El músicu Xune Elipe ye’l ganador esti añu del Premiu d’Ensayu Máximo Fuertes Acevedo, convocáu pol Gobiernu d’Asturies cola obra «Hai una llinia trazada. Historia de la música asturiana».
Los miembros del xuráu destacaron del trabayu de Xune Elipe que se trata d’una obra «que compendia la historia de la música asturiana nel so contestu históricu y llingüísticu», y afita’l merecimientu del gallardón nel «cuidáu y esmeru formal y intelectual presentáu con un rigor máximu, que nun desatiende nel análisis l’axilidá descriptiva oportuna pa facer del llibru una llectura arriquecedora y prestosa a un mesmu tiempu». El xuráu fai constar nel acta que «va ser una obra de referencia».
Nesta edición, y baxo la presidencia del director xeneral de Política Llingüística, Antón García, el xuráu integráronlu les filólogues Marta López y María Cueto, la escritora Beatriz Quintana y los autores Jorge Arturo Sierra y José Ángel Gayol, vencedor de la edición pasada. Juncal García, del servicio de la Dirección Xeneral de Política Llingüística, actuó como secretaria.
El premiu Máximo Fuertes Acevedo d’ensayu n’asturianu ta dotáu con 5.000 euros.
Xune Elipe, que tien yá espulizaos dellos llibros, ye miembru fundador de la banda de rock Dixebra y creador del sellu discográficu Discos L’Aguañaz. Dedicáu dende mui mozu al mundu de la comunicación, fundó y dirixe l’Anuariu de la Música Asturiana, ye autor d’abondos artículos periodísticos y tien dirixío y presentao programes de radio y televisión.
(Foto: RTPA)
