Pablo X. Suárez ye’l nuevu ganador del XXIX Premiu Fernán Coronas. Asina lo fizo públicu un xuráu conformáu por Inaciu Galán, Marta Mori, Gonzalo Llamedo, Carmen Guardado y Blanca Fernández y que se reuniera’l pasáu 7 d’agostu na que fuera la casa del Padre Galo.
«Entamos d’onomástica» ye’l nome del poemariu escoyíu como vencedor, onde’l xuráu quier destacar «l’equilibriu ente los aspectos formales y el conteníu, que revela un bon dominiu del asturianu. La voz poética ye bien singular y fai usu hábil y orixinal de la ironía y l’humor».
Pablo X. Suárez (1981) ye llicenciáu en filoloxía hispánica pola Universidá d’Uviéu y escritor n’asturianu y castellanu. En poesía tien asoleyao’l poemariu Asturiana Beat (2005) cola editorial Trabe y El sistema débeme una chocolatina (2011) y en narración tien dellos premios na creación de cuentos como nel Concursu de Cuentos pola Oficialidá que convoca’l Conceyu de Bimenes o el X Concursu de Narraciones Curties Conceyu Llaviana, con El bichu grande (2011) y publicáu’l llibru de rellatos Yoni y yo (2010). Pablo X. Suárez tien collaborao en revistes asturianes como Lletres Asturianes, Entellunu, Campu de los Patos o Formientu. Asina mesmo collaboró col selmanariu Les Noticies con una columna d’opinión. Nel añu 2017 fízose col Premiu Xuan María Acebal de poesía col poemariu Little Babilonia, destacando’l xuráu «el nivel llingüísticu y estilísticu, y la brillantez de les imáxenes d’un testu que xuega y entemez la tradición más clásica coles referencies más pop»
La entrega d’esti premiu va facese, como yá ye tradición, na celebración de la fiesta de La Regalina, el domingu 27 d’agostu. El Premiu de Poesía en Llingua Asturiana Fernán-Coronas entámalu la Sociedá Popular y Cultural La Regalina de Cadavéu.
