Javi Sol\u00f3s \u00fafrenos una rese\u00f1a de la obra de Gonzalo G. Barre\u00f1ada, El viaxe del cacique, editada por Impronta Editorialnel a\u00f1u 2023:<\/p>\n
La mar, como ye un llugar cimblante y de bativol\u00e9u, acaba por sopelexar los mieos humanos, y les inseguridaes somorguiaes en tierra firme remanecen cuando\u2019l caminar y\u00e1 nun tien posa. La casa dexa de ser un sitiu onde poder entrar y salir, ye un llar que navega, que busca al travi\u00e9s de les foles el descansu de les almes que lu habiten. Si la traves\u00eda aprovez y el rumbu pi\u00e9rdese por cuenta la borrina, la truena o la desesperaci\u00f3n, la posici\u00f3n social de los tripulantes acaba por engurriase, torn\u00e1ndose\u2019l valir y l\u2019autorid\u00e1 en papel moyao. La realid\u00e1 y los sua\u00f1os entem\u00e9cense, refugando per momentos de la fe, de la devoci\u00f3n nunca nun cuestionada hasta esi instante.<\/p>\n
Nuna espedici\u00f3n entainada pola Corona de Castiella, el gobernador Ovando zarpa de Sevilla, nel a\u00f1u 1502, con una armada compuesta por m\u00e1s de trenta naves. L\u2019oxetivu ye arribar pa la islla caribe\u00f1a de La Espa\u00f1ola. Una de les naos ye la \u00abTrinid\u00e1\u00bb, onde capit\u00e1n, pilotu y alguacil tan al cuid\u00e1u de los pasaxeros d\u2019a bordu. \u00dan d\u2019ellos ye Caonabo, ind\u00edxena ciegu lleg\u00e1u a\u00f1os atr\u00e1s a tierres andaluces y qu\u2019agora, mediante orde de la reina Isabel, tien que volver pa Les Indies porque esta quier que la xente llegao d\u2019acull\u00e1 regrese pa la so tierra. Cuando\u2019l barcu nel que viaxa sal de la ruta afayadiza, desesperaci\u00f3n y badag\u00fceyos pesimistes inunden la moral de la tripulaci\u00f3n, buscando rempuestes a la mala suerte y les causes del navegar al debalu. Pero la \u00abTrinid\u00e1\u00bb termina por aportar a un llugar desconoc\u00edu y atraca cerca d\u2019una sablera. Dellos homes de la nao faen una incursi\u00f3n primera que se convierte nuna esperiencia misteriosa.<\/p>\n
Con personaxes estremaos, escenarios pintureros y oxetivos desaniciaos, Gonzalo Barre\u00f1ada construye esti rellatu de tastu aventureru allug\u00e1u nel entamu del sieglu XVI, d\u00f3mina del arranque de les colonizaciones europ\u00e9es al continente americanu. Casi nam\u00e1s empezar la novela, l\u2019acci\u00f3n desend\u00f3lcase y\u00e1 nel barcu Trinid\u00e1, onde pasu ente pasu vamos conociendo a los protagonistes y la so opini\u00f3n al respective de les intenciones verdaderes del viaxe. Una historia que nun fala solo de la b\u00fasqueda de territoriu nuevu y riqueces venideres, tami\u00e9n amuesa llucha ideol\u00f3xica y dogm\u00e1tica, con abondo de conversaciones de rens\u00eda y retranca ente los munchos personaxes qu\u2019apaecen nel llibru.<\/p>\n
Va reparar el llector en dos partes dixebraes na narraci\u00f3n que se correspuenden col llugar nel que s\u2019asitia la mesma. Per un llau ta\u2019l rellatu nel barcu, onde lo qu\u2019asocede ye real y, sacantes les allucinaciones que la mar produz, naide nun cuestiona los fechos. Pel otru, la islla descubierta por error ye un escenariu m\u00e1xicu, que tapez esa realid\u00e1 del \u00abTrinid\u00e1\u00bb pa configurar escenarios id\u00edlicos y redentores, onde\u2019l tiempu cronol\u00f3xicu que pasen los protagonistes qu\u2019ell\u00ed s\u2019alcuentren nun ye\u2019l mesmu que\u2019l del restu los pasaxeros que permanecen nel barcu. Poro, l\u2019autor xuega cola ficci\u00f3n dientro del rellatu hist\u00f3ricu, escapando d\u2019esta manera de la ll\u00ednea convencional y rigurosa que munches veces atopamos nesti x\u00e9neru lliterariu. \u00abEl viaxe del cacique\u00bb tien esi puntu diferente, m\u00edsticu, que nun ye avezao alcontrar.<\/p>\n
Porque nes sos p\u00e1xines desfilen soldaos, autoridaes de la Corona, grumetes, cl\u00e9rigos, muyeres enigm\u00e1tiques, nativos y dalgunos otros venceyaos a la mitolox\u00eda. S\u00ed, l\u2019elementu llexendariu y la f\u00e1bula son se\u00f1es identitaries del escritor, y nesta obra apaecen, como en noveles anteriores, pa ufrir un formientu narrativu allo\u00f1\u00e1u de lo solemne, cola retranca y la paradoxa como contestaciones afayadizes al discursu se\u00f1orial y cultu de los poderosos. Nuna d\u00f3mina na que nun se cuestionaba\u2019l designiu div\u00edn, \u00abEl viaxe del cacique\u00bb fuxe de la xustificaci\u00f3n oficial, de los acontecimientos predicibles, p\u2019armar una versi\u00f3n distinta con una mecigaya on\u00edrica y espiritual.<\/p>\n
Un xigante, un drag\u00f3n falante, supuestos bruxos, ex\u00e9rcitos numberosos y atentaos al honor, la obra tien un daqu\u00e9 de caballerescu que se funde per momentos cola ciencia ficci\u00f3n, adaptando l\u2019alderique de los personaxes a un llinguaxe propiu de la \u00e9poca, enllenu de proverbios y cultismos. Con biecos evidentes a los cl\u00e1sicos d\u2019aventures. En particular, f\u00edzome recordar a \u00abLa islla del tesoru\u00bb (R.L. Stevenson) en detalles como cuando la chalupa arriba a la sablera de la islla desconocida con un destacamentu, o l\u2019escuchante que ta escond\u00edu detr\u00e1s d\u2019un tonel na bodega de la nao. Lo mesmo que los encabezamientos de los cap\u00edtulos, faciendo un homenaxe al mou y manera de les obres m\u00edtiques del x\u00e9neru, tomando como t\u00edtulos les primeres pallabres qu\u2019abren ca\u00fan d\u2019ellos. L\u2019estilu y la prosa de Gonzalo Barre\u00f1ada ye bien reconocible na narrativa asturiana, con una bultable capacid\u00e1 imaxinativa adaptada a determinaos fechos hist\u00f3ricos. XLIII Premiu \u00abXosefa Xovellanos\u00bb de novela.<\/p>\n","protected":false},"excerpt":{"rendered":"
Javi Sol\u00f3s \u00fafrenos una rese\u00f1a de la obra de Gonzalo G. Barre\u00f1ada, El viaxe del cacique, editada por Impronta Editorialnel a\u00f1u 2023: La mar, como ye un llugar cimblante y de bativol\u00e9u, acaba por sopelexar los mieos humanos, y les inseguridaes somorguiaes en tierra firme remanecen cuando\u2019l caminar y\u00e1 nun tien posa. La casa dexa […]<\/p>\n","protected":false},"author":1,"featured_media":5421,"comment_status":"closed","ping_status":"closed","sticky":false,"template":"","format":"standard","meta":{"amp_status":"","footnotes":""},"categories":[72,44],"tags":[],"yoast_head":"\n