Güei, y de forma inesperada, morría a los sesenta años l’escritor Xuan Bello. Bello dedicó la vida a la lliteratura asturiana. Autor d’obres fundamentales como ‘Hestoria universal de Paniceiros’ axuntó na so narrativa una visión humana y señardosa sobre la memoria, la identidá y el paisaxe. La so obra foi tornada a diferentes idiomes y ye unu de los escritores asturianos con más proyección internacional.
Instituciones como l’Academia de la Llingua Asturiana, el Gobiernu d’Asturies o entidaes como Iniciativa pol Asturianu amosaron la so pena pol fallecimientu del escritor.
Xuan Bello foi una de las voces más significativas de la lliteratura asturiana contemporánea. La perda del autor, reconocíu nel añu 2017 col Premiu Nacional de Lliteratura que conocede l’Academia de la Llingua Asturiana, xenera un vacíu irremplazable en el ámbitu cultural y lliterariu asturianu.
Foi tamién un incansable militante de la reivindicación de la oficialidá de la llingua asturiana, collaborando de siguío con entidaes como Iniciativa pol Asturianu. Prueba d’ello foi la so disposición permanente a collaborar en toles actividaes pa defender la necesidá de llograr esta declaración pa la so llingua materna. Nel añu 2018 participó nel I Seminariu ‘Oficialidá, el camín constitucional de futuru pal asturianu’. L’autor presentó la ponencia ‘La oficialidá y el desarrollu cultural d’Asturies’ na qu’afalaba a la convivencia y nel respetu ente les llingües y la defensa de la oficialdá como un pilar democráticu. Xuan Bello recordó na esposición que ‘Falar una llingua ye poseer una conocencia del mundu más o menos perfectible’.
La organización de reivindicación llingüística Iniciativa pol Asturianu dio anuncia de que va entamar un actu d’homenaxe dientro del IV Día de la Llingua Asturiana na Feria de Muestres d’Asturies que se va celebrar el sábadu 16 d’agostu. L’asociación va proponer una llectura a micrófonu abiertu de la obra ‘Hestoria Universal de Paniceiros’ pa espardir la so obra cimera faciendo partícipe a tola sociedá.
