L’escritor y académicu Inaciu Galán va participar nuna mesa redonda representando a la lliteratura asturiana nel actu
L’Academia Aragonesa de la Lengua entama’l próximu 18 de febreru la I edición de “Voces d’Aragón – Veus d’Aragó”, anguaño dedicada al poeta y escritor Ánchel Conte, sol lema “La voz que no s’amortará”, que s’adelanta a los actos de celebración del Día Internacional de la Llingua Materna. L’actu va tener llugar nel Aula Magna del Paraninfu de la Universidá de Zaragoza, a partir de les 16:30 hores.
La xornada va abrise con un actu inaugural nel que van intervenir el vicerrector de Cultura de la Universidá de Zaragoza, Eliseo Serrano, el presidente de l’Academia Aragonesa de la Lengua, Javier Giralt, el director del Institutu de l’Aragonés, Juan Pablo Martínez, y Ignacio Barroso, home d’Ánchel Conte.
De siguío, va celebrase un bloque de ponencies sobre’l legáu y la obra del autor, cola participación de Juan José Generelo, Chusep-Raúl Usón y Antonio Pérez Lasheras.
De siguío, va desenvolvese una mesa redonda sobre la escritura en llingües minorizadas, moderada pola académica Marta Marín Bráviz, cola participación de Lucía López Marco, Inaciu Galán y Merche Llop Alfonso, escritores en llingua aragonesa, asturiana y catalana, respectivamente. La xornada va concluyir con una sesión musical al cargu de Gabriel Sopeña y un brinde final na alcordanza d’Ánchel Conte.
Participación asturiana
Inaciu Galán, escritor y miembru de númberu de l’Academia de la Llingua Asturiana, tradució obra d’Ánchel Conte al asturianu y tien llazos cola llingua aragonesa dende va años, participando n’actividaes n’Aragón en delles ocasiones y collabora dende la so faceta d’activista en campañes conxuntes ente la comunidá llingüística aragonesa y asturiana. Amás, el so llibru de rellatos «Cartes nel horru» foi traducíu al aragonés pol director del Institutu de l’Aragonés, Juan Pablo Martínez, y editáu por Gara d’Edizions como «Cartas en l’horrio (y atras historias)» nel 2024.
