Como la muda al sol d’una llagartesa, editada por Hoja de Lata, ye la primera novela de Berta Piñán, merecedora del Premiu Xosefa Xovellanos 2017. Con esti thriller rural, la gran poeta asturiana descúbrenos la so maestría pa encadarmar personaxes y trames de tensión psicolóxica, nun llibru que ta xenerando una gran espectación nel públicu llector.
La primer presentación va celebrase esti vienres 14 a les 19:30 hores na Escuela Comerciu de Xixón. N’Uviéu la presentación va celebrase na Biblioteca de La Granxa, n’El Campu San Francisco, el sábadu 15 a les 12:30 hores.
EL LLIBRU
Nel maizal de Xuana Salabert aparez una bona mañana el cadabre d’una mocina. Los gueyos en blanco, la piel frío y la traza incierta de quien nun morrió nesi llugar. Enantes de que Xuana pueda dar parte a les autoridaes, un golpe tremendu na tiesta déxala inconsciente. Cuando recupera’l sentíu, el cuerpu ensin vida d’aquella neña yá nun ta ellí.
La vida tranquila nel campu que Xuana escoyera llevar lluéu de xubilase tórnase de sópitu violencia y medrana, esperando que vuelvan a por ella quienes acabaron cola vida de la rapaza. Namás puede contar cola ayuda incondicional de la so vecina, Taresa, muyer de sabiduría televisiva con un instintu natural pa ver el peligru, y de los guardies civiles del cuartel de la Villa, quienes por fin tienen un casu que los saque de la so rutina.
Pincha aquí pa lleer les primeres páxines de Como la muda al sol d’una llagartesa.
L’AUTORA
Berta Piñán (Cañu, Cangues d’Onís, 1963) ye seguramente l’autora viva más destacada n’asturianu. Poeta, ensayista y novelista, ye tamién miembru de númberu de l’Academia de la Llingua Asturiana dende l’añu 2008.
Xunto con Antón García y Xuan Bello fundó la revista lliteraria Adréi, ún de los fitos de lo que se dio en llamar segunda xeneración del Surdimientu.
Magar que la so obra abarca dende l’ensayu sociollingüísticu hasta la lliteratura infantil y xuvenil, Piñán considérase poeta penriba de too y tien ganaos dos de los principales premios de poesía n’asturianu, como son el de l’Academia de la Llingua Asturiana col volume Al abellu les besties(1985) y el Teodoro Cuesta con Vida privada(1991).
Les sos escases incursiones na narrativa cuenten tamién col reconocimientu del públicu y la crítica, casu de La tierra entero, un volume de cuentos ganador del Premiu de Narraciones Trabe (1996) o La maleta al agua(2005), coleición de relatos sobre la emigración.
Nel xéneru infantil y xuvenil tien ganaos los premios María Xosefa Canellada con Agua, arroz y maíz(2008) y el de la Crítica d’Asturies en dos ediciones consecutives con Les coses que-y presten a Fran(2008) y L’estranxeru (2009). Como la muda al sol d’una llagartesa ye la so primera novela.
