Entrevistes d'Eva Cameán - Formientu

Xulio Arbesú: «Nunca lloré por penes de ficción, pero emociónenme muncho les coses guapes»

Formientu — Thu, 28 May 2020 14:43:19 +0000

Xulio Arbesú, (1957, Samartín del Rei Aurelio) ye un escritor asturianu con un bayurosu camín lliterariu al rodiu de dellos xéneros. Ente la so obra destaquen noveles como Potestas , o El valor del rei, cola que algamó’l premiu Xosefa Xovellanos de novela nel añu 2016. Tamién escribió llibros xuveniles y cuentos infantiles, amás d’ensayos como Los deseos del dineru, El destín treshumanu o Asina viaxaremos en 2050.

Ye l’autor de la obra teatral Les siete novies del rei, representada nes fiestes de L’Entregu n’homenaxe al rei de la monarquía asturiama que-y da nome al conceyu.

Xulio tien tamién desendolcada la so faceta musical, poniéndo-y música a d’ellos poemes y escribiendo lletres de cantares como La Lloca, o Como tu eres interpretaos por Anabel Santiago, Los castilletes interpretao por Marisa y Fernando Valle Roso, O Yo que vengo interpretao pola cantante valenciana Celia Jiménez, ente otros.

Xulio estrenóse nel cine cola producción y dirección del llargumetraxe musical Bailandia, nel añu 2014.

Güei vamos conocelu un poquitín más cola nuesa entrevista rescamplu, de manes d’Eva Cameán.

Bones, Xulio, ¿cómo lleves esta nueva situación?

Como un puñeteru privilexáu. Nun trabayando pa la mio empresa (Ayuntamientu de Samartín) y cobrando. Toi «confináu» nuna casa de campu con terrén abondo. Eso sí, trabayo muncho pela güerta, segar y toes eses coses. Delles nueches échome frayáu.

Yes del grupu qu’aprovechó la cuarentena pa lleer y escribir enforma, o de los que nun yeren quien a concetrase…?

Toi trabayando muncho col ordenador, como siempre o un poco más.

¿Qué xéneru te presta más pa escribir?

Supongo que la novela. Tamién me prestaron muncho los ensayos qu’escribí.

¿Xéneru que más te presta lleer?

N’otru tiempu, noveles. Agora, cola madurez avanzada, l’ensayu, sobre too, lo que tien calter históricu.

¿Tienes dalgún vezu o zuna a la hora de ponete a escribir?

Nun se me ocurre nada especial. Tengo munchu hábitu de trabayu y concéntrome ensiguida. Valoro’l silenciu al rodiu míu, pero ensin llegar a zuna.

¿Qué zunes llectores mos puedes confesar?

Zuna, zuna, nenguna, pero sí una mala costumbre. Bueno, dos. La primera, lleer poco, muncho menos de lo que me prestaría. Namás que pa echame a la siesta y pela nueche. Duérmome pitando y delles veces dame una rabia… Tengo la experiencia extraña de tar técnicamente dormíu y al empar entendiendo y xulgando a fondo lo que toi lleendo. Ye difícil de creer, pero tien pasáome dacuando. La otra mala costumbre ye lleer menos de lo que quisiera por puru placer, cosa maraviyosa, y demasiao por compromisu o por necesidá de conocimientu pa los trabayos nos que me meto.

¿El to escritor/a de cabecera?:

De mozu tenía verdadera admiración por Maxim Gorki. El mio poeta de cabecera fundamental siempre fue Antonio Machado.

¿El to llibru clásicu preferíu?

Diba tener que poner más de diez, pero si se me dexa un poco de caprichu del momentu nesta respuesta, toi acordándome de «Resurrección» de Tolstoi. Qué cosa más grande. Y depués «La madre», pero non tanto la de Gorki como la de Pearl S. Buck, una autora americana olvidada qu’escribía sobre China. La madre abultóme una obra maestra cuando la llei. Hai poco tuvi nuna charra mui interesante sobre muyeres escritores, dada por una gran erudita, y sin embargu, nun citó «La madre». Pena de novela escaecida.

¿Tas trabayando en dalgún llibru/escribiendo daqué actualmente?

Sí, toi trabayando abondo, pero fuera d’axenda nun tema que nun-y importa a naide: toi desarrollando un llinguaxe escritu non fonéticu que se llama Tedaz

¿Si tuvieres qu’escribir un llibru con otra persona, a quién escoyeríes?:

A Homero. Pero igual nun lu tengo a mano.

¿Un llibru que nun fueras quien de rematar?

Si, tengo una novela ambientada nun futuru non llonxanu, como dientro d’unos cincuenta años, y tres d’escribir más de 150 páxines, quedé atascáu delantre de les diez fueyes finales. Escribir sobre un futuru cercanu ye demasiao arriesgao.

¿Tienes dalgún personaxe lliterariu preferíu?

Déxame pensar… Voi a optar tamién caprichosamente nesto: el marqués de Bradomín. Si nun sabes quién ye, ye’l to problema.

¿A qué escritor revivirías pa que pudiera siguir escribiendo?

A Miguel Delibes, por exemplu.

¿Un llibru col que llorasti?

Pues nun tengo memoria de nengún. Creo que nunca lloré por penes de ficción, pero emociónenme muncho les coses guapes, les buenes acciones. Tien puéstoseme dalguna llarimuca nos güeyos nesi tipo d’acciones lleendo o viendo películes. Por exemplu, con esto del coronavirus, hai artículos sobre actos solidarios y valentíes anónimes que m’emocionen muncho, coses qu’otros igual consideren ñoñes; pero yo, non.

¿El llibru que más te marcó y que-y recomendaríes a tol mundu?

Supongo que fue «Umbral de la vida interior», un ensayu d’un filósofu italo-francés, Lanza del Vasto, discípulu de Gandhi. Sigue siendo recomendable, incluso lliterariamente.

¿Cuála ye la to llectura actual?

Tengo dos tochos gordos enriba la mesita que voi alternando. «Mater dolorosa», un ensayu sobre’l nacionalismu español nel sieglu XIX, d’un autor al que conozco personalmente, José Álvarez Junco, una persona de gran sabiduría que nun se da importancia. Esti lléolu por placer. Y por necesidá de documentación: Lingüística, d’Ángel Alonso-Cortés, bastante mal escritu, pero mui completu na so estaya.

¿Un llibru que tengas munches ganes de lleer?

Un llibru prestosu de ciencia ficción intelixente. Acepto conseyos.

¿Tapa dura o tapa blanda?

Si ye pa dar llibrazos, tapa dura.

¿Llibros llargos o curtios?

Si son «El vieyu y el mar», curtios; si son «La Regenta», llargos.

¿Sagues o autoconclusivos?

Sagues malapenes les tengo trataes.

Tienes curiosidá por saber que respondería nesta entrevista:

Equí ye poner una persona conocida, ¿non? Pues David Artime.

Y ya pa rematar, ¿qué llectura nos recomiendes pa estos díes?

Respondí lo anterior sabiendo que venía esta pregunta. Dao que dixi David Artime, pues agora digo la so novela «Incorrectos». Mui recomendable. Non too nella me gustó, pero tien un par de personaxes principales profundamente bien dibuxaos. Alcuérdome del placer d’acabar de lleer dalgún capítulu diciendo: chapó.

Milenta Gracies Xulio por participar n’esta entrevista rescamplu y por dexanos conocer los tos gustos y vezos llectores un poquitín más!

La entrada Xulio Arbesú: «Nunca lloré por penes de ficción, pero emociónenme muncho les coses guapes» se publicó primero en Formientu.

Xuan Bello: «Dende 1982 siempre toi escribiendo un llibru y nunca fui quien a escribir ún que me consolara»

Formientu — Tue, 19 May 2020 17:05:11 +0000

Xuan Bello (1965, Paniceiros) ye un de los escritores más destacaos de la lliteratura contemporanea en llingua asturiana, y unu de los principales animadores de la lliteratura asturiana gracies a les sos tornes, especialmente d’autores portugueses. Tien delles collaboraciones y publicaciones con revistes y periódicos como El Comercio, La Nueva España, Les noticies, Clarín, Zimbru y Adréi, y ye cofundador de les dós últimes xunto con Esther Prieto y Berta Piñan, respectivamente.

En 2003 algamó’l Premiu Ramón Gómez de la Serna gracies al so llibru Hestoria Univeral de Paniceiros, na so edición en castellán, y esto supúnxo-y un gran saltu a nivel estatal. Nel añu 2017, alzóse col Premiu Nacional de Lliteratura Asturiana, entamáu pola Academia de la Llingua Asturiana. El xuráu destacó la calidá y relevancia de la so trayeutoria lliteraria que xugó un papel fundamental na dignificación de la lliteratura asturiana.

La so obra ta compuesta por noveles, poemarios, ensayos, cuentos y tornes siendo uno de los autores más prolíficos d’Asturies. Güei Eva Caemán va face-y la entrevista rescamplu pa conocelu un poquitín más:

1.¿Qué xéneru te presta más pa escribir?

Nun sé contestate a esta pregunta. La llectura produzme munchu consuelu pero la escritura, la verdá, nunca foi dalgo que me prestara. Tolo contrario: si escribí nun foi porque me prestara muncho o poco sinón por explicame la endiablada naturaleza del mundu que me tocó. Escribir ye xurgar nunes poques obsesiones, siempre les mesmes, y ello nun tien que ver col placer.

2. Xéneru que más te presta lleer?

Depende de la hora, del día, de la temporada. Cuasi siempre lleo poesía, qu’alterno (por esti orde) col ensayu y la narrativa de ficción (raramente noveles). Cuando toi mui cansáu, lleo teatru (val too: Wilde, Arniches, Fo…),

3.¿Tienes dalgún vezu o zuna a la hora de ponete a escribir?

El vezu, depués de 40 años, parez fatalmente indomeñable. ¿Zunes? Munches pero sobre too una. Doi vueltes y más vueltes pa nun escribir. Flaubert —creo que yera Flaubert, pero nun-y faigas casu a la mio memoria— sentábase frente a una mesa y nun se ponía a escribir hasta qu’inconcentemente cruciaba los pies de determinada manera. Dicía que yera una especie de raptu. A mi pásame dalgo paecío. Hai un momentu en que toi escribiendo per dientro y yá puen caer bombes; pero llegar ehí lleva cumplir con ciertos ritos: afueyar los llibros que tengo sobre la mesa, fumar un pitu tres d’otru, llevantame repetidamente de la mesa, solventar les xeres doméstiques que tenga pendientes… Hai un momentu en que yá toi escribiendo, puedo pasar hores ensin fumar nin moveme de la siella.

4.¿Qué zunes llectores mos puedes confesar?

¿Por zuna llectora entiendes llibros que la xente nun suel ller? Supongo qu’entós tengo munches. Interésenme tolos llibros pero non toos m’interesen lo mesmo. Dalgunos, con tres o cuatro páxines yá me dan una idea abondo exacta de lo que’l llibru ye. A veces la simple edición del llibru yá me da idea non sólo de la precariedá del editor sinón de la parvedá del autor.

Pero bono, ¿entrugues poles mios zunes llectores? Lleo diccionarios con mucha asiduidá: lexicones, enciclopedies… Cualesquier llista de palabres tien pa mi un interés. Los mios amigos saben que siempre recibo con gran placer un diccionariu. Nun soi un coleccionista, soi un llector de diccionarios y nesi caos ordenao alfabéticamente tengo descubierto munches coses que nun sabía de la mio llingua.

5.El to escritor/a de cabecera:

Lo fácil diba ser dicir Eugénio de Andrade, T. S. Eliot y Salvatore Quasimodo. Pero mañana mesmo, con igual convicción y ensin mentir, podía dicir Blas de Otero, Michel de Montaigne y Safo de Lesbos. Y pasáu mañana, quiciabes te dixere Fernando Pessoa, Álvaro Cunqueiro y Adam Zagajewski. Como dixo Rubén «plural ha sido la celeste / historia de mi corazón». Soi un llector tan inconstante como pertinaz. Traiciono muncho pero siempre vuelvo a traicionar (y acabo de facer una definición exacta de la fidelidá). Resúltame especialmente prestoso reller por una razón egoísta. Cuando lleí «A un olmo seco» d’Antonio Machado a los 16 años entendí lo que entendí; agora que lo relleo entiendo’l poema y al llector que yo yera y que volvió a esos versos a los 18, a los 20, a los 35, a los 60, a los 54. Reller ye fatalmente rellese.

6.¿El to llibru clásicu preferíu?:

Siguiendo lo dicho na pregunta anterior, dígote tres llibros que de xuro (si vida tengo) he de reller munches veces: la poesía de Jorge de Sena, «El llano en llamas» de Juan Rulfo, el cantu VI de la «Eneida» de Virxilio.

7.¿Tas trabayando en dalgún llibru actualmente?

Dende 1982, dende hai cuasi cuarenta años, siempre toi escribiendo un llibru. Y nunca fui quien a escribir ún que me consolara y me llevara a dicime: «Yá ta fecho too, nun yes quien a más».

8.¿Si tuvieres qu’escribir un llibru con otru escritor, a quién escoyeríes?

¿Agora? ¿Quién me diba aguantar agora? ¿A quien diba aguantar yo? Nos años 80, ente los que yéramos, yera mui común esi xuegu. Teníemos 20 años, había tiempu pa perder sanamente’l tiempu.

Daquella, ente Ignaciu Llope y yo inventemos a dalgún poeta (Xurde Pría yera ún, autor d’un bon versu que creo que yera de Nacho: «otru mar más amenu cincará la to cintura»); con José Luis García Martín inventé a Xuan Martín y con otros cómplices enllené de poemes aquelles «Lletres Asturianes» de l’Academia. Nun m’alcuerdo si con Adolfo Camilo Díaz llegué a publicar (más allá de dalgún panfletu) dalgo escrito polos dos. Recuerdo que per marzu de 1987 Berta Piñán, Vicente Duque y yo quedemos pa trazar el plan d’escribir una «novela total». Tenía que ser policiaca ensin crime que culpabilizar, alegórica con delles pingarates expresionistes, radicalmente poética y onde los únicos diálogos foran como lo de les obres teatrales d’Ionesco onde lo subconsciente revelao, aparentemente absurdo o a cencielles absurdo, fora dibuxando, a pingues rales, la historia de tres amigos escritores que cren na posibilidá d’escribir una novela. Nun sé, depués de falar hores y hores, díes y díes, namás escribimos el primer párrafu: «De súpeto, cuando yá naide lo esperaba, mentes en tronu la reina abrigada nun pellicu de llóndriga del Támesis asomeyaba caer nun pigazu, pero atenta bien que taba a la mano estraña que s’esmucía per baxo la saya de la condesa de Nava, el bufón empezó a contar: ». La novela diba llamase «Dos puntos» y diba tar firmada por tres puntos suspensivos. Estes coses rara vez lleguen a nayundes pero hai momentos na formación en que son importantes. Pa un escritor, tener cómplices ye tan importantes como ller.

Años depués, hacia 1994, con Fonso Velázquez y Silvia Ugidos organicemos aquello de les «Producciones Líriques S. L.». de les que naide s’alcordará, Rímonos muncho los tres de tanta solemnidá falso que gastaba daquella la poesía n’asturiano y escribimos versos absolutamente desallugaos de la ideoloxía onde nos movíemos.

9.¿Un llibru que nun fueras quien de rematar?

Soi —d’alcuerdu cola crítica— de los que siempre ta escribiendo’l mesmu llibru. El día en que lu remate, yo yá nun taré vital o intelectualmente equí. Y si me preguntes qué llibru nun fui a peracabar, tengo que dicite que munchos. Unos pocos por inconstancia, otros munchos por falta d’interés. La mayoría porque con miralos pel pris,a de la modernidá yá me teníen que dicir tolo que me teníen que dicir.

10.¿Tienes dalgún personaxe lliterariu preferíu?

Diba dicir que nengún, pero ye mentira. La Dama Escura, «The dark lady», que Shakespeare describió ente los sonetos que van ente’l númberu 127 y el 154 (anque yo creo que’l 18 tamién fala d’ella).

11.¿A qué escritor revivirías pa que pudiera siguir escribiendo?

La lliteratura anula’l tiempu sorrayándolu. Nun necesito revivir a nengún escritor arréu de que tolos que lleí viven fatalmente en mi. Puedo sentir piedá pola muerte de munchos, pola muerte de Giacomo Leopardi —yá más allá de la llocura— atopando lo infinito nel sabor de los xelaos napolitanos; pola muerte de Gillaume Apollinaire —probín mio, acabante llegar del frente, precíu de fiebre, mentes esfallecía y escuchando peles cais de París a los manifestantes aquello de «¡Muerra Guillermo!». Referíense al Kaiser pero él pensaba qu’aquel Guillermo yera él y que Francia decidiera’l so destín.

12.¿Un llibru col que llorasti?

¿Lloré alcuando depués de ller un poema? ¿Lloré cuando Anna Karenina tiróse a les víes del tren? ¿Lloré cuando Martín —«Sobre Héroes y tumbas», Ernesto Sábato— descubrió’l secretu d’Alejandra? ¿Lloré depués de ller «La fuga de la muerte» de Paul Celan? Nun lo recuerdo. Cuido que la gran lliteratura ta ente’l llantu y la risa ensin conceder nunca nin al llantu nin a la risa. Estes coses son más bien del cine, de la música o de la tresllación de lo escrito a la vida onde ún llora o ri. Llorar, lo que se diz llorar físicamente, fíxilo munches veces pero non por dalgo escrito con vocación artística. La lliteratura —entendío esto como un abstractu de xuroo qu’inconcebible— nun quier que llores: namás t’invita a qu’escuques per una resquebra l’universu.

13. El llibru que más te marcó y que-y recomendaríes a tol mundu?

La Biblia. Cuando tenía 12 años castigáronme por llela nun colexu de cures por nun facelo ensin un supervisor. Supe entós del mio destín qu’entendí con claridá nun epigrama de Passolini munchos años depués: «Trabayo pel día como un monxu / y pela nueche esgatio como un gatu. / A la Curia he-yos proponer/

que me curien como a un santu». A ver si ordena les sílabes y la canta Ambás.

14. ¿Cuála ye la to llectura actual?

Mira, dígote los llibros que tengo sobre la mesa del mio despachu: una antoloxía de la poesía finesa, de Francisco J, Úriz; «À sombra da memoría» d’Eugénio d’Andrade; un manual de 1948 de la editorial Aedos tituláu «Higiene del gallinero y enfermedades de las gallinas« del profesor F. Castelló; los cuatro tomos d’«El Don apacible» de Shólojov; les obres completes —nun tomu namás— de Cardarelli; l’antoloxía de Caveda, a la que siempre vuelvo dende 1980 buscando la sede de ser; el manual —que nun me gusta— de llingüística románica de Iorgu Iondan y Maria Manoliu; el primer y el segundu «Círculo de los mentirosos» de Jean-Claude Carrière; tamién el primer llibru de Daniel Filipe, «Pátria, lugar de exílio». Relleílos o consultélos estos díes (el de les pites por razones absolutamente práctiques).

15. ¿Un llibru que tengas munches ganes de lleer?

Ún que faiga que’l mio corazón baille al compás de la melodía del mundu. Cualesquiera de los llibros que cité y munchos que nun conozo y tarán inda por escribir (una glosa del Gilgamex, pa entendenos). ¡Volver a ller con venti años «El cuartetu d’Alexandría» de Lawrence Durrell! Esa revelación busco tolo díes.

16. ¿Tapa dura o tapa blandia?

Quiero más la tapa blando. La tapa duro, nestos tiempos que cuerren, namás encubre la mediocridá. Otra manera, cúlpome: dellos llibros mios publicáronse en tapa duro y nun creo que sían de los peores mios. Rezo porque haiga excepciones a la llei que formulo.

17. ¿Llibros llargos o curtios?

Depende siempre de la intensidá. Nun haiku pue dicise nada. Nuna novela de 950 páxines pue dicise nada. Lo difícil ye dicilo too en tres versos. Lo difícil ye dicilo too en 950 páxines. «Lo difícil ye ser entera ⁄ nel charcu breve ⁄ la lluna que se reflexa».

18. ¿Sagues o autoconclusivos?

¿Hai sagues que nun sían autoconclusives? El fatum —llamáilo si vos peta azar— ¿nun afala cola guiada de la fame’l mundu? Cuando yera adolescente prestábenme muncho les sagues porque ente otres coses na tele pública y única taben empeñaos en que nos prestaren. Yo nun sólo la vi pela tele, sinón que lleí, «La saga de los Rius», d’Ignaci Agustí; y depués lleí munches otres hasta que cansé (como la de Shólojov yá citada o la «Saga/fuga de J.B» de Torrente Ballester). La mio opinión ye la contraria a la de Heguel cuando dicía: «Abondó d’hestories, agora la Historia»; yo quiero más les hestories —l’anécdota si quieres— qu’aspiren a lo universal que la Historia que nun cuenta y namás contabiliza. Eses hestories afilvanaes pel filo de la Historia puen contase nun cuentu curtiu, nun poema, en venti tomos o en trenta páxines. L’aciertu depende de la intensidá, de la gracia de quien escriba. Si vagar tuviera diba poder reducir un poema de Kavafis a una ecuación lóxica, perfectamente compresible pa toos; pero esa ecuación lóxica resuelta por mi nunca produciría en naide un nuevu poema de Kavafis.

19. Y ya pa rematar, ¿ que llectura nos recomiendes?

Seique’l llector verdaderu nun necesita conseyos, seique necesita siacasu cómplices que lu acompañen. Dicir al escuchu una verdá y qu’el corazón del otru temble, ¡qué viciu enraigañáu nes almes que busquen! El llector, simplemente por ser llector, sábese solu y únicu. Sabe que Quevedo y Borges escribieron pa qu’él sintiera lo que siente cuando los lle, sabe que nun tien que face-yos reverencies nin da-yos nin siquiera les gracies: escribieron pa él namás y esi versu que lu conmueve foi un dardu arteramente dirixíu al so corazón (l’arte, si lu hai, naz nél, nesi versu entrañáu pol llector). Al llector que nun piensa escribir puedo recomenda-y un llibru («Les mil y una nueches», por exemplu); al llector que piensa escribir namás puedo recomenda-y que llea per onde vea y que yá llegará a onde importa si ye que pue (o en viendo les consecuencies) quier llegar. Revelase a ún mesmu nun ye fácil; ser consecuente con ello, y rebelase, menos tovía. Cadún. finalmente, que no que ye y esto nun tien remediu.

Munches gracies Xuan por participar na entrevista rescamplu, ye un placer lleete y averanos un poquitín más a los tos hábitos de llectura y creación!

Y a vosotres/os llectores, espero que vos prestara, bien llueu tendreis máis entrevistes. Podeis dexar en comentarios a quien vos prestaría que-y ficiera la entrevista rescamplu

La entrada Xuan Bello: «Dende 1982 siempre toi escribiendo un llibru y nunca fui quien a escribir ún que me consolara» se publicó primero en Formientu.

Raquel F. Menéndez: «Necesito música pa poneme a escribir»

Formientu — Tue, 12 May 2020 10:59:36 +0000

Eva Cameán, del blogue Clarión, entrevista a Raquel F. Menéndez (Vallouta, Salas, 1993) ye una escritora asturiana, graduada en Llingua Española y la so lliteratura pela Universidá d’Úvieu. Raquel escribe tanto en castellán como n’asturianu, algamando delles distinciones en dambes llingües.

Na so obra atopar llibros en castellán como Libélula (2013) col que ganó’l III concursu lliterariu de la universidá asturiana y poemes que formen parte d’antoloxíes como Poesía, alma del mundo (2014) o Siete Mundos (2015). Na so obra n’asturianu alcontramos poemes espublizaos en revistes como formientu, o la so obra El llibru Póstumu de Sherezade, col que algamó’l Premiu Nené Losada Rico nel añu 2016, y que foi tamién escoyíu pola Tertulia Malory de L’Entregu como meyor llibru n’asturianu del añu 2017.

Güei vamos a face-y la entrevista rescamplu pa conocela un poquitín más:

1. Bones Raquel, ¿Cómo lleves la cuarentena? ¿Yes del grupu que ta aprovechando’l tiempu pa lleer y escribir, o del que tamos faciéndolo menos de lo que nos prestaría?

Llévola bien, anque les obligaciones profesionales nun me dexen munchu tiempu. Ye un bon momentu pa detenese a pensar un pouquiñín más.

2.¿Qué xéneru te presta más pa escribir? Poesía.

3.¿Xéneru que más te presta lleer? De too: ensayu, autobiografía, poesía, novela. L’orde, según la temporada

4.¿Tienes dalgún vezu o zuna a la hora de ponete a escribir? Necesito música.

5.¿Qué zunes llectores mos puedes confesar? Subrayar y escribir llibros, pos-it, doblar páxines, dexar entraes, billetes de tren, autobús, metro ente los llibros.

6.El to escritor/a de cabecera (pueden ser varios): Varía según la temporada y lo que tea lleendo. Na poesía, y por escapar del asturianu y del español, Inger Christensen, Paula Meehan, Tranströmer, TS. Eliot…

7.¿El to llibru clásicu preferíu? (pueden ser varios): Depende a lo que llamemos clásicu, una etiqueta mui controvertida, según sigamos a Calvino o a Harold Bloom na definición del “clásicu”. La cosa pue andar ente El Quixote, The Waste Land de Eliot, Mrs Dalloway de V. Woolf y El sur de Adelaida. García Morales (esti últimu, na mio biblioteca, ye un clásicu absolutu).

8.¿Tas trabayando en dalgún llibru actualmente? Tengo un llibru de poesía entamáu dende va dellos años, pero por trabayu apenes-y dedico tiempu.

9.¿Si tuvieres qu’escribir un llibru con otru escritor, a quién escoyeríes? Pablo X. Suárez, somos mui diferentes (no personal y no lliterario), pero tenemos una mirada compartida sobre munches coses. Creo que, precisamente, porque lo que pue dar Pablo a la llingua asturiana nun lo puedo dar yo y pue ser que viceversa.

10.¿Un llibru que nun fueras quien de rematar? Nada crece a la luz de la luna de Torborg Nedreaas. Soi consciente de que-y tengo que dar otra oportunidá.

11.¿Tienes dalgún personaxe lliterariu preferíu? Munchos, por quedame con unu, voi dicir Andrea de Nada de Carmen Laforet.

12.¿A qué escritor revivirías pa que pudiera siguir escribiendo? A Inger Christensen, a Pizarnik, a María Teresa González.

13.¿Un llibru col que llorasti? Con tantos… por citar una llectura reciente, con dellos momentos de Coto vedado de Juan Goytisolo.

14.¿Cuála ye la to llectura actual? Lleo varies coses a la vez. Por siguir cola poesía, güei entamé una antoloxía de Joäo Cabral de Melo Neto que merqué na llibrería Poetria de Porto l’añu pasáu y que tovía nun tuviera tiempu a lleer.

15.¿Un llibru que tengas munches ganes de lleer? Ente otros munchos, Honrarás a tu padre y a tu madre de Cristina Fallarás e Introducción a Santa Teresa de Cristina Morales (tovía en prensa)

16.¿Tapa dura o tapa blandia? Blandia.

17.¿Llibros llargos o curtios? Depende del momentu.

18.¿Sagues o autoconclusivos? Lo de saga nun va muncho coles mios llectures de cabecera.

19.¿A quien te prestaría que-y ficiera esta entrevista rescamplu ? A Laura Marcos, que siempre tien mui bones idees pa estes coses.

20. Y ya pa rematar, ¿ que llectura nos recomiendes pa esta cuarentena? Dalgún llibru que tea a mano por casa y que nun se lleera (ye bon momentu pa volver a les mal llamaes ‘llectures escolares’), recomiendo tamién la páxina PoetryFoundation pal lleer poemes n’inglés, los audiolibros en francés de France Culture, Güelu Ismail de Esther Prieto que ta de baldre na páxina de Trabe…

Munches gracies Raquel por participar na entrevista rescamplu, ye un placer lleete y averanos un poquitín más a los tos hábitos de llectura y creación!

Y a vosotres/os llectores, espero que vos prestara, bien llueu tendreis máis entrevistes. Podeis dexar en comentarios a quien vos prestaría que-y ficiera la entrevista rescamplu

La entrada Raquel F. Menéndez: «Necesito música pa poneme a escribir» se publicó primero en Formientu.

Jose Manuel Menéndez: «Prestaríame conocer too Redes como un pastor d’Orllé conoz cada cachín de tarrén»

Formientu — Tue, 05 May 2020 11:27:53 +0000

Entrevista d’Eva Cameán.

Bones llectores, güei tráigovos una entrevista rescamplu diferente a les demás, ya que normalmente están feches a escritores y persones rellacionaes col mundu lliterariu. Pero güei, 22 d’abril ye’l día internacional de la Tierra, y por eso quería face-y una entrevista a dalguien rellacionao cola protección del medioambiente y la cultura. Voi presentávoslo:

Jose Manuel Menéndez (1975, Los Barreros – Llaviana ) ye un activista , guía de naturaleza y montaña asturianu, afincáu en Galiza dende neñu.

Ye’l presidente y unu de los fundadores de l’Asociación Ambiental Senda Nova, constituyida formalmente como asociación dende’l añu 2008, una entidá qu’entama actividaes y iniciatives rellacionaes col ecoloxismu y el patrimoniu cultural y social, fomentando actividaes como les rutes interpretatives, talleres ambientales, encuentros culturales, charras etc.

Jose tuvo, y tovía anguaño ta, vinculáu a munchos movimientos y entidades culturales, sociales y ecoloxistes, y a diferentes lluches sociales y ambientales tanto en Galiza como n’asturies. (movimientos rellacionaos cola oposción a la minería contaminante, alta tensión, eólicos etc).

Tolos miércoles podemos sentílu nel programa «Da Lareira a Lameira» en Radio Cerceda, un espaciu radiofónicu de la Asociación Senda Nova dedicáu al patrimoniu cultural y ambiental nel que cada selmana intervién de 12:30 a 13:00h.

Tamién entamó iniciatives mui prestoses como la Revista Abrindo Camiño, una publicación de cálter cultural y ambiental, tamién de Senda Nova na qu’él ye’l director, y na que collaboren delles persones rellacionaes con entidaes, actividaes, asociaciones, movimientos ecoloxistas, culturales, sociales etc

Amás ye un amante de’l monte y la montaña nel sentíu más románticu de la pallabra. Présta-y pola vida afayar nueves rutes, y sobremanera disfrutar del monte y de la llibertá na montaña dende un aspeutu respetuosu col mediu natural y de conocimientu y interpretación del territoriu.

Ye un amante de los mapes, y la cartografía en xeneral, y présta-y parase nuna campera a interpretar con mapa y brúxula en manu que ye lo que tien delantre.

Güei vamos conocelo un poquitín más, cola nuesa entrevista rescamplu :

-Bones Jose, que tal lleves la cuarentena? Ta siendo difícil nun poder salir al monte y disfrutar de la naturaleza?

Hai muncho que facer. Son tiempos de trabayu que tien que servir pa organizase.

-Que llugar te prestaría visitar namás rematar la cuarentena?

L’Azorea Cima. Un pueblín perrguapu del conceyu de Llaviana

-Que podemos facer dende casa pa conocer más la nuesa naturaleza, el nuesu entornu, y disfrutar d’ello dende casa? Que nos propones?

Depende, hai muncha xente que vive nel mediu natural y que ya tien la oportunidá de caltener el contactu col mesmu. Muncha d’esta dedícase a la agricultura, el pastoréu… Una bona propuesta pa los demás ye la reflexón precisamente sobro esos medios de vida y la posible necesidá d’un cámbiu al rural. Pero pa goler cuchu.

-Una entidá/movimientu ecoloxista de referencia pa ti:

Munchos, cada unu coles sos característiques. La mayor parte del trabayu de les asociaciones ecoloxistes ta tapecíu polos medios, o lo que ye peor, asoleyando demagoxes de lo que llamen un “ecoloxismu de salón” que pa nada ye real.

Prestaríame nomar cualquier entidá bien pequeña que lluche pola ecoloxía del so territoriu. La Coordinadora Ecoloxísta ye una d’eses que desendolquen un trabayu enorme y poco vistosu.

-Una acción/actividá que te marcara:

Como toos, les de bien neñu. Aquelles escursiones por Peñamayor.

-Una pequeña acción que podríamos facer cualquiera de nós:

Sofitar una entidá del nuesu rural. Los grupos ecoloxístes y les entidaes del rural tamos nel mesmu barcu por muncho qu´interese separtar.

-Una persona rellacionada col medioambiente o la cultura que te marcara y dexara posu:

Teniendo la suerte de compartir en Senda Nova tantos momentos con tantes persones y tan comprometíes cola cultura y´l mediu natural, diríate que ye un aprendizaxe continuu de xente que me marcó. Amás del trabayu constante, l’amor y compromisu de tantes persones coles que coincido y que tanto aprecio, Xan Fernández Carrera integra una cualidá dinamizadora espectacular demostrada dende va muncho. Préstame nomalu porque desendolca un trabayu cada vez más escasu ya imprescindible.

-Una anécdota que te preste recordar:

Caliau, Corcoesto, Penedos de Traba e Pasarela, Férveda de Entrecruces… tantos llugares que caltienen entá’l so patrimoniu gracies a l’activismu. Contábennos que los proyectos yeren imposibles de parar. Yera mentira.

-Dalgún momentu que recuerdes rellacionau col activismu que nun seya prestosu?

L’actividá constante nuna entidá lleva con ello una exposición a enguedellos ente persones de la organización, collaboradores, participantes, qu’acaben en dolores de cabeza.

Que les alministraciones, sobre too conceyos, s’aprovechen del llabor de les entidaes también da llugar a malos momentos. Pero nada peor que cuando toca ver como nun somos quien d’armar un movimientu organizau pa parar un proyectu antiecolóxicu.

-Sabemos que te presta facer monte, cuala ye la ruta que más te prestó facer en toos estos años?

Munches. Ensin dulda, una delles foi la que me llevó dende Caliao a descubrir el Llagu Ubales.

-Una ruta que nun podemos morrer ensin facer:

Caún la suya. Esa que tien de llau de casa y que-y sirve pa aprender más del so territoriu más averáu. Hai muncho por descubrir ensin viaxar lloñe.

-Salir al monte solu o acompañáu?

Acompañáu.

-Prestaríate tener más conocimientos/formate en:

Prestaríame conocer bien Asturies. Pero creo que me voi conformar con conocer bien l’Altu Nalón. Prestaríame conocer too Redes como un pastor d’Orllé conoz cada cachín de tarrén que llega a Melordaña. Una utopía, claro.

-El to picu preferíu:

Peñamayor.

-Una viesca que destacaríes:

Munchos fayeos del altu Nalón. Por desconocíos voi dicite la Mata Covedrá, en Llaviana. Y después la mata’l Texíu, una viesca de texos y carrascos espectacular, na cara naveta de Peñamayor

-Un animal que pondríes en valor y daríes a conocer más:

Anfíbios, reptiles… los que quieras. Toos tienen un sambenito enriba. El llobu, otru que tal.

-Un ríu que te preste:

Dende neñu siempre me sosprendió’l Nalón: díbemos pa Tarna descursión familiar y dicíenme que nacía na fonte la Nalona; crieme al par del en Los Barreros, tenía la escuela de lláu; y después d’andar daquella varies hores de coche, cruzábemoslu cerca de San Esteban de Pravia, camín de Galicia.

Que grande yera. Y yo que pequeñu.

-Un requexu col que quedasti ablucáu:

Habrálu más afayadizu nun día de monte emborrinau, qu’una cabaña guapa onde metese a comer un chorizu y beber agua con bien sede?

-Un país por visitar:

Tengo que parame a pensar porque nun pienso nello davezu. Tengo ganes de visitar la parte francesa de los Alpes.

-La próxima cume que te prestaría xubir:

Vienme a la cabeza Pena Ubina, por esto de que quedé la última vegada a cuarta y cote del cumal comiendo’l bocadillu tortiella. Ya veis entós que m’importen poco los cumales, la verdá. Delles veces digo que debo ser campeón de quedame poco antes de llegar.

-Un llibru que toos tendríamos que tener na nuesa llibrería:

Falando de monte, ta prestándome muncho l’ensayu de Pablo Batalla: “ La virtud en la montaña. Vindicación de un alpinismo lento, ilustrado y anticapitalista”.

-Un llugar nel que perdete y desconectar:

Faime falta poco. Pero polo menos pa perdeme tienen que me dexar salir de casa.

-Un suañu:

Ser capaz de vivir nel rural asturianu con los recursos que me puede dar el territoriu.

-Un llugar pa vivir:

L’Azorea Cima.

-Un propósitu personal:

Tengo qu’enfotame nello tovía. Ye de suponer que na llinia del suañu.

Cuanto me prestó la entrevista! Amás sirvióme a min mesmu pa la reflexón. Munches gracies

Munches gracies a ti por participar, allégrome que te prestara. Y graciés tamién por tol trabayu y la llabor que lleves desendolcando toos estos años, pola nuesa cultura, llingua, y Tierra. Gracies por cellebrar con Clarión el Día de la Tierra

La entrada Jose Manuel Menéndez: «Prestaríame conocer too Redes como un pastor d’Orllé conoz cada cachín de tarrén» se publicó primero en Formientu.

Inaciu Galán: «El #FormientuEnCasaFest demuestra la xenerosidá del sector cultural asturianu cola sociedá y col idioma»

Formientu — Tue, 05 May 2020 11:16:17 +0000

Eva Cameán, del blogue Clarión, entrevista a Inaciu Galán y González (1986, Xixón), escritor, periodista, profesor y activista na defensa de la llingua asturiana.

Ente la so obra destaquen llibros como Patria en pallabres menores, Tierra podre, Cartes nel horru… Pero tamién escribió llibros infantiles como Nel, el coríu que nun sabía nalar.

Forma parte de la so obra tamién el Diccionariu básicu inglés-asturianu/asturianu-inglés, asína como publicaciones rellacionaes cola toponimia, vocabulario asturianu etc.

Inaciu participó en delles publicaciones y obres collectives como revistes, diarios, llibros etc Y foi presentador de diferentes espacios en radio y televisión como Xuventú d’anguaño y Asina foi…el surdimientu (Onda peñes) por esti últimu programa algamó’l premiu Enriqueta González Rubín de periodismu.

Angüaño presenta’l programa de la TPA Mundu Sidreru y collabora col espaciu de educasturTV na Tpa dando clases d’asturianu.

Al rodiu de la lliteratura tamién algamó dellos premios como el segundu premiu nel II Concursu Minimorium de rellatu hipercurtiu por La viesca n’ochobre, mención Especial nel III Premiu de Poesía de Primavera de Piloña pol poemariu Los Xarrones de l’Alcordanza, primer premiu nel I Concursu de rellatu curtiu Muyer y participación pol rellatu Suañar en tiempu de guerra y Premiu Pepe Campo de monólogu dos vegaes, en 2006 y en 2008. Amás foi cuartu premiu nel I Certame de Rellatu Curtiu La Caleya, dau pol Conceyu d’Astorga (Lleón), pol cuentu El ruíu que facíen les piedrines.

Inaciu ye uno de los fundadores y coodirectores de la revista lliteraria Formientu, y lleva tola vida participando mui activamente nel activismu cultural al traviés de delles asociaciones y movimientos como’l Conceyu Universitariu pol Asturianu, l’Ateneu Cultural Xuan María Acebal, l’asociación cultural l’arribada, o Iniciativa pol Asturianu que presidió dende’l añu 2012 hasta’l 2019.

Güei vamos a conocelo un poquitín más cola nuesa entrevista rescamplu

Bones Inaciu, ¿cómo lleves la cuarentena?

Mui bones, Eva. La cuarentena llévola bien, nun tuvi munchu tiempu a recordar que nun podemos salir de casa. Llevaba meses mui metíu per casa, porque tuvi acabando la tesis doctoral y venía entrenáu de circunstancies asemeyaes. Con too, ye mui distinto. Cuando vi a tanta xente xugándose la vida: los sanitarios, la xente que tenía de siguir trabayando nos supermercaos, llimpiando, nes fábriques… Lo que pensé ye, ¿qué puedo aportar yo nestes circunstancies? Y entós intenté ayudar nel edificiu, ufriendo ayuda a les persones de más riesgu, animando a los vecinos del patiu como puedo: charrando, celebrando vermús les fines de selmana, etc.

Amás, como profesor d’asturianu nun institutu siguimos trabayando dende casa, unviando xeres, corrixendo, etc. Ye por ello que m’ufrí voluntariu pa poner clases d’asturianu nel programa EducasturTV na TPA, yá que tenía los medios p’autograbame en casa y amás cunto cola collaboración de Lluis Fanjul, faciendo un llabor escelente nel montaxe. Y asina, ensin planificalo muncho llevamos cuasi venti capítulos grabaos.

Y nel ámbitu cultural, pues estos díes participando en tolo que me piden: videos recitando, llectures, grabé un curtiumetraxe, presenté’l mio últimu llibru, «Cartes nel horru», que salió d’imprenta poco enantes de la cuarentena, di una conferencia online, aporté testos pa un par de llibros colectivos que salieron estes selmanes, participé en medios… Y sobre too organizando con Diego Solís el #FormientuEnCasaFest, col que llevamos 60 díes ensin parar con actividaes, gracies a la xenerosidá del sector cultural asturianu, comprometíu cola sociedá y col idioma. Tamién dende Cuatro Gotes Producciones, tamos entamando actividaes y festivales culturales con entidaes que tán apostando pola cultura asturiana nestos momentos, y presta cuando trabayes en coses nes que crees.

Con tolos proyeutos nos que tas metío, quédate tiempu pa lleer y escribir?

Hai tiempu, non muncho (rises), pero hailu. Fui seleccionáu pol programa «Asturies, cultura en rede» p’amosar en videu’l procesu creativu en cuarentena y eso valióme pa parar tamién un poco a facer por escribir y reflexonar. Anque foi duro, parase a escribir supunxo un exerciciu que me dexó mui tocáu esos díes. Lleer toi lleendo mui poco, pero toi teniendo la suerte de falar muncho con escritores, músicos y en xeneral, xente de la cultura, colos qu’agora tienes un pocoñín más de tiempu pa parase a falar per teléfonu o videoconferencia. Ye mui arriquecedor porque nunca enantes tábemos toos pasando más o menos pelo mesmo al mesmu tiempu, de forma tan global.

¿Qué xéneru te presta más pa escribir?

Depende del momentu. Creo que los microrrellatos nun se me dan mal del too. Pero tampoco tuvi’l vagar pa poneme con obra narrativo de más llargor. La poesía tamién tien un aquello de desfogar y de parase a reflexonar sobre la estética de la pallabra y tien tamién los sos momentos nos que presta.

¿Xéneru que más te presta lleer?

Lo que más me presta lleer ye ensayu ya investigaciones hestóriques y lliteraries. Va años, en clases col profesor Xulio Viejo, na Facultá de Filoloxía, pola esoyeta de llibros que fixi, díxome que paecía un llector mui prágamaticu, que buscaba obres que fueren más allá del esfrute de la llectura. Paezme qu’acertó. Préstame saber más, y eso xenérame más interés que la llectura de ficción, anque tamién hai momentos pa esi esfrute.

¿Tienes dalgún vezu o zuna a la hora de ponete a escribir?

La poesía escríbola enantes a mano y la narrativa directamente a ordenador, polo xeneral. Soi escritor nocherniegu, eso siempres.

¿Qué zunes llectores mos puedes confesar?

Nunca me fuercio a rematar un llibru si nun me presta. Nun siento arguyu de llector nesi sentíu. Si un llibru nun me presta o nun puedo con él, suelo abandonar. Hai tanto pa lleer que me paez absurdo forciase. Anque hai llibros nos que pases per partes que nun te presten y dempués camuden. Siempres te queda la dulda si abandones, eso ye verdá.

¿El to escritor/a de cabecera?:

Como poetes: Marta Mori, Berta Piñán, Nené Losada, María Esther García López, Vanessa Gutiérrez, Lourdes Álvarez… Con too, soi más d’escoyer poemes qu’autores. Por eso lo que más me presta ye les antoloxíes y llibros colectivos. Nel ámbitu del ensayu sobre llingüística, Ramón d’Andrés ye mui interesante. N’estudios de lliteratura, Vicente García Oliva y Xuan Xosé Sánchez Vicente. En narrativa préstame Milio Rodríguez Cueto, Pablo Rodríguez Medina, Xuan Bello, Esther Prieto y Adolfo Camilo Díaz. Tamién ye verdá que me presta pola vida lleer autores nuevos, pero como son toos amigos y amigues, nun tengo favoritos (rises).

¿El to llibru clásicu preferíu?

Voi dicir dos, del tiempu del Franquismu. Sol en los pomares, de Matías Conde, escritu dende l’exiliu en Méxicu, y L’alborá de los malvises, de Constantino Cabal, escritu dende Asturies por un autor cercanu al réxime. Los dos representen valores mui estremaos, pero falen de la tresversalidá del idioma y son obres d’una calidá poques vegaes iguales nel tiempu de la dictadura. Claro, qu’agora vengo mui condicionáu poles llectures pa la tesis d’estos meses trás (rises).

¿Tas trabayando en dalgún llibru/escribiendo daqué actualmente?

Tengo cosines entamaes, pero nada serio. Los meses últimos nun fueron mui creativos, tolos esfuercios diben empobinaos a escribir páxines de la tesis. Nun había munchu tiempu.

¿Si tuvieres qu’escribir un llibru con otra persona, a quién escoyeríes?: Prestaríame escribir cualquiera de los y les autores de la mio xeneración, porque siento muncha cercaía. Si de lo que falamos ye d’autores antiguos, prestaríame poder escribir a cuatro manes con Xosefa Xovellanos. Yera una muyer valiente, coles idees clares. Tampoco nun taría mal facer esi exerciciu con Enriqueta González Rubín. Son muyeres que m’apasionen poles sos obres y sobre too poles sos figures.

¿Un llibru que nun fueras quien de rematar?

Munchos. Nun avaga la vida pa lleer tolo que va acumulando unu. Na mesina suelo tener ente ocho y venti llibros que van circulando selmanes o meses…

¿Tienes dalgún personaxe lliterariu preferíu?

Xuan Bello como personaxe autobiográficu, como protagonista de les sos propies obres paezme que ta mui llográu, que consigue metete nes sos hestories.

¿A qué escritor revivirías pa que pudiera siguir escribiendo?

A Celso Amieva. La so obra n’asturianu ye mínima pero ablucante. Los versos de «Solu», unu de los pocos poemes nesti idioma, qu’amás musicó Nuberu, son perguapos: «El corazón fríu / llate picu abaxu. / Ximielga con murria / la fueya’l carbayu.

¿Un llibru col que llorasti?

Va poco, grabando un documental que toi preparando sobre muyeres escritores, tuvi con Carmen Ojea y recordaba una dedicatoria que me fixo cuando yo tenía doce o trece años y vieno de visita al mio colexu. Yera un llibru xuvenil «Betsabé no puede dormir». Y la dedicatoria diz: «Pa que sigas llorando colos mios llibros». Foi lo que-y dixi aquel día. Soi d’emocioname fácil, podría dicir munchos llibros que me fixeron llorar.,

¿El llibru que más te marcó y que-y recomendaríes a tol mundu?

Paezme mui difícil. Marcóme muncho l’Antología del Bable, proque yera l’únicu llibru n’asturiau qu’había en casa mios güelos cuando yera pequeñu. Y ver l’asturianu per escrito yera como un shock absolutu, pa min que nun tenía escolarización de l’asignatura de llingua asturiana. Sicasí, nun ye un llibru que recomendaría a naide la verdá. Pa recomendar quiero más siempres conocer los gustos de la persona y adaptame.

¿Cuála ye la to llectura actual?

Ando muncho per Orfandá, de Marta Mori. Y toi lleendo y relleendo obres en gallego-asturianu estos díes tamién, porque toi siempres intentando meyorar el mio precariu usu d’esta llingua d’Asturies.

¿Un llibru que tengas munches ganes de lleer?

«Un guaje de barrio» (Trabe, 2020), de Chema Castiello. Sacólu va unes selmanes y morrió va unos díes. Ye’l so primer llibru n’asturianu y acabó siendo l’últimu en vida. Ye una persona a la qu’apreció pol so llabor y qué meyor homenaxe que lleelu. Amás, el llibru fala de la so vida en Xixón, un Xixón mui estremáu del que viví yo, de xuru. Tengo curiosidá.

¿Tapa dura o tapa blanda?

Llibros bien editaos, con diseñu guapu y que duren. Nun me gusten los llibros d’usar y tirar.

¿Llibros llargos o curtios?

Quiero más les llectures curties. Si una hestoria pue cuntase en cien páxines nun necesito que me demuestren que son grandes novelistes con cuatrocientes.

¿Sagues o autoconclusivos?

Autonconclusivos y con finales zarraos dafechu. Al final nun quiero duldes.

Tienes curiosidá por saber que respondería nesta entrevista: Marta Mori y Xuan Bello.

Y ya pa rematar,

¿Qué llectura nos recomiendes pa estos díes?
Güelu Ismail, d’Esther Prieto. Una novela curtia y prestosa, qu’amás ta colgada de baldre gracies a la xenerosidá de l’autora y editora.

La entrada Inaciu Galán: «El #FormientuEnCasaFest demuestra la xenerosidá del sector cultural asturianu cola sociedá y col idioma» se publicó primero en Formientu.

José Ángel Gayol: «Agora lleo a un ritmu mayor del que merco, lo qu’implica un cambiu na curvatura»

Formientu — Wed, 22 Apr 2020 19:14:40 +0000

Jose Ángel Gayol (Mieres, 1977) ye un ensayista, poeta, narrador y críticu lliterariu en llingua asturiana y castellana, del que podemos alcontrar delles reseñes y artículos en diarios como La Nueva España o publicaciones como esTandoriu, Formientu, Clarín, Reloj de Arena ente otres… Jose Ángel tien diferentes publicaciones asoleyaes en dellos xéneros lliterarios, na so obra poética destaquen llibros como El llibru de les coses misterioses (2013), Los suaños y los dies (2014) o Una selmana y otros díes (2015), nel xéneru teatral Ensín noticies del fin del mundu (2011), na narrativa tenemos la so obra Argonautes (2007), y nel xéneru ensayísticu les obres Vértigu (2016), Exercicios d’asturianu (2016) y el so últimu llibru En primera persona (2019). Algamó dellos premios como El premiu Asturies Xoven de testos teatrales , nel añu 2010 cola so obra Ensín noticies del fin del mundu. Al añu siguiente, nel 2011 fíxose colos premios Elvira Castañón, y Fernán Coronas. Nel 2012 algamo´l premiu Xuán María Acebal de poesía, nel 2015 el premiu Fuertes Adevedo de ensayu, y foi nel añu 2018 cuando ganó’l II concursu de rellatos curtios Xosé Caveda y Nava.

Güei vamos face-y la entrevista rescamplu pa conocelo un poquitín más:

Bones Jose Ángel, ¿Cómo lleves la cuarentena? ¿Yes del grupu que ta aprovechando’l tiempu pa lleer y escribir, o del que tamos faciéndolo menos de lo que nos prestaría?

Siempre lleo y escribo menos de lo que me prestaría, pero nun me pueo quexar. La verdá que toi aprovechando pa lleer y correxir. De fechu, lleo a un ritmu mayor del que merco, lo qu’implica un cambiu na curvatura que ye vezu míu cuando se trata d’acorrompinar la casa de llibros.

Respective a la escritura, escribo tolos díes: a vegaes, solo corrixo, les más d’elles, y otres hores dedícoles a avanzar en dalgún proyectu pendiente. El siguiente diariu ta en marcha de contino.

¿Qué xéneru te presta más pa escribir?

Nun tengo mui claro qu’heba xéneros nidios na mio escritura. Como punxi dayuri, dame la sensación que siempre escribo ensayu, masque formalmente me mande de recursos d’otros xéneros. Ye como un arume soterrañu. Lo que más escrito tengo, en tou casu, ye rellatu curtiu y lo que menos espublizo. Seique lo que más me presta escribir y aquello per ónde entamé. Tengo’l caxón enllenu de rellatos inéditos. Dalgún día saldrán. O non.

¿Y qué xéneru que más te presta lleer?

Salto d’unos llibros a otros, y toos alimenten con independencia del xéneru que llea o’l xéneru qu’escriba. La poesía influye na narrativa, y la narrativa nel ensayu, y el teatru na poesía, y la pintura na lliteratura, y el cine… Cuido que la lliteratura respira’l mundu en que vivimos y abulta mui complicao cerrar con puertes y ventanes les artes y los xéneros.

¿Tienes dalgún vezu o zuna a la hora de ponete a escribir?

Tar en silenciu y arrodiáu de les ferramientes que necesito pa ello. Según cuadre, un ordenador o una llibreta. Pero en silenciu. Tampoco soi ríxidu. Dacuando la inspiración atropéllame nuna cafetería o otru sitiu públicu. Entós saco la llibreta que llevo siempre conmigo. Sicasí, eso son los rellumos. El trabayu vien depués: xuncir tolos cachos que guardo esperdigaos per cuadernos de notes.

¿Qué zunes llectores mos puedes confesar?

Lleer llibros al empar y de distintos xéneros. Yá nun tengo edá pa garrar una novela de mil páxines y calzámela nun solu día (hubo un tiempu que yera quien pa ello y con frecuencia).

¿El to escritor/a de cabecera?:

Nun soi mitómanu. Hai escritores que me presten especialmente y que lleo y relleo. Richard Ford, Colette, Miguel de Cervantes, Pio Baroja, Rafael Argullol, Emmanuel Bove, Amélie Nothomb, P. G. Woodhouse, Miguel Delibes…

¿El to llibru clásicu preferíu?

Don Quixote de La Mancha. El teatru de Lope de Vega. La poesía del “divín” Fernando de Herrera. Y Veinte mil leguas de viaje submarino, de Julio Verne, claro.

¿Tas trabayando en dalgún llibru o escribiendo daqué actualmente?

Tengo varios proyectos abiertos. Tenía nueve o asina, y agora deben quedame siete. Quiero completar esos proyectos y nun siguir tirando per siendes nueves. Si se m’ocurre dalgo, intento llevalo a dalgún proyectu en marcha, o al diariu. Cuando termine esos proyectos la mio idea ye dexar de publicar o inclusive d’escribir. Cuando m’entren ganes d’escribir una novela nueva, espero hasta que me pasen.

¿Si tuvieres qu’escribir un llibru con otru escritor, a quién escoyeríes?

A naide, de mano. Supongo que tendría que pensalo muncho. Escribí un poemariu con un amigu y enfadóse conmigo atribuyéndome una acusación de la que nun yera culpable. En pallabres de García Martín, nun m’importa que dalguién m’aborreza. Lo que me molesta ye que m’aborrezan con bonos motivos. Nesti casu concretu, nun había motivu. Dolióme muncho.

¿Un llibru que nun fueras quien de rematar?

Munchos. Como dixo Thoreau, hai que lleer los meyores llibros primero, lo más seguro ye que nun algames a lleelos toos.

¿Tienes dalgún personaxe lliterariu preferíu?

Non, solo cierta querencia por dalgunos como Jaime Febrer, Jeeves o Frank Bascombe.

¿A qué escritor revivirías pa que pudiera siguir escribiendo?

Tolos escritores tienen una decadencia. Namás los que muerren mozos pudieron ver la so carrera rota enantes de tiempu. Reviviría a John Kennedy Toole. Polo menos pa saber per ónde siguiría escribiendo.

¿Un llibru col que llorasti?

Los muertos mandan, de Vicente Blasco Ibáñez. Yera mui mozu daquella.

¿Cuála ye la to llectura actual?

Toi lleendo o relleendo dellos llibros. Acabo terminar El arte de la lectura, de David Trigg. Ye un repasu a pintures de tolos tiempos, dalgunes comentaes, onde apaecen llibros o persones lleendo. Sirve d’hestoria del llibru y de la llectura. Una maraviya como oxetu tamién. Toi con tranquilidá y gociu avanzando con Visión desde el fondo del mar, de Rafael Argullol. Un llibru inagotable. Y tamién ensin priesa colos Cuentos completos, d’Edgar Allan Poe, na edición española de Penguin.

Toi reellendo Fábules, Teatru y Romances, d’Antón de Marirreguera. Vuelvo siempre a los clásicos n’asturianu (tamién Acebal, Fernán Coronas…) porque atopo ehí un manexu sobresaliente de la llingua difícilmente repetible angüaño. Toi terminando’l Drácula, de Bram Stoker, en versión asturiana de Pablo Suárez. Terminé esta selmana Viaje del Parnaso y otras poesías, de Cervantes, Morte em Pleno Verão e outros contos, de Yulio Mishima (n’edición portuguesa de Relógio d’Agua), y El surco del tiempo, d’Emilio Lledó.

Y pa terminar, a poco y a poco, toi lleendo un llibru d’ensayos y cites sobre l’oficiu del traductor o traductora. Un llibru tan bayurosu de suxerencies que tengo que parar cada dos páxines p’anotar dalgún cabilgamientu que se m’ocurre nun continuu diálogu cola llectura. Titúlase Pedir la luna. Una reflexión colectiva sobre el arte de traducir. Mui útil pa ún de los proyectos que tengo abiertos (un ensayu sobre la crítica y la traducción lliteraries).

¿Un llibru que tengas munches ganes de lleer?

Tolos que tengo mercaos y ensin lleer.

¿Tapa dura o tapa blanda?

Depende del momentu y de la situación. Dame lo mesmo siempre que tea bien editáu.

¿Llibros llargos o curtios?

Cada hora del día pide un menú lliterariu propiu. Solo pido que sía bonu. Eso sí, si ye un llibru llargu, ha ser bonu. En casu contrariu, nun m’esmolezo un res si lu abandono.

¿Sagues o autoconclusivos?

Hai sagues perbones siempre que l’autor sepa cuándo terminar. Pasa lo mesmo que coles series de televisión.

¿A quien te prestaría que-y ficiera esta entrevista?

A mi prestaríame saber qué diría Xosé Ánxelu Gutiérrez Morán.

Y ya pa rematar, ¿qué llectura nos recomiendes pa esta cuarentena?

Home, por recomendar cuido que l’últimu llibru míu pue ser un bon acompañamientu. En primera persona (asoleyáu por Trabe) ye un diariu ensayísticu o ensayu diarísticu nel que tamién hai cuentos, poemes, anécdotes, cites… En resume, quixi escribir un llibru entreteníu onde cualquier llector o llectora atope páxines valioses. Nun sé si lo conseguí.

Milenta gracies Jose Ángel por participar na entrevista rescamplu. Ye un placer lleete y averanos un poquitín más a los tos hábitos de llectura y creación.

Esta ye una entrevista bien especial pa min, por que como ya cunté delles veces, el mio primer llibru (que tuvi y que lleí n’asturianu) foi precisamente El llibru de les coses misteriores. Que ye tamién l’únicu llibru na mio estantería que ta tremao d’apuntes, tornes, etc. porque taba entamando a lleer y deprender asturianu y nun entendía nada!. Sigue prestándome garralu davezu pa lleelu y pa comprender d’un xeitu diferente los poemes, y ver les pallabres qu’enantes nun entendía.

La entrada José Ángel Gayol: «Agora lleo a un ritmu mayor del que merco, lo qu’implica un cambiu na curvatura» se publicó primero en Formientu.