El conceyu de Bimenes vuelve a convocar el so concursu lliterariu más especial, el Concursu de Cuentos pola Oficialidá, un certame que conmemora la histórica declaración d’oficialidá del asturianu nel conceyu allá pol añu 1997.
El XXVII Concursu de Cuentos pola Oficialidá del Asturianu ye la oportunidá de que cualquier persona qu’escriba n’asturianu pueda xunise a un grupu selectu de figures lliteraries de les nueses lletres qu’inclúi nomes como Héctor Pérez Inglesias, Montse Garnacho, Francisco Álvarez, Pablo Rodríguez Medina, Solinca Turbón, Miguel R. Monteavaro, Isabel Gutiérrez Novo o Xulio Vixil, ente otros.
Bases reguladores DEL XXVII Concursu de Cuentos pola Oficialidá del Asturianu
1.- Los cuentos han de tar redactaos en llingua asturiana, respetando les normes ortográfiques vixentes. Sedrán inéditos, de tema llibre, non premiaos n’otros concursos lliterarios y non suxetos a compromisu d’edición.
2.- Los rellatos han de tener una estensión máxima de 10 folios y presentase mecanografiaos a doble espaciu, per una sola cara. Unviaránse l’orixinal en papel y una copia en versión informática (CD o llápiz USB). Cada autor o autora nun podrá presentar namás qu’una obra.
3.- Les obres, ensin firma, tienen de presentase con nomatu. Ésti apaecerá nuna plica, en sobre zarráu, onde constarán nome y apellíos del autor o autora, númberu del DNI, teléfonu de contautu, señes y currículu (con semeya).
4.- Los cuentos han d’unviase a: Ayuntamientu Bimenes (pal XXVII Concursu de Cuentos polaOficialidá del Asturianu). Plaza de Miranda de l Douro, s/n. CP 33527 – Martimporra (Bimenes). Afítase’l teléfonu de contautu ya información que vien darréu: 985700004.
5.- El plazu de presentación fina’l día 25 de mayu de 2026 (fecha del matasellos de correos).
6.- El xuráu tará compuestu por trés miembros cualificaos y presidíu pol Alcalde de Bimenes. Los sos determinos nun podrán retrucase. Cualesquiera de los premios podrá quedar desiertu, según determín del mesmu.
7.- Les obres premiaes sedrán propiedá d’esti Conceyu y nun se devolverá d’oficiu nengún de los trabayos presentaos. Amás, la persona ganadora del concursu tará a disposición del
Conceyu Bimenes pa formar parte del xuráu nes dos ediciones siguientes, polo que, nesi tiempu, nun podrá participar nel certame.
8.- Nel actu institucional d’entrega premios, a celebrar na fecha qu’afite’l Conceyu Bimenes
tres l’apertura de pliques, fadráse una llectura pública del cuentu ganador del primer premiu na voz del so autor o autora.
9.- Afítense los premios que vienen darréu*:
Primer premiu ……………………………. 700 €
Segundu premiu …………………………. 525 €
Tercer premiu …………………………….. 300 €
10.- La participación nesti concursu lleva con ella l’aceutación dafechu d’estes bases.
* Fadráse la retención del 15 %, correspondiente al IRPF, a aquellos premios que pasen de los 300 €.
Dende Formientu animamos a participar nesti concursu, una iniciativa que qu’amuesa la voluntá normalizadora de Bimenes como conceyu comprometíu colos derechos llingüísticos de los y les falantes d’asturianu.
