El fallu del premiu –el decimuterceru dende que se creara– fíxose’l vienres 29 de payares nun actu que se celebró nel pub Tom Malory de L’Entregu, sé de la tertulia lliteraria dende 1998
La Tertulia Malory, de L’Entregu, escoyó como meyor llibru n’asturianu de tolos que s’editaron nel 2023 l’ensayu Nunca Vencida, una historia de la idea d’Asturies, del escritor David Guardado. El xuráu formáronlu los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana Coro, David Fernán, Chechu García, Pablo R. Medina y Henrique G. Facuriella, que fallaron el premiu nun actu celebráu na tertulia’l vienres 29 de payares de 2024.
El xuráu destacó, nel acta del fallu, cómo «l’autor, encontáu por nun trabayu d’investigación minuciosu y escomanáu, s’avera a la idea d’Asturias y abre un paradigma nuevu nel análisis de la realidá y la historia del país, apurriendo una visión que frañe con muchos de los cánones establecíos hasta’l momentu. Ye un ensayu que naz cola idea de caltenese nel tiempu, faciéndose de llectura necesaria pa entender los raigaños, el presente y el futuru d’esta tierra nomada Asturies». El xuráu tamién quixo rescamplar la gran calidá de la producción lliteraria n’asturianu del añu 2023, lo que fixo que la decisión de premiar l’ensayu de David Guardado se garrara por mayoría depués d’una votación encesa.
El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes.
Esta ye la decimotercer vez que’l grupu concede esti premiu y la primera que s’entrega’l gallardón a un ensayu. L’añu pasáu resultó ganadora la novelaTiempu d’escoria, de Xosé Nel Riesgo, y n’ediciones anteriores premiáronse les obres Onde’l caos se texe y se destexe, de Xulio Viejo; Les isles inciertes, de Xuan Bello; Memoria de Tuña, d’Antón García;Incorrectos, de David Artime; El llibru póstumu de Sherezade, de Raquel F. Menéndez; Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodríguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, el grupu que lu entama quier prestixar les lletres asturianes, al empar que se da difusión a les obres que, a criteriu del xuráu, se consideren los meyores llibros escritos cada añu n’asturianu.
Nunca vencida, una historia de la idea d’Asturiesye’l segundu ensayu de David Guardado después deLlingua estándar y normalización llingüística. La revitalización de les llingües subordinaes (2008). Ye un trabayu valiente y revelador, onde David Guardado fai un repasu detalláu de les idees, los mitos y los discursos sobre Asturies qu’a lo llargo de la historia, dende la Edá Media hasta güei, compitieron por ser dominantes, amosando el so calter ideolóxicu. Asturies, cuna d’España o baluarte de l’anti-España; semiente de la plurinacionalidá peninsular o xerme de la so unidá; pionera del llaicismu o abellugu del catolicismu… Dende una perspectiva inédita, la obra analiza cómo la interpretación de los símbolos y la historia d’Asturies (los astures, Pelayo, Cuadonga, la francesada, la bandera, la llingua asturiana o la Revolución d’Ochobre), faen parte d’una batalla onde l’autor estrema dos xenealoxíes ideolóxiques opuestes: una mira al futuru y básase na afirmación de la singularidá asturiana, mientres que la otra mira al pasáu y llevántase dende la renuncia y la señaldá.
David Guardado (Xixón, 1970) ye llicenciáu en Filoloxía Inglesa, diplomáu n’Estudios Avanzaos en Filoloxía y Especialista Universitariu en Llingua Asturiana. En 1997 fundó’l mediu dixital n’asturianu Asturies.com y dirixó la edición dixital de La Nueva España del 2000 al 2010, cuando s’incorporó a la estructura del grupu de comunicación Prensa Ibérica, onde anguaño ye parte del equipu que coordina los procesos de tresformación dixital. Autor del ensayu Llingua estándar y normalización llingüística. La revitalización de les llingües subordinaes (Araz, 2008), collabora davezu nos diarios de Prensa Ibérica y n’otros medios escribiendo sobre comunicación, tecnoloxíes nueves y Asturies. Miembru de númberu de l’Academia de la Llingua Asturiana, anguaño ye’l vicepresidente de la institución.
