Les obres escrites n’asturianu van poder optar a los Premios Nacionales de Lliteratura a partir del 2026. Esta midida reconoz l’asturianu como llingua de creación lliteraria y abre nueves oportunidaes p’autores, editoriales y el sector cultural asturianu. La conseyera Vanessa Gutiérrez quixo agradecer al ministeriu “la sensibilidá y el compromisu pa facer posible un avance históricu llargamente demandáu”.
Esta decisión, anunciada güei nel Congresu de los Diputaos pol ministru de Cultura, Ernest Urtasun, supón un fitu históricu que reconoz esplícitamente el valor creativu y cultural del asturianu dientro de la pluralidá llingüística del Estáu. La conseyera de Cultura, Política Llingüística y Deporte, Vanessa Gutiérrez, amosó’l so apoyu a esta midida: “Asturies venía reclamando esti pasu de forma repitida nes xuntes manteníes col ministru dende comienzos de la lexislatura y güei dase cumplimentu a esa petición”.
“Ye una noticia que recibimos con muncha alegría. Llevábamos munchu tiempu plantegando esta petición al Ministeriu de Cultura y celebramos que se materialice. Polo que correspuende agracer a Ernest Urtasun y al so equipu’l facer posible un avance mui importante nel reconocimientu del asturianu como llingua de creación literaria, y un impulsu pa nuestros autores y editoriales”, destacó Gutiérrez. Tamién agradeció públicamente “la sensibilidá mostrada pol ministeriu” y sorrayó qu’esta midida “corrixe una ausencia y discriminación respective a los artistes que s’espresen n’otros idiomes del Estáu, y incorpora al asturianu y a los nuestros creadores al máximu circuitu de reconocimientu lliterariu”.
Dende 2024, el ministeriu yá contempla que les obres en llingües con reconocimientu estatutariu, como l’asturianu, opten a les ayudes estatales pa la creación lliteraria. Estes polítiques ampliáronse a otros programes de sofitu al sector del llibru, la llectura, la traducción, la edición y el cómic, asina como a la presencia d’autores y obres en feries
internacionales.
La inclusión del asturianu dientro de los Premios Nacionales de Lliteratura españoles supón un pasu más dica’l reconocimientu efectivu de la llingua de nueso como idioma de plenu derechu dientro del ecosistema cultural del Estáu español. El Gobiernu d’Asturies tendrá que siguir collaborando col Ministeriu de Cultura nel desenvolvimientu de polítiques qu’impulsen la creación lliteraria n’asturianu y fortalezan l’ecosistema cultural d’Asturies, buscando garantizar mesmo los derechos culturales que los llingüísticos.
