El xuráu del Premiu Fernán-Coronas dio anuncia güei na Casa Natal del Padre Galo y coinciendo col aniversariu de la nacencia del autor de Cadavéu, de la obra ganadora d’esta edición del gallardón, titulada Díes otros, de Laura Marcos, escritora moza de Mieres del Camín.
Susana Sela, Inaciu Galán, María Esther García y Carmen Guardado conformaron el xuráu d’esti añu, que reconoció la obra de Marcos como un poemariu “que constrúi imáxenes dures enllenes de metáfores bien llevaes alantre y al mesmu tiempu mui eficientes y cencielles”. Reconocieron tamién a “Díes otros” ser un volume “bien encadarmáu, tanto na forma como nel fondu”, dándo-y la victoria por unanimidá, ente les trés obres presentaes.
El Premiu Fernán-Coronas lleva en funcionamientu dende l’añu 1994 y tien ente los sos ganadores una bona amuesa de la lliteratura de los noventa y del nuevu sieglu, con voces como Taresa Lorences, Miguel Rojo, Susana Sela, Ánxel Álvarez Llano, Pablo Rodríguez Medina, Carmen Guardado, Inaciu Galán, Aida Escudero o Solinca Turbón, ganadora de la edición de 2018.
Laura Marcos (Mieres, 1982) lleva bien d’años implicada nel ámbitu lliterariu asturianu, participando n’iniciatives como la revista Formientu, na que foi coordinadora del conseyu de redacción dellos años, o les Timbes Poétikes, de les que ye miembru mui activa. Llicenciada en Filoloxía Inglesa y especialista en Filoloxía Asturiana pola Universidá d’Uviéu, foi responsable del Serviciu de Normalización Llingüística del Conceyu de Mieres y correctora independiente de llibros n’asturianu. Anguaño trabaya como profesora na enseñanza secundaria. Apaez na antoloxía “La prueba del once. Poesía asturiana del sieglu XXI”, d’Antón García, y en revistes como Reciella Malory, de la tertulia na que tamién participa. En 2017 espublizó’l so primer llibru de relatos «Cuentos de ser y tar». Na canal PlayPresta presenta l’espaciu de lliteratura La cla invisible.
