L’Asociación d’Escritores d’Asturies (AEA) ta acabante faer públicos los Premios de la Crítica que concede cada añu, y na categoría d’obres n’asturianu resultaron ganadores Xaime Martín, pol so poemariu Hibernia y Xabiero Cayarga por El cuentu atrás.
De la obra de Martínez el xuráu destacó «la construcción clásica, el rigor formal y la frescura llingüística de la misma», mientres que de la de Cayarga quixeron da-y relevancia «al llinguaxe cercanu y coloquial amás de la narración en distintes y múltiples rexistros. Una narrativa caltriante, atenta a los detalles y que s’enfusa na singularidá del mundu individual frente a la realidá cotidiana y globalizada».
Amás, otru escritor con obra n’asturianu, Aurelio G. Ovies, resultó ganador del Premiu de les Lletres d’Asturies al conxuntu de la so obra, destacando’l xuráu «la calidá, fuercia y prestixu de la so obra poética y por llevar les lletres asturianes fuera de les nueses fronteres».
El xuráu de narrativa tuvo compuestu por Carmen Cabeza Marínez, José Marcelino García- Fernández Luanco y Xandru Fernández (esti últimu, premiu de la Crítica de Narrativa en 2017) y actuó como secretariu Agustín Alonso Biscayar. El xuráu de poesía Aurelio González Ovies, Juan Ignacio González y Elías Veiga (gallardonáu esti últimu en 2017, con esti premiu de la Crítica de Poesía) actuando como secretaria Mª Esther García López, presidenta de l’Asociación d’Escritores d’Asturies.
La entrega de Premios fadráse’l 18 de xineru nel Aula Magna de la Universidá d’Uviéu, a les 19:30 hores.
LOS PREMIAOS
Xaime Martínez (Uviéu, 1993) forma parte del movimientu lliterariu que llamen «Patarrealismo Salvaje». Escritor n’asturianu y en castellán, tien grabaos dellos discos col so grupu La Bande y ta acabante sacar un discu en solitariu dedicáu a la hestoria d’Asturies.
Xabiero Cayarga (Cangues d’Onís, 1967) vive dende hai años n’Alemania dedicáu a la enseñanza. Tien publicada una llarga obra n’asturianu, poesía, teatru y narrativa, al par de traducciones dende l’alemán y l’inglés.
Aurelio González Ovies (Bañugues, Gozón, 1964) ye profesor de Filoloxía Llatina na Universidá d’Uviéu, escritor y poeta n’asturianu y castellán, con dellos premios na so trayectoria. La so obra nesta última llingua hasta l’añu 2008 recoyóse na antoloxía Esta luz tan breve (Saltadera). Espublizó siete álbumes ilustraos de poesía cola editorial asturiana Pintar-Pintar. Ente ellos destaca Versonaxes (2013), gallardonáu pol Ministeriu d’Educación, Cultura y Deporte con un Premiu al Llibru Meyor Editáu n’España 2014 na categoría de Llibros Infantiles y Xuveniles.
LOS OBRES PREMIAES