La Residencia Lliteraria Xixón sigue cola so programación d’estancies creatives y actividaes culturales y tien esti mes d’abril al escritor arxentín Juan Vitulli esfrutando d’una estacia creativa. L’autor, profesor nos Estaos Xuníos, va protagonizar un alcuentru lliterariu’l vienres qu’entra, 24 d’abril, a les 20 hores, na Llibrería de bolsillo (Xixón).
Sol títulu «Diálogu na piscina con Juan Vitulli», que fai referencia a la presencia de les piscines nos sos llibros, l’alcuentru va ufiertar un recital de testos y una charra abierta sobre’l procesu creativu del autor. Vitulli va tar acompañáu por Inaciu Galán, director de la Residencia, con quien va parolar sobre la trayectoria de la so escritura. Mientres l’eventu, el públicu va poder conocer de primer mano los detalles del proyectu nel que Vitulli trabaya mientres la so estancia en Asturies: una novela asitiada nel Mediu Oeste americanu, n’Ohio.
Juan Vitulli (Rosario, L’Arxentina, 1975) ye una de les voces más destacaes de la lliteratura arxentina contemporanea venceyada a l’academia y la creación. Doctor en Filoloxía Hispánica y profesor na Universidá de Notre Dame (EE.XX.), desenvolvió una sólida trayectoria basada nel ensayu críticu y la ficción.
Ente les sos obres más destacaes atópense los llibros de rellatos ‘Mis piletas alemanas’ o ‘Interiores’ y los sos trabayos d’investigación sobre’l barrocu y la lliteratura transatlántica.
Residencia Lliteraria Xixón
La Residencia Lliteraria Xixón ye un espaciu dedicáu a la creación y l’intercambiu cultural. L’escritor y xestor cultural Inaciu Galán punxo a disposición esti espaciu nel 2023 pa facilitar la llugar de creación lliteraria y promover el diálogu ente escritores de diferentes procedencies, llingües y estilos. Dende la so apertura, la RLX recibió a numberosos autores y traductores estatales ya internacionales, afitándose como una exa fundamental na vida cultural de Xixón.
Contactu pa prensa:
Inaciu Galán (+34 615 982 816
