La Nueche Blanca d’Uviéu ábrese al asturianu col Festival «Namás Dragones»

El Conceyu d’Uviéu ta acabantes de presentar la programación de la Nueche Blanca 2025. Esti añu la ufierta cultural de la Nueche Blanca d’Uviéu inclúi la propuesta n’asturianu «Namás Dragones». Trátase d’un festival de poesía espandida que va tener llugar la nueche del sábadu 4 d’ochobre de 20:00h a 23:00h na Sala de Cámara del Auditoriu, na Plaza del Fresno.

«Namás Dragones» ye un nuevu festival de poesía escénica n’asturianu onde s’aglutina’l conxuntu de creadores con vocación d’aumentar les dimensiones poétiques más allá de los llibros. La poesía asturiana ta n’auxe y son necesarios los espacios pa qu’esta vaya conociendo nueves víes de desarrollu. «Namás Dragones» ye performance, ye escenariu, ye palabra, imaxe, son y movimientu: la poesía nes tables.

Nesta primer edición van llevase a cabu trés performances. La primera va ser un homenaxe al recientemente fallecíu Xuan Bello (20:00), colos músicos Andrés Rodrigues y Pepín de Muñalén, recordando al que foi y será unu de los mayores talentos de la lliteratura asturiana del últimu sieglu. La segunda propuesta trainos a la poeta Sofía Castañón y al cantante Nacho Vegas na so primer colaboración artística xuntos (21:00). Pa rematar (22:00), contaremos con «Percepción / ⠨ ⠏ ⠑ ⠗ ⠉ ⠑ ⠏ ⠉ ⠊ ⠬ ⠝ », un espectáculu del poeta Aníbal González, el músicu Tomás Flórez (Thomas Florez) y el bailarín Jaime González (Migonjai Kan).

El festival ta coordináu dende l’Asociación Mezá pol poeta y xestor cultural Miguel Rodríguez Monteavaro.

La programación completa de la Nueche Blanca d’Uviéu, incluyíos los detalles del Festival «Namás Dragones», puede consultase equí.