En Formientu nun sabemos (nin queremos) tar paraes y queremos aprovechar la sonadía d’esta celebración de los yá 20 años de revista de lliteratura mui moza p’abrir plazu de recepción de testos. Estos testos dirán yá non pal númberu 21, que ta nel fornu y a poques de salir (¡andái sollertes, que va venir cargaín de novedaes!)… sinon que buscamos orixinales pal númberu 22 que sacaremos pal 2027.
El plazu ta abiertu hasta’l llunes 6 d’abril y quien quiera participar nesti númberu 22 de Formientu tien qu’unviar la so propuesta a info@formientu.com colo siguiente:
- Obra breve, de cualquier xéneru lliterariu (inclúi cómic, traducción, ensayu, teatru, rellatu, poesía y formatos híbridos) n’asturianu.
- Biografía breve del autor o autora.
Los únicos requisitos son: escribir n’asturianu o eonaviegu y ser menor de 35 años.
* Por si dalguien tovía tuviere duldes: nun van almitise obres qu’atenten contra la dignidá de cualisquier persona o colectivu, que manifiesten opiniones machistes, homófobes, tránsfobes, capacitistes, xenófobes o de cualisquier otra clas d’odiu. Ésto nun quita de que la temática pueda tratar esos temes, pero’l tratamientu de los mesmos ha ser clara y decididamente empobináu a promover la tolerancia y los valores éticos mínimos.
Formientu: recepción de testos y novedaes
La llegada del nuevu director Raúl Alonso marca una nueva etapa pa la revista: nueva estética, nuevos enfoques pero los mesmos compromisos. Estos cambeos van poder vese yá nel númberu 21 de la revista, que ta nes últimes fases del procesu editorial y va asoleyase esta primavera.
El trabayu de Formientu ye una xera constante: la publicación d’un númberu nun ye sinon otru fitu nesta carrera de fondu ensin meta na que tamos involucraes. Ello ye que siguiremos agospiando a toes aquelles persones menores de 35 años que quieran dar a conocer la so obra n’asturianu, siguiremos curiando’l rexistru llingüísticu cola intención normalizadora que nos caracteriza, siguiremos siendo nexu d’unión y puntu d’alcuentru pa xente mozo que vive y s’espresa na nuesa llingua; queremos seguir siendo’l llugar nel qu’escritores y llectores atopen un espaciu seguru pa compartir el so gustu poles nueses lletres.
