Claudia Gutiérrez Lueje (Cangues d’Onís, 1995) ye la ganadora de la quinta edición del Premiu «Enriqueta González Rubín» de Narrativa Moza n’asturianu, que promueve la Conseyería de Cultura, Política Llingüística y Deporte. La so novela Diariu indecente d’una docente foi reconocida pol xuráu del gallardón por «la bona construcción dende’l puntu de vista formal, l’equilibriu na estructura y la so naturalidá espresiva». El xuráu valoró, amás, el nivel xeneral tan altu y la diversidá de les obres presentaes.
Esti xuráu taba formáu por Blanca Fernández Quintana, escritora y profesora; Sofía Fernández Castañón, escritora y realizadora audiovisual y Llucía Menéndez Suárez, filóloga y profesora. El director xeneral d’Acción Cultural y Normalización Llingüística actuó como presidente y Laura Marcos, filóloga adscrita al Serviciu de Planificación y Normalización Llingüística, como secretaria. La escritora moza presenta un rellatu amenu ambientáu nel viaxe d’estudios d’un centru de secundaria.
El Premiu «Enriqueta González Rubín» de Narrativa Moza n’asturianu ta dotáu con 3.000 euros. El Gobiernu d’Asturies impulsó’l gallardón nel 2021 pa reconocer el talentu de la producción lliteraria de les voces nueves de la lliteratura en llingua asturiana. Nes ediciones anteriores, el premiu recayó nos escritores Blanca Fernández Quintana, Andrés Fernández Menéndez y Beatriz Quintana Coro.
Claudia Gutiérrez Lueje estudió’l grau de Llingua Española y Lliteratura con minor en Llingua Asturiana y exerce como profesora de Secundaria. Nel ámbitu de la llingua asturiana, participó na revista lliteraria Formientu y ganó dellos premios en certámenes lliterarios, como’l concursu Entaína a escribir de microrrellatos improvisaos o Qué guapo ye querese, entamáu pola Oficina de la Llingua de Xixón. Mui vinculada al deporte de monte, tamién fixo collaboraciones audiovisuales n’asturianu de temes deportivos nel programa Sentir Asturies emitíu en RTPA y na plataforma online Play Presta.
