La Feria del Llibru de Xixón (FeLiX) entama esti miércoles 18 de xunu y va durar hasta’l domingu 22. La cita, una de les más importantes del panorama lliterariu de la península, ocupará’l Paséu de Begoña y la cai Tomás y Valiente mientres cinco díes cargaos d’actividaes pa tolos públicos. Autores de renome n’Asturies y España como son Sara Mesa, Sergio Fanjul, Pilar Sánchez Vicente o Berta Piñán tarán compartiendo espaciu con llibreríes, editoriales y, por supuestu, el públicu famientu de lliteratura que cada añu fai d’esta feria un referente dientro y fuera d’Asturies. Na la so octava edición, la feria cuenta esti añu 2025 con 90 casetes rexentaes por editores y llibreres y un total de 100 actividaes qu’inclúin firmes de llibros, charres, alcuentros, proyecciones, conciertos y talleres.
Namás el 9% de les actividaes van ser n’asturianu
La FeLiX vuelve a demostrar esti añu una falta d’atención preocupante pa cola lliteratura n’asturianu. Nesti momentu d’espoxigue que viven les lletres asturianes, llama l’atención que, de les 100 actividaes programaes, namás 9 tán dedicaes a la lliteratura n’asturianu. Ésto ye tovía menos que lo ufiertao na útima edición del POEX (Festival de Poesía de Xixón) onde hasta un 13% de les actividaes taben dedicaes a la lliteratura n’asturianu. Hai que dicir tamién que ningún de los actos programaos va emplegar el gallegu d’Asturies como llingua vehicular. Sicasí, l’asturianu sobrevuela la FeLiX too siguío, cola participación d’una montonera de figures qu’escriben na nuesa llingua, anque en dellos casos estes intervenciones tengan llugar n’actos que van desendolcase en castellán (seya como presentadores o acompañando autores).
La sección d’actividaes n’asturianu de la FeLiX
La programación n’asturianu de la FeLiX d’esti añu ye escasa, pero potente. La llista d’actos que van tener llugar na llingua llariega ye la siguiente (añadimos como mención especial la presentación del poemariu trillingüe d’Esther García López, anque tea programada en castellán):
Miércoles 18
Carolina Lamarche presenta la novela La Asturiana. Traducción de Xandru Martino (Delallama, 2025). En conversación col traductor – 18.45 na Carpa Alborá.
Marta Mori presenta la revista Lliteratura. Con Inaciu Galán, Noelia Ordieres y Xabier Cayado – 20.30h na Carpa Atalaya.
Xueves 19
Pablo Rodríguez Medina presenta la novela El pesu de la nieve (Trabe, 2025) IV Premiu Novela Curtia Andrés Solar Santurio, en conversación con Esther Prieto y Darío de Dios – 17.00h nel Patiu del CCAI.
Pelayo Olái presenta’l llibru de rellatos Fuxir (Cuatro Gotes Producciones,2025) en conversación con Inaciu Galán – 18.45 na Carpa Alborá.
Marina Pangua Cuesta presenta la novela Pel norte n’El Cantu Llunada (Trabe, 2025) I Premiu Muyer de Narraciones Trabe. En conversación con María Fernández Abril y con actuación musical del grupu La Ciudá nel mar – 20.30 nel Patiu del CCAI.
Vienres 20
Eva Rami presenta’l llibru infantil Asturies de l´A a la Z (Eva Rami Studio, 2025). Presentación con taller d’ilustración pa neños y neñes d’ente 4 y 8 años – 18.00h na Escuela de Comercio.
Berto García presenta’l poemariu Cinética (Cuatro Gotes Producciones, 2025) en conversación con Inaciu Galán – 18.30 na Carpa Alborá.
Domingu 22
Gremiu d’Editores d’Asturies. Presentación del Proyectu Día del llibru / San Xurde. Intervienen Alicia Álvarez, Daniel Álvarez y Rafa Gutiérrez Testón – 13.45 na Carpa Alborá.
Esther García López presenta’l poemariu Por la senda del viento (Orpheus Ediciones Clandestinas, 2024). Haikus n’edición trillingüe (castellán, asturianu y xaponés) illustrada por Eva Sakai. En conversación con Juan Ignacio González – 17.30 na Carpa Atalaya.
Sergio Buelga presenta la novela L’equipu Texu (Ediciones Radagast, 2025) en conversación con Xon de la Campa – 19.00 na Carpa Alborá.
Puedes atopar más información y la programación completa equí.
