Norabona pol Premiu Nacional de Lliteratura Asturiana. ¿Qué sentisti cuando s’anunció y qué supón pa ti recibir esta reconocencia?

Munches gracies. Al recibir la noticia sentí a lo primero incredulidá y depués una emoción  intensa. Esta reconocencia  amás d’afalagar la vanidá supón un estímulu grande pa siguir  creando.

¿Cómo entamasti na lliteratura asturiana? ¿Qué papel xugó Nel Amaro nesi momentu?

Na revista Del Aráu a la pluma vi per vez primera, a los dieciséis años, un testu escritu n’asturianu y un poema que me paeció guapísimu, ‘Tedium vitae’ de J. Benito Alvarez-Buylla. En  Turón, alredor de Nel Amaro y la Casa de la Xuventú, na revista El Cuélebre Literario,  había un espaciu pa la poesía qu’acoyía tamién testos n’asturianu. Nel Amaro foi  amigu, llector  y impulsor de les  pimeres creaciones. Les revistes Lletres Asturianes y Adréi permitiéronme dir mostrando lo qu’escribía  hasta  que, nel añu 1991, la editorial Älvízoras publicaba’l  llibru Aldabes del olvidu.

Cola to obra crees un mundo orixinal y propiu, ensin importancia de les modes.
¿Cómo ye’l to procesu de creación?

Siempre lleí muncho, demanera poesía. Cuento que’l  subconciente nútrese de les llectures qu’inflúin  de forma indeterminada  nel qué y nel cómo escribo. Les modes nun les tuvi en cuenta. Yo cunté lo que quixe  o necesité cuntar en cada llibru, la fechura vienme determinada en cada momentu acordies colo que quiero dicir.

El xuráu destaca “una voz fuerte qu’alluma la hestoria y el destín de la muyer”. ¿Ye daqué premeditao o daqué natural pola condición de xéneru?

Les muyeres protagonicen dellos de los mios poemes dende qu’entamo a escribir poesía. Escribo de lo que veo, de lo que vivo, de lo que me producen eses vivencies tratando de trescender esa realidá. Nesa realidá tan elles, toi yo, por eso me paez normal qu’escriba d’elles, tan ehí. Necesitaba falar d’elles nun intentu de redención, vamos dicilo asina y pa que se  viera la inxusticia de la desigualdá en tolos sentíos na que vivíen/viviémos  les muyeres.

Tienes prácticamente n’imprenta la to obra completa, ¿cómo foi volver sobre la to poesía?

En delles ocasiones prestóme, foi revivir los momentos qu’inspiraron los poemes o sobre’l procesu de la so creación. Otres veces saturaba un poco y tenía que dexar la llectura de revisión pa meyor momentu.

¿Qué vamos ver (amás de la obra síntesis que va asoleyer l’Academia) nuevo na obra de Lourdes Álvarez?

Toi trabayando n’otru proyectu, al mio ritmu,  que nun se cuando voi dar por rematáu.

¿Cuál crees que ye la situación de la lliteratura asturiana, y en particular de la más moza?

La lliteratura n’asturianu ta nun momentu  bonu mesmo en cantidá como en calidá. Coinciden amás  n’activo unes cuantes xeneraciones  d’escritores ( dende los nacíos nos años cuarenta  del sieglu pasáu hasta los pertenecientes yá a esti  sieglu, casu del ganador del Premiu Enriqueta González Rubín  de Narrativa moza na edición del añu 2022. Tamién la presencia de muyeres escritores va medrando en tolos xéneros, y ye un datu significativu, anque entá tenemos que siguir esforzándonos pa dar lo meyor que podamos dar a la lliteratura asturiana;toi convencía de que va ser muncho.

En resume, nel mio entender tamos en un bon momentu  a nivel  creativu  y divulgativu. Les canales de  difusión nueves que visibilicen lo que se ta faciendo lliterariamente son de munchu valir.

¿Crees que necesita más sofitu dende les instituciones?

La lliteratura y la llingua asturiana necesiten d’un apoyu institucional potente si nun queremos que se pierdan.

¿Qué papel te paez que xuega la poesía na sociedá d’aguaño?

El mesmu papel que les artes en xeneral, cumple cola faceta humanizadora y estética de la vida.

Cola to trayectoria, ¿qué-y diríes a esa xente que ta empezando nel mundu lliterariu?

 Siempre digo que pa escribir ye mui recomendable lleer a los modernos y a los clásicos; tamién incorporar a la esperiencia personal conocimientos básicos pa entender otres artes.

La entrada Lourdes Álvarez: » El Premiu Nacional de Lliteratura Asturiana supón un estímulu grande pa siguir creando» se publicó primero en Formientu.

Norabona pol Premiu de Poesía Fernán Coronas. ¿Qué sentisti cuando s’anunció
y qué supón pa ti?

Lo primero de too, quiero dar les gracies. Munches gracies a la Sociedá Popular de la Regalina por siguir convocando esti concursu dempués de 28 ediciones, dando sofitu a la escritura en llingua asturiana. Quiero agradecer tamién al xuráu tol llabor de valoración (nada cenciellu) y la seriedá cola que lo fixeron, dándome esta oportunidá tan especial, que de xuru, merecen tamién otres obres presentaes. En tercer llugar, toi mui agradecíu a Formientu pola anuncia del Premiu y pola entrevista. Y, pa finar, nun quiero dexar de da-yos les gracies a les persones que me dedicaron un mensaxe con cariñu.

Recibir esti premiu ye un regalu mui especial, amás de polo que representa pa la lliteratura asturiana (esa que lleemos y estudiamos col alma), porque me llega nun momentu personal mui particular, de revisión y d’asentamientu na vida adulta. La verdá, nun contaba con él: soi consciente de les limitaciones que tengo como escritor novel «neofalante», fíu de la diglosia, anque también ye cierto que llevo cuatro años trabayando pa superar esta carencia de los 27 anteriores y devolve-yos a la llingua y a la lliteratura asturiana l’espaciu na mio vida que-yos debía. La escritura foi siempre especial pa min, pero poder facelo n’asturianu y tener esta acoyida ye un doble regalu. Estupendu.

Nun ye’l primer concursu que ganes, pero quiciás sí que ye’l más importante.

El Premiu Fernán Coronas tien un percorríu llargu ya importante nel ámbitu de la poesía
asturiana, asina que sí tengo una sensación distinta no que cinca, penriba de too, a la
responsabilidá y l’alegría que supón representalu. Tamién me da más vértigu, porque
representar esti nome significa socializar la escritura d’otra manera, ya inda soi consciente de que me falta un tiempu y una dedicación que’l trabayu nun me permite anguaño. De toes maneres, dende un puntu de vista personal, nun quiero desmerecer los premios anteriores: por pequeños que seyan, tolos reconocimientos tienen el mio respetu y foron emocionantes. Prestáronme pola vida, como un impulsu pa siguir escribiendo.

¿Qué podemos alcontrar nel poemariu ganador?

Igual un poco de lo que soi un poco de lo que m’arrodia. Escribílu en 2019 mientres preparaba la tesis, pero confieso que yera ceo: inda nun taba alfabetizáu y quixi revisalu
y actualizalu esti branu. Atrévome a dicir que nun ye un poemariu al usu, sinón un intentu, dacuando filosóficu, dacuando emocional, de reflexonar sobre’l nuestru tiempu: una dómina descrita nos imaxinarios sociales de les caberes décades como líquida y complexa, pol so calter cambiante, inciertu y rizomáticu. La obra tien dos partes: una más personal, nomada «La vida líquida», onde aprucen momentos ya histories que m’atravesaron y me tresformaron nestos años; y una más xeneral, «La sociedá líquida», qu’inclúi exemplos de preocupaciones y caricatures del nuestru tiempu, con un tonu qu’amiesta la denuncia y la reivindicación.

¿Quién son los fíos de Bauman?

Zygmunt Bauman describió la realidá social globalizada como una modernidá líquida, con un ciertu pesimismu reactivu, buscando una rempuesta de la xente. Intento llevalo al mio tarrén con esti trabayu. Los fíos de Bauman somos xeneraciones que crecimos col cambéu de sieglu, viendo cayer, como cayeron les Torres Ximielgues, los símbolos de la dómina anterior, pa dar pasu a otru paradigma. Los fíos de Bauman vivimos estes tresformaciones nuna espectativa continua, mirando con señardá la vida d’antes y esforzándonos por comprender la d’agora, moviéndonos ente la esperanza y l’escepticismu.

Dende la perspectiva d’autor mozo, ¿cómo ves la situación de la lliteratura
asturiana?

Camiento que se tán dando dos situaciones paralales: d’una banda, ganóse en producción lliteraria y na diversificación temática, gracies al puxu de la normalización social de la llingua asturiana y la so lliteratura, lo que contribúi sobremanera a la apertura a nuevu públicu y ye sentío como positivo; per otru lláu, ta alvirtiéndose un cambéu de tendencia no que cinca a la calidá lliteraria y lo que se valora como más representativo dientro del nuestru canon. Esta situación respuende, na mio opinión, a dos situaciones: una global, que ye la reivindicación actual d’una lliteratura que la sociedá entienda como propia del so tiempu, anque dacuando se sacrifiquen otros aspectos formales o estéticos que yeren fundamentales nes époques anteriores; y, en segundu llugar, una interna, porque l’avance na normalización social de la llingua y de la lliteratura asturiana trae anguaño a esti ámbitu a autores con perfiles vitales y formativos mui diversos. Magar qu’esti aspectu pudiere xenerar controversia, la llectura que faigo d’ello ye que la lliteratura asturiana ta sumando espacios y dexa de ser consumida y producida por determinaos círculos culturales pa pasar a democratizase. De toes maneres, esti cambéu nun quita que mereza y necesite igualmente un analís y un posu.

¿Crees que la xente mozo necesita más sofitu dende les instituciones?

Paezme que nestos años ta poniéndose enfotu pa xenerar más oportunidaes, como son
el Premiu «Enriqueta González Rubín» de novela mozo, el concursu d’improvisación lliteraria «Entaína a Escribir» o los alcuentros d’Autores nel Camín. Espero que siga siendo asina y que se xeneren más actividaes rellacionaes cola escritura, ensin qu’estes dependan de la voluntá de los gobiernos.

¿Qué camín va siguir agora la to producción lliteraria?

Llevo escribiendo dende neñu y ello va siguir siendo asina, porque la escritura siempre m’acompaña y ye un pilar fundamental na mio vida privada. Sicasí, gustaríame dedicar agora más espaciu pa poder plantegar tamién una escritura compartida, pero quiero que
tenga sentíu y que seya sentida. La priesa ye mala compañera, ta demostrao. La puerta
ta siempre abierta.

La entrada Gonzalo Llamedo: «Na lliteratura asturiana ganóse en producción lliteraria y na diversificación temática» se publicó primero en Formientu.