La Conseyería de Presidencia, Retu Demográficu, Igualdá y Turismu del gobiernu d’Asturies convoca otru añu más, al traviés del Institutu Asturianu de la Muyer, el Premiu Amparo Pedregal pa trabayos lliterarios escritos por muyeres y trabayos d’investigación feminista. El premiu recibe’l nome como homenaxe a la memoria de la profesora y historiadora Amparo Pedregal, figura clave del feminismu académicu n’Asturies del sieglu XX y entamos del XXI, que trabayó polos derechos de les muyeres y que tovía sigue vixente n’ámbitos del pensamientu feminista como la coeducación o el derechu antidiscriminatoriu.
La dotación en premios del concursu ye de 5000€, cuantía que repártese ente les dos categoríes (trabayos lliterarios escritos por muyeres y trabayos d’investigación con perspectiva de xéneru), de manera que caúna cunta con premiu de 2500€. Les bases establecen qu’en dambes categoríes van almitise obres escrites tanto n’asturianu como en castellán.
Categoríes: poesía y investigación
La primer categoría, dedicada a trabayos lliterarios orixinales y inéditos escritos por muyeres, va cambiando de modalidá lliteraria y esti 2025 la escoyida ye la poesía. La participación nesta categoría ta llendada a muyeres mayores d’edá, ñacíes o residentes n’Asturies o que seyan descendientes hasta segundu grau de la emigración asturiana. Tamién van almitise obres colectives, atendiendo pa les condiciones de participación específiques que s’indiquen nes bases. Los trabayos d’esta categoría nun podrán tener un llargor menor de 30 páxines con interlliniáu 1,5 y tamañu de lletra 12ptos.
La segunda categoría dedícase a trabayos d’investigación feminista, orixinales y inéditos, con perspectiva de xéneru y que tengan rellación cola igualdá ente homes y muyeres. Nesta categoría puede participar cualquier persona mayor d’edá, ñacida o residente n’Asturies, y tamién descendientes hasta segundu grau de la emigración asturiana. El xuráu va tener en cuenta’l rigor metodolóxicu, l’aportación que supongan les tesis pal avance del conocimientu en materia de feminismu y la aplicabilidá de los resultaos del estudiu. El llargor de los ensayos presentaos a esta categoría ta llendáu ente 150 y 350 páxines con interlliniáu 1,5 y tamañu de lletra 12ptos.
El plazu pa presentase al Premiu Amparo Pedregal remata’l 5 de setiembre de 2025 y van almitise candidatures formalizaes pel rexistru, al traviés d’unvíu postal o per corréu electrónicu.
Puedes consultar equí les bases completes de la convocatoria.
