L’espaciu Llaboral Centru d’Arte acueye una vuelta más esta fin de selmana una nueva edición de LABShop Mercáu d’Arte y Diseñu. Esti eventu bianual axunta dende 2008 a un nutríu grupu de creadores, diseñadores y editores independientes nun espaciu pensáu pa promocionar esti tipu d’actividaes. Amás del propiu mercáu y de la zona gastronómica, la programación de LABShop Iviernu 2025 que va cellebrase los díes 20 y 21 d’avientu inclúi conciertos, talleres, cine, teatru de títeres, cosplay, sesiones DJ, creación poética en vivo, alderiques y zona infantil.
LABShop Iviernu 2025: tradición y contemporaneidá
La propuesta musical d’esti LABShop entama’l Sábadu a les 12:30 h con un taller de baille del Grupu Folklóricu Trebeyu Xixón. Yá de tarde, a les 19:00 h podrá esfrutase del conciertu d’Antonio Irún y Los Lobos, que tarán presentando’l so últimu trabayu Ciudad Plateada; y a les 20:30 h sedrá’l turnu de Los Acebos, rock alternativo dende Asturies. El domingu 21 va abrir a les 12:00 h col taller musical «Trai la to propia pandereta» al cargu del grupu Pandereteres de Somiedu, pa siguir a les 13:30 h col conciertu de Querida Margot, que tarán presentando’l so nuevu discu Deuce; y pa de tarde, a les 19:00 h conciertu de Luis Fercán. Amás habrá sesiones DJ mientres tola xornada.
Esta edición del LABShop Iviernu va cuntar con más de 90 puestos y una ufierta de 22 talleres pa tolos públicos. Amás de la programación abierta l’amplísimu abanicu d’opciones que precisen inscripción inclúi dende talleres d’acebache o cestería hasta fanzinos, costura, estampación, collage o bordáu tradicional palestinu, ente otres propuestes.
Nun dexes de consultar tola información na páxina oficial LABShop Mercáu d’Arte y Diseñu.
