La Fundación Cultural Benéfica Fernández Lema convoca una nueva edición del Premiu de Relatu Curtiu Fernández Lema, correspondiente al añu 2026, un certame lliterariu de calter nacional que cuenta con dos modalidaes: llingua castellana y llingua asturiana.
El concursu ta abiertu a toles persones que presenten un relatu curtiu inéditu, non premiáu en ediciones anteriores, y escritu na llingua de la modalidá escoyida. Cada premiu ta dotáu con 1.500 euros, tanto pa la modalidá en castellanu como pa la d’asturianu.
Les obres han tener una estensión máxima de 10 folios DIN-A4, mecanografiaos a una sola cara y con un tamañu mínimu de fonte de 12 puntos. Los relatos presentaránse por cuadruplicáu y baxo alcuñu, acompañaos de la documentación correspondiente según recoyen les bases del certame.
El plazu de presentación de los trabayos remata’l 13 de marzu de 2026, inclusive. Les obres puen entregase personalmente na Casa de Cultura de L.luarca-Valdés o unviase polos medios recoyíos na normativa alministrativa vixente.
El fallu del xuráu va facese públicu antes del 30 de xunu y va espublizase na páxina web oficial del premiu. La entrega de los galardones celebrarase nun actu públicu en L.luarca-Valdés. Les bases completes del concursu puen consultase na web www.premiosfernandezlema.com
