Abandonástime, dexástime sola col vientu falándome de ti. Rompístime en milenta pedazos que la mar intenta xuntar ensin aliendu, ensin descansu.

Pasa’l tiempu, y duel tanto dase cuenta que nun yera mar, que yera lo salao de les mios llárimes faciéndome retorcer de dolor al contautu con caúna de les mancadures que me ficieras. O ye que te busco, o ye que grito pa que vuelvas, pidiendo ensin descansu que tornes y xuegues conmigo anque seya otra vegada yo la marioneta, anque vuelvas a afogame colos filos de lo sé que nun yera, pero tu llamabes amor. Quiciabes solo precise tiempu, tiempu pa que l’aire lleve tola arena ya erosione la mio cara desdibuxando la tristura. Nun sé qué ficisti conmigo, o más bien qué fici yo contigo dándote un llugar que nunca merecieras. Sicasí, nun puedo llevantame del suelu.

Asina que vuelvi, xunta caúna de les mios partes, vuelvi a xuntar el mio alma col mio cuerpu, vuelvi y ruémpime, vuelvi a estrozame otra vegada; pero vuelvi. Nel to viaxe contaré l’arena demientres dexo pasar el tiempu esperando reencontrame contigo; demientres te siento falar nel vientu.

La entrada «Nel vientu», de Naomi Suárez Gónzalez se publicó primero en Formientu.

Y esperar espierta que dexes de buscame

que me garres del brazu, que me lleves a nenguna parte,

nun estremo yá nunca ente sentite o suañate.

Quiciabes pienses que me tienes como enantes

como naquelles nueches cuando m’abrazabes

y la mio piel frío temblaba nel to refugu imperante.

Munchos piensen qu’arriesgué, nun debí dexate

falaben del mio cuerpu, miraben espectantes,

pero la vida ye xugar ensin mieu, quemase.

Mas nun colé a tiempu y ficisti llenzu de sangre

adelantasti’l mio reló, fízoseme tarde

lloren toos la mio muerte, aquellos que falaben.

La entrada «Piel Frío», de Naomi Suárez González se publicó primero en Formientu.

Nun t’amurnies por min
tate tranquilu nesi mundu,
nun t’amurnies por min
nun me vengas col to embruxu.

Nun t’esmolezas por min
amor quemáu cual dibuxu,
nun t’esmolezas por min
nun supimos plantar el frutu.

Nun t’amurnies por min
podré superar tol arguyu,
nun t’amurnies por min
nun quiero ocultame ente’l mofu.

Nun t’esmolezas por min
del pechu yá salió esi nuedu,
nun t’esmolezas por min
nun tuñemos más col muriu.

Nun t’amurnies por min
llevantéme sola del suelu,
nun t’amurnies por min
nun hai nel mio pechu más xelu.

Nun t’esmolezas por min
mio corazón vuelve solu a llatir,
nun t’esmolezas por min
y menos agora que vivo sin ti.

Nun t’amurnies por min
que dende va tiempu yo yá soi feliz,
nun t’amurnies por min
yá nun lloro llárimes de sal por ti.

La entrada «Nun t’esmolezas por min», de Naomi Suárez González se publicó primero en Formientu.

Contáronmelo pa que lo contara,
contara la mio verdá,
verdá d’una tierra amada,
amada por siempre xamás.
Xamás podré olvidate,
olvidate enxamás,
enxamás podré falar otra llingua,
llingua d’otra tierra o mar.
Mar d’orbayu negro,
negro de tanto llorar,
llorar por esta tierra,
tierra por tantos soñá.
Soñá polos que tán lloñe,
lloñe nunca se ta,
ta metida nel pechu,
pechu d’asturianos de verdá,
verdá como la que sienten,
sienten que nun la puen olvidar.
Olvidar ye mui difícil,
difícil tamién ye amar,
amar como cuando s’ama,
cuando s’ama como a una ma.

La entrada «La mio verdá», de Naomi Suárez González se publicó primero en Formientu.

Alcuérdome d’aquel conciertu, el nuesu primer conciertu. Ye güei que reconozo que nun pudi disfrutalu d’un mou normal, pero xúrote que sentí cada nota, cada acorde dientro de min. Corazón fechu metrónomu, facía delles canciones muncho más rápides cada vegada que t’acercabes, que me mirabes o boriabes. Alcuérdome tar col restu del públicu agacháu rozando coles rodielles casi nel suelu; comiéndonos colos güeyos. Foi dende esi momentu, que lleéndome la mente, me garrares p’arriba naquel mar de cabeces y notare la to respiración na mio boca, xusto enantes de lo llento de los tos llabios, que rompisti la posibilidá de maxa en cualesquier otru conciertu. Y agora, convertida n’alma rota, protagonista d’un videoclip d’un grupu ensin canciones, espérote coles botes enllenes de barru en teatros vacíos ensin ti, realidá incompleta y distorsionada sobre triaes menores que nun me dexen vivir.

La entrada «Triaes menores», de Naomi Suárez González se publicó primero en Formientu.

Foi llegar y namorame, amor y espaciu compartíu too en partes iguales.
Mazana gris enllena de vida o, meyor dicho, enllena de vides.

Vides dispares, separtaes y, a la mesma vegada, xuníes pel suelu, xuníes pel aire.
Miraes vacíes, tristes, allegres; miraes vives y miraes muertes.

Cielos estrellaos, fechos xigantes tresformen la escena, cambien el planu de la película.
Demientres siento’l movimientu, cambio de guión na mio vida.

La entrada «Mazana gris», de Naomi Suárez González se publicó primero en Formientu.