Marián García y Xurde Fernández ganen el XVIII Premiu María Josefa Canellada

Marián García y Xurde Fernández ganen el premiu XVIII María Xosefa Canellada de lliteratura infantil y xuvenil en llingua asturiana cola obra Ascensoristes S.A. La novela premiada presenta una trama alredor de viaxes nel tiempu adaptaos a la realidá adolescente.

Al concursu presentáronse una decena d’obres tanto de narrativa como de poesía. De les obres presentaes, determinóse qu’Ascensoristes S.A., de Marián García y Xurde Fernández, yera la merecedora d’esti XVIII Premiu María Xosefa Canellada de lliteratura infantil y xuvenil n’asturianu. Asina lo decidió por mayoría’l xuráu, aconceyáu nel Ayuntamientu de Cabranes, que destacó “la fluidez y dinamismu d’una obra que retoma la idea de los viaxes nel tiempu filándola con referencies culturales a la historia d’Asturies”.

El xuráu tuvo compuestu por Milio Rodríguez Cueto, ganador de l’anterior edición; Gerardo Fabián, alcalde de Cabranes; Alonso Zamora, fíu de María Josefa Canellada; Alba Carballo López, filóloga y Alba Sánchez Batalla, docente de llingua asturiana. Como presidenta actuó Juncal Mónica García Velasco, xefa del Serviciu de Planificación y Normalización Llingüística, y como secretariu, Xosé Miguel Suárez Fernández.

Marián García

Marián García (Xixón, 1975) ye llicenciada en Filoloxía Española y especialista en Filoloxía Asturiana. Anguaño trabaya de profesora d’Educación Secundaria en Xixón. Ye autora, xunto con Xurde Fernández, de les noveles El color del escaezu, y Aeropuertu, de llibros xuveniles y infantiles como Febreru 29 o L’árbol de la verdá, asina de materiales pal enseñu d’asturianu. Tamién tien traducíes al asturianu delles obres de teatru: Dormiyosos, Formigues, Les piripirates y The Asturian Sisters.

Xurde Fernández

Xurde Fernández (Candás, 1975) ye doctor n’Equidá, Igualdá y Innovación educativa, llicenciáu en Filoloxía española y especialista en Filoloxía asturiana. Ye profesor d’Educación Secundaria en Cantabria. Como autor, publicó llibros de poesía (Difícil), de cuentos (Díes d’iviernu, Premiu Llorienzu Novo Mier), noveles (Intentu d’escritura. Premiu de la Crítica), llibros xuveniles (como la serie protagonizada por Ariel y Berta), espectáculos (Palabres. Premiu de la crítica RTPA) y llibros pal enseñu de llingua asturiana xunta Marián García. Les sos últimes obres son la novela Caledonian Road y l’espectáculu Llamada a conceyu.