta que salga. Nam\u00e1s vos adelanto que nella hai tami\u00e9n un cu\u00e9lebre y sal el primer Rei de los \u00c1stures.<\/p>\n Na editorial ten\u00e9is un grupu d\u2019autores mozos, como Andr\u00e9s Fern\u00e1ndez o Blanca Fern\u00e1ndez, pero que y\u00e1 tienen dellos premios lliterarios. \u00bfC\u00f3mo naz la posibilid\u00e1 de publicar les sos obres?<\/strong><\/p>\n L\u2019andanciu del covid y, sobre manera\u2019l confinamientu, foron un puntu d\u2019inflex\u00f3n gordu pa munches persones. Los escritores, que suelen (solemos) quexase de la falta de tiempu d\u2019esta socied\u00e1 na que\u2019l trabayu ocupa m\u00e1s espaciu de lo que ye normal y sano, por fin tuvi\u00e9ronlu abondo y n\u00f3s, dende les redes sociales, nun aparamos d\u2019afalar a la escritura. Llanzamos daquella\u2019l #RetuRadagast en redes sociales de facer una novela curtia en tr\u00e9s meses y hebo autores como Blanca o Ainhoa Corral que lu fixeron y mos mandaron les sos noveles. Los otros foron sum\u00e1ndose col tiempu. A Andr\u00e9s conoc\u00edmoslu a ra\u00edz del mecenalgu de Depu\u00e9s d\u2019Ochobre y anim\u00f3se a escribir poco depu\u00e9s, a Adri\u00e1n Carbayales a cuenta de Refuelgu.com, la revista dixital que montamos pa falar de les coses de cultura friqui que mos presten y otros munchos enganch\u00e1ronse llueu; a Casimiro Fern\u00e1ndez conoc\u00edmoslu na FELIX, a Ana nes redes sociales que fac\u00eda fanart de La Rexenta contra Dr\u00e1cula<\/em>, a Abel nun taller de creaci\u00f3n lliteraria\u2026 Casi toos yeren llectores nuestros primero de venir pa con n\u00f3s. En xeneral, si hai un patr\u00f3n com\u00fan m\u00e1s que la moced\u00e1 -Casimiro ye g\u00fcelu y\u00e1- ye que son llectores con esi sentimientu d\u2019orfand\u00e1 que mentaba primero que vienen pa con n\u00f3s; como ye tami\u00e9n el casu d\u2019Abel Mart\u00ednez que va sacar obra en Radagast l\u2019a\u00f1u qu\u2019entra.<\/p>\n